ಕಲಬುರಗಿ: ಮಹಾರಾಷ್ಟ್ರ ಇನ್ನಿತರ ಕಡೆಗೆ ವಲಸೆ ಹೋಗಿ ಕರೊನಾ ಹಾವಳಿಯಲ್ಲಿ ಬಂದಿರುವ ಕಾರ್ಮಿಕರು ಹಾಗೂ ರೈತರು ಮತ್ತೇ ಗುಳೆ ಹೋಗುವುದನ್ನು ತಡೆಯಲು ಅವರಿಗೆ ಹೈನುಗಾರಿಕೆ ಆರಂಭಿಸಲು ತರಬೇತಿ ನೀಡಲಾಗುವುದು. ನಿಮ್ಮ ಊರುಗಳಲ್ಲಿಯೇ ಸ್ವಾವಲಂಬಿಗಳಾಗಿ ಜೀವನ ನಡೆಸಲು ಮುಂದಾಗಬೇಕು ಎಂದು ಕಲಬುರಗಿ- ಬೀದರ್ ಹಾಗೂ ಯಾದಗಿರಿ ಸಹಕಾರ ಹಾಲು ಉತ್ಪಾದಕರ ಸಂಘಗಳ ಒಕ್ಕೂಟದ ಅಧ್ಯಕ್ಷ ರಾಮಚಂದ್ರ ಪಾಟೀಲ (ಆರ್.ಕೆ.ಪಾಟೀಲ್) ತಿಳಿಸಿದರು.
ಕಲಬುರಗಿ ಜಿಲ್ಲೆಯಲ್ಲಿ 2.10 ಲಕ್ಷ ಜನ ವಲಸಿಗರು ಸೇರಿ ಒಕ್ಕೂಟದ ವ್ಯಾಪ್ತಿಯ ಮೂರು ಜಿಲ್ಲೆಗಳಲ್ಲಿ ಸುಮಾರು 2.30 ಲಕ್ಷ ವಲಸಿಗ ಕಾರ್ಮಿಕರು ಬಂದಿದ್ದಾರೆ. ಈ ನಿಟ್ಟಿನಲ್ಲಿ ಖಜೂರಿ, ಮಾದನಹಿಪ್ಪರಗಾ, ಯಳಸಂಗಿ ಇನ್ನಿತರ ಕ್ವಾರಂಟೈನ್ ಸೆಂಟರ್ಗಳಿಗೆ ಭೇಟಿ ನೀಡಿ ಅಲ್ಲಿರುವ ವಲಸಿಗರೊಂದಿಗೆ ಚರ್ಚೆ ನಡೆಸಿ ಮನವೊಲಿಸುವ ಕೆಲಸ ಮಾಡಿದ್ದೇನೆ, ಅದಕ್ಕೆ ಹಲವು ಸ್ಪಂದಿಸಿದ್ದಾರೆ ಎಂದು ನಗರದಲ್ಲಿ ಶನಿವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.
ಇಲ್ಲಿಯೇ ತರಬೇತಿ ನೀಡುವ ವ್ಯವಸ್ಥೆ ಇದೆ. ನೀವೇ ಹಾಲಿನ ಸೊಸೈಟಿ ಸ್ಥಾಪಿಸಿ ಹಾಲು ಮಾರಾಟ ಮಾಡಬಹುದು. ಎಲ್ಲಿಯೋ ಹೋಗಿ ಕೆಲಸಕ್ಕಾಗಿ ಕೈಚಾಚುವ ಬದಲು, ಹಸುಗಳನ್ನು ಸಾಕಿಕೊಂಡು ಹೈನುಗಾರಿಕೆ ಮಾಡಿ. ಈ ಕುರಿತು ತಾವು ಬ್ಯಾಂಕರ್ಗಳ ಜತೆಗೆ ಚರ್ಚೆ ನಡೆಸಿ ಆಸಕ್ತರೆಲ್ಲರಿಗೂ ಸಾಲದ ನೆರವು ಸಿಗುವಂತೆ ಮಾಡಲು ಪ್ರಯತ್ನಿಸುತ್ತೇನೆ. ಒಂದೇ ಹಸುವಿನಿಂದಲೂ ಹಾಲು ಉತ್ಪಾದನೆ ಮಾಡಬಹುದಾಗಿದೆ. ಹೈನುಗಾರಿಕೆ ನಡೆಸುವ ಕುರಿತು ಒಕ್ಕೂಟದಿಂದ ಒಂದು ವಾರ ತರಬೇತಿ ನೀಡಲಾಗುವುದು. ಅವರಿಗೆ ಊಟ, ವಸತಿ ಸಹ ಕಲ್ಪಿಸಲಾಗುವುದು ಎಂದು ಪಾಟೀಲ್ ಹೇಳಿದರು.
ಒಕ್ಕೂಟದಿಂದ ಪ್ರತಿ ವಾರ ರೈತರಿಗೆ ಹಾಲಿನ ಬಿಲ್ ಪಾವತಿ ಮಾಡಲಾಗುತ್ತಿದೆ. ಒಕ್ಕೂಟದ ಸಿಬ್ಬಂದಿ ಸಹ ಮಾದರಿ ಕೆಲಸ ಮಾಡಿದ್ದಾರೆ ಎಂದು ಶ್ಲಾಘಿಸಿದರು.
20 ಸಾವಿರ ಲೀಟರ್ ಹಾಲು ಕೊರತೆ ಬರಪೀಡಿತ ಎಂದು ಹೇಳುವ ಕೋಲಾರ ಜಿಲ್ಲೆಯಷ್ಟೆ ಮಳೆ ಕಲಬುರಗಿ ಜಿಲ್ಲೆಯಲ್ಲಿಯೂ ಆಗುತ್ತದೆ. ಅವರಂತೆ ನಮ್ಮ ರೈತರು ಸಹ ಹಾಲು ಉತ್ಪಾದನೆ, ತೋಟಗಾರಿಕೆ, ಕೃಷಿಯಲ್ಲಿ ಸಾಧನೆ ಮಾಡಬಹುದಾಗಿದೆ. ಕೋಲಾರದಲ್ಲಿ ಅತಿ ಹೆಚ್ಚಿನ ಪ್ರಮಾಣದ ಹಾಲು ಸಂಗ್ರಹವಾಗುತ್ತಿದೆ. ಇಲ್ಲಿ ಬೇಡಿಕೆ ಹೆಚ್ಚಿದೆ, ಸಂಗ್ರಹ ಕಡಿಮೆ ಇದೆ. 61 ಸಾವಿರ ಲೀಟರ್ ಮಾರಾಟವಾಗುತ್ತಿದ್ದರೆ, 45 ಸಾವಿರ ಲೀಟರ್ ಸಂಗ್ರಹಗೊಳ್ಳುತ್ತದೆ. ಈ ಕೊರತೆ ನೀಗಿಸಲು ವಿಜಯಪುರ, ಶಿವಮೊಗ್ಗ ಒಕ್ಕೂಟದಿಂದ ಹಾಲು ತರಿಸಿಕೊಳ್ಳುತ್ತೇವೆ. ನಮ್ಮಲ್ಲಿ ವಲಸೆ ಹೋಗಿ ಬಂದವರು ಹಾಲು ಉತ್ಪಾದನೆಯಲ್ಲಿ ತೊಡಗಿಸಿಕೊಂಡರೆ ಆರ್ಥಿಕವಾಗಿ ಸಬಲರಾಗಬಹುದು ಎಂದು ಅವರು ತಿಳಿಸಿದರು.
