ವಾಮಾಚಾರಕ್ಕೆ ಹೆದರಿದ ತಾಯಪ್ಪನದೊಡ್ಡಿ ಗ್ರಾಮಸ್ಥರು : ತಿಂಗಳಿಗೆ 2 ಬಾರಿ ಮಾಟ

ಬಿಡದಿ : ತಾಯಪ್ಪನದೊಡ್ಡಿ ಮುಖ್ಯರಸ್ತೆಯ ಸ್ಮಶಾನದ ಬಳಿ ಕಿಡಿಗೇಡಿಗಳು ವಾಮಾಚಾರ ಮಾಡಿರುವುದು ಗ್ರಾಮಸ್ಥರ ಭೀತಿಗೆ ಕಾರಣವಾಗಿದೆ. ಗ್ರಾಮದ ಮನೆಗಳ ಮುಂದೆಯೂ ಅರಿಶಿಣ-ಕುಂಕುಮ ಚೆಲ್ಲುತ್ತಿದ್ದಾರೆ. ಪ್ರತಿ ಹುಣ್ಣಿಮೆ, ಅಮಾವಾಸ್ಯೆಗಳಲ್ಲಿ ಕೃತ್ಯಗಳು ನಡೆಯುತ್ತಿವೆ.

ಗಾರೆಪಾಳ್ಯ ಮತ್ತು ತಾಯಪ್ಪನದೊಡ್ಡಿ ತಿರುವು ಬಳಿ ಇರುವ ಗುಂಡು ತೋಪನ್ನು ಕಿಡಿಗೇಡಿಗಳು ವಾಮಾಚಾರಕ್ಕೆ ಬಳಸಿಕೊಳ್ಳುತ್ತಿದ್ದಾರೆ. ಗ್ರಾಮದ ಮನೆಗಳ ಮುಂದೆ ನಿಂಬೆಹಣ್ಣು, ಮೊಟ್ಟೆ ಒಡೆಯುತ್ತಿದ್ದಾರೆ. ಹಾರೋಹಳ್ಳಿ ಕೈಗಾರಿಕಾ ಪ್ರದೇಶಕ್ಕೆ ತೆರಳುವವರೂ ಇದರಿಂದ ಭೀತಿಗೊಳಗಾಗಿದ್ದಾರೆ.

ಗ್ರಾಮದಲ್ಲಿ ಬಿಡದಿ ಠಾಣೆಯ ಔಟ್​ಪೋಸ್ಟ್ ಇದ್ದು, ವಾಮಾಚಾರ ಮಾಡುತ್ತಿರುವ ಕಿಡಿಗೇಡಿಗಳನ್ನು ಪತ್ತೆಹಚ್ಚಿ ಶಿಕ್ಷೆಗೊಳಪಡಿಸಬೇಕು ಎಂದು ನಾಗರಿಕರು ಒತ್ತಾಯಿಸಿದ್ದಾರೆ.