ರಾಯರಡ್ಡಿ ಕ್ಷಮೆ ಕೇಳದಿದ್ದರೆ ಮಸಿ ಬಳಿಯುತ್ತೇವೆ: ಜೆಡಿಎಸ್ ಮುಖಂಡರ ಕಿಡಿ

ಕೊಪ್ಪಳ: ಶಾಸಕ ಬಸವರಾಜ ರಾಯರಡ್ಡಿ ಮಾನಸಿಕ ಸ್ಥಿಮಿತೆ ಕಳೆದುಕೊಂಡಿದ್ದಾರೆ. ಕುಮಾರಸ್ವಾಮಿ ಸೇರಿ ಹಿರಿಯ ರಾಜಕಾರಣಿಗಳ‌ ಬಗ್ಗೆ ಏಕ ವಚನದಲ್ಲಿ ಮಾತನಾಡುತ್ತಾರೆ. ತಕ್ಷಣ ಅವರು ಕ್ಷಮೆ ಕೇಳಬೇಕು. ಇಲ್ಲದಿದ್ದರೆ ಕ್ಷೇತ್ರಕ್ಕೆ ಬಂದಾಗ ಮುಖಕ್ಕೆ ಮಸಿ ಬಳಿಯುತ್ತೇವೆ ಎಂದು ಯಲಬುರ್ಗಾ ಜೆಡಿಎಸ್ ಪರಾಜಿತ ಅಭ್ಯರ್ಥಿ ಮಲ್ಲನಗೌಡ ಕೋನನಗೌಡ ಎಚ್ಚರಿಸಿದರು.

ನಗರದಲ್ಲಿ ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದರು.

ಶಾಸಕ ಬಸವರಾಜ ರಾಯರಡ್ಡಿ ಪ್ರಚಾರಕ್ಕಾಗಿ ಮನಬಂದಂತೆ ಮಾತನಾಡುತ್ತಾರೆ. ಅವರ ಕಾರ್ಯಕರ್ತರು ನೀವು ಯಾವಾಗ ಸಚಿವರಾಗುತ್ತೀರಿ ಎಂದು ಪ್ರಶ್ನಿಸಿದಾಗ ತನ್ನ ಹಣೆಬರಹದಲ್ಲಿ ಇಲ್ಲ ಎಂದಿದ್ದರೆ ಸರಿಯಿತ್ತು. ಅದು ಬಿಟ್ಟು ಲಾಲ್ ಕೃಷ್ಣ ಅಡ್ವಾಣಿ, ದೇವೆಗೌಡ, ಕುಮಾರಸ್ವಾಮಿ ಬಗ್ಗೆ ಏಕ ವಚನದಲ್ಲಿ ಮಾತನಾಡಿದ್ದಾರೆ. ಹಿರಿಯ ಶಾಸಕರೆನಿಸಿಕೊಂಡ ಇವರಿಗೆ ನಾಚಿಕೆ, ಮಾನ, ಮರ್ಯಾದೆ ಇದೆಯಾ? ಇವರಿಗೆ ಧೈರ್ಯ ಇದ್ದರೆ ಅವರಿಗಿಂತ ಸಣ್ಣ ವಯಸ್ಸಿನವರಾದ ರಾಹುಲ್ ಗಾಂಧಿಯನ್ನು ಏಕ ವಚನದಲ್ಲಿ ಕರೆಯಲಿ ನೋಡೋಣ. ಸಿದ್ದರಾಮಯ್ಯ ಹಾಗೂ ಲಕ್ಷ್ಮಣ ಸವದಿ ಅವರ ಬೆಂಬಲದಿಂದ ಶಾಸಕನಾಗಿ ಆಯ್ಕೆಯಾಗಿದ್ದಾರೆ. ಜನರ ಆಶೀರ್ವಾದದಿಂದ ಗೆದ್ದಿಲ್ಲ ಎಂದು ಛೇಡಿಸಿದರು.

ರಾಯರಡ್ಡಿ ಹೆಸರು ಪಡೆಯಲು ಜನತಾ ಪರಿವಾರ ಕಾರಣ. ಕಾಂಗ್ರೆಸ್ ಸೇರುವ ಮುನ್ನ ಸೋನಿಯಾ ಗಾಂಧಿ ಇಟಲಿ ಮಹಿಳೆ. ಸೀರೆ ಉಡಲು ಬರುವುದಿಲ್ಲ. ಅಂಥವರನ್ನು ಕಾಂಗ್ರೆಸ್ ನಾಯಕಿಯಾಗಿ ಮಾಡಿದೆ ಎಂದು ಟೀಕಿಸಿದ್ದರು. ಈಗ ಅದೇ ಕಾಂಗ್ರೆಸ್ ನಲ್ಲಿ ಇದ್ದಾರೆ. ಮಾಜಿ ಎಂಎಲ್ಸಿ ಶ್ರೀನಾಥ ಹೇಳುವಂತೆ ರಾಯರಡ್ಡಿ ಮಾನಸಿಕ ಸ್ಥಿತಿ‌ ಸರಿಯಾಗಿಲ್ಲ. ಕ್ಷೇತ್ರದ ಅಭಿವೃದ್ಧಿ ಬಗ್ಗೆ ಮಾತನಾಡುತ್ತಿಲ್ಲ.‌ ಬದಲಿಗೆ ಅನಗತ್ಯ ವಿಷಯಗಳನ್ನು ಮಾತನಾಡುತ್ತಾರೆ. ಸ್ಪೀಕರ್ ಯು.ಟಿ.ಖಾದರ್ ರಾಯರಡ್ಡಿಗೆ ವಿದೇಶಕ್ಕೆ ಕಳಿಸಿ ಉತ್ತಮ ಚಿಕಿತ್ಸೆ ಕೊಡಿಸಬೇಕೆಂದು ಮನವಿ ಮಾಡುವೆ. ಅವರು ಕೂಡಲೇ ತಮ್ಮ ಹೇಳಿಕೆ ಹಿಂಪಡೆದು ಕ್ಷಮೆ ಕೇಳಬೇಕು.‌ ಸಮರ್ಥಿಸಿಕೊಂಡರೆ ಕ್ಷೇತ್ರಕ್ಕೆ ಬಂದಾಗ ಮಸಿ ಬಳಿಯುತ್ತೇವೆಂದು ತಿಳಿಸಿದರು.

ಜೆಡಿಎಸ್ ಕಾರ್ಯಾಧ್ಯಕ್ಷ ಶರಣಪ್ಪ ರಾಂಪೂರ, ಪ್ರಧಾನ ಕಾರ್ಯದರ್ಶಿ ಬಸವರಾಜ ಮನಗುಳಿ, ಪ್ರಮುಖರಾದ ಕೆಂಚಪ್ಪ ಹಳ್ಳಿ, ಡಾ.ಮಹೇಶ ಗೋವನಕೊಪ್ಪ ಇದ್ದರು.