ಇದಕ್ಕೂ ಮುನ್ನ ಸೈಯದ್ ಇಸ್ಮಾಯಿಲ್ ಸವಣೂರ ತಾಲೂಕು ಆರೋಗ್ಯ ಇಲಾಖೆ ಕಚೇರಿಗೆ ತೆರಳಿದ್ದ. ಆಗ ಕಚೇರಿ ಅಧಿಕಾರಿಗಳು, ‘ನಿಮಗೆ ಮೇಲಧಿಕಾರಿಗಳ ಯಾವುದೇ ಆದೇಶವಿಲ್ಲ. ಸವಣೂರಿನಲ್ಲಿ ಬ್ಯಾನರ್ ಅಂಟಿಸಿ ದಂಡ ವಸೂಲಿ ಮಾಡಬೇಡಿ’ ಎಂದು ತಾಕೀತು ಮಾಡಿ ಕಳುಹಿಸಿದ್ದಾರೆ. ನಂತರ ಆರೋಪಿ, ಪೊಲೀಸ್ ಠಾಣೆಗೆ ತೆರಳಿ, ‘ಸರ್, ನಾನು ಈ ಹಿಂದೆ ಜಾಗೃತಿ ಮೂಡಿಸಲು ಹಾಸನ, ಚಿಕ್ಕಮಗಳೂರು ಜಿಲ್ಲೆಗಳಲ್ಲಿ ಬ್ಯಾನರ್ ಅಳವಡಿಸಲು ಅನುಮತಿ ಪತ್ರ ಪಡೆದಿದ್ದೇನೆ’ ಎಂದು ಹೇಳಿದ್ದ. ಅದಕ್ಕೆ ಸಿಪಿಐ ಎಸ್. ದೇವಾನಂದ ಅವರು, ‘ಜನರಿಂದ ಯಾವುದೇ ಹಣ ವಸೂಲಿ ಮಾಡಬೇಡಿ’ ಎಂದು ತಾಕೀತು ಮಾಡಿ ಕಳುಹಿಸಿದ್ದರು. ಬಳಿಕ ಸೈಯದ್ ಇಸ್ಮಾಯಿಲ್ ಪಿಎಸ್ಐ ಜೀಪ್ನಲ್ಲಿ ತೆರಳಿ ಮಾರುಕಟ್ಟೆಯಲ್ಲಿ ಇಳಿದಿದ್ದನ್ನು ಕಂಡು ಜನತೆ ಈತ ಆರೋಗ್ಯ ಇಲಾಖೆ ಅಧಿಕಾರಿ ಇರಬಹುದು ಎಂದು ತಿಳಿದು ವಂಚನೆಗೊಳಗಾಗಿದ್ದಾರೆ. ಇಂಥ ವಂಚಕನನ್ನು ಪಿಎಸ್ಐ ಶಿವಣ್ಣವರ ಏಕೆ ಜೀಪಿನಲ್ಲಿ ಕರೆದುಕೊಂಡು ತಿರುಗಾಡಿದರು ಎಂದು ಸಾರ್ವಜನಿಕರು ಪ್ರಶ್ನಿಸುತ್ತಿದ್ದಾರೆ.
