ಈ ಬಾರಿ ಮಂಡ್ಯವೂ ಸೇರಿದಂತೆ ರಾಜ್ಯದ ಮಳೆ ಪ್ರಮಾಣ ನೋಡಿದಾಗ ಶೇ.60 ರಷ್ಟು ಕಡಿಮೆ ಇದೆ. ಮಳೆಯ ಅಭಾವದಿಂದ ರೈತರು ಸರಿಯಾದ ಸಮಯಕ್ಕೆ ಬಿತ್ತನೆ ಮಾಡಲು ಸಾಧ್ಯವಾಗುತ್ತಿಲ್ಲ. ಮಳೆ ಕಡಿಮೆಯಿರುವ ಕಾರಣ, ಬೆಳೆ ವಿಮೆ ಸಂಬಂಧ ಸಚಿವ ಸಂಪುಟ ಸಭೆಯಲ್ಲಿ ಮುಖ್ಯಮಂತ್ರಿಗಳ ಬಳಿ ಚರ್ಚಿಸಿದ್ದು, 900 ಕೋಟಿ ರೂ.ಗಳನ್ನು ಬೆಳೆ ವಿಮೆಗಾಗಿ ರಾಜ್ಯ ಸರ್ಕಾರ ಕಟ್ಟುತ್ತಿದೆ. ಆದರೆ ರೈತರು ಬೆಳೆ ವಿಮೆಗೆ ಕೇವಲ 200 ರೂ. ಕಟ್ಟಲು ಹಿಂದೇಟು ಹಾಕುತ್ತಿರುವುದು ಸರಿಯಲ್ಲ. ರೈತರು ಬೆಳೆ ವಿಮೆಯನ್ನು ಕಡ್ಡಾಯವಾಗಿ ಮಾಡಿಸುವ ಮೂಲಕ ತಮ್ಮ ನಷ್ಟವನ್ನು ವಿಮೆ ಮೂಲಕ ಸರಿದೂಗಿಸಿಕೊಳ್ಳುವಂತೆ ಮನವಿ ಮಾಡಿದರು. ಎಳ್ಳಿಗೆ ವಿಮೆ ಕಟ್ಟಲು ಶುಕ್ರವಾರ ಅಂತಿಮ ದಿನವಾಗಿದ್ದು, ಕೂಡಲೇ ರೈತರು ವಿಮೆ ಮಾಡಿಸುವಂತೆ ಕೋರಿದರು.
