ನಿತ್ಯ ಬೆಳಗ್ಗೆ 6 ರಿಂದ 9ರವರೆಗೆ ದಿನಸಿ ವ್ಯಾಪಾರಕ್ಕೆ ಮತ್ತು ತಳ್ಳು ಗಾಡಿಯಲ್ಲಿ ಮನೆ ಮನೆಗೆ ತರಕಾರಿ ಮಾರಾಟಕ್ಕೆ ವ್ಯವಸ್ಥೆ ಕಲ್ಪಿಸಲಾಗಿದೆ. ಆದಾಗ್ಯೂ ನಿತ್ಯ ಬೆಳಗ್ಗೆ 5.30 ರ ಹೊತ್ತಿಗೆ ವ್ಯಾಪಾರ-ವಹಿವಾಟು ಪ್ರಾರಂಭವಾಗಿರುತ್ತದೆ. ಪಟ್ಟಣ ಸೇರಿ ಗ್ರಾಮೀಣ ಪ್ರದೇಶದ ಜನರು, ವ್ಯಾಪಾರಸ್ಥರು ಬೆಳಗಾಗುತ್ತಿದ್ದಂತೆಯೇ ದಾಂಗುಡಿ ಇಡುತ್ತಿದ್ದಾರೆ. ಕಳೆದ ಒಂದು ತಿಂಗಳಿಂದ ಸೇರುವ ಜನದಟ್ಟಣೆ ತಡೆಯಲು ತಾಲೂಕಾಡಳಿತ ಸ್ಥಳೀಯ ಪುರಸಭೆ, ಪೊಲೀಸ್, ಸಂಘ-ಸಂಸ್ಥೆಗಳ ಸಹಕಾರದಲ್ಲಿ ಹತ್ತಾರು ಬದಲಾವಣೆ, ಕಟ್ಟುನಿಟ್ಟಿನ ಕ್ರಮ ಕೈಗೊಂಡರೂ ಜನರ ಸಹಕಾರ ಸಿಗದೆ ಜನಸಂದಣಿ ಹೆಚ್ಚುತ್ತಲೇ ಇದೆ. ಬರುವ ಜನತೆ ಮಾಸ್ಕ್ ಧರಿಸುತ್ತಿಲ್ಲ, ಸಾಮಾಜಿಕ ಅಂತರ ಕಾಯುತ್ತಿಲ್ಲ, ಎಷ್ಟೇ ಬುದ್ಧಿ ಹೇಳಿದರೂ ಕೇಳುತ್ತಿಲ್ಲ ಎಂದು ಅಧಿಕಾರಿಗಳು ತಮ್ಮ ಅಸಹಾಯಕತೆ ವ್ಯಕ್ತಪಡಿಸುತ್ತಿದ್ದಾರೆ. ಸಿಪಿಐ ಆರ್.ಎಚ್. ಕಟ್ಟಿಮನಿ, ಪಿಎಸ್ಐ ಶಿವಯೋಗಿ ಲೋಹಾರ, ಪುರಸಭೆ ಸಿಬ್ಬಂದಿ ಆನಂದ ಬದಿ, ಮಂಜು ಮುದಗಲ್, ಬಸವಣ್ಣೆಪ್ಪ ನಂದೆಣ್ಣವರ ಸೇರಿ ಸಂಘಟನೆಗಳ ಸ್ವಯಂ ಸೇವಕರು ಇದ್ದರು.
