ಚಿತ್ರದುರ್ಗ: ಬೆಂಗಳೂರು ರಾಮೇಶ್ವರ ಕೆಫೆ ಬಾಂಬ್ ಸ್ಫೋಟ ಪ್ರಕರಣದ ಬೆನ್ನಲ್ಲೇ ಪೊಲೀಸ್ ಇಲಾಖೆ ರಾಜ್ಯಾದ್ಯಂತ ಹೈ ಅಲರ್ಟ್ ಘೋಷಿಸಿದೆ.
ಈ ಘಟನೆ ನಾಗರಿಕರಲ್ಲಿ ಯಾವುದೇ ರೀತಿ ಆತಂಕಕ್ಕೆ ಕಾರಣವಾಗಬಾರದೆಂದು, ಜನರಲ್ಲಿ ವಿಶ್ವಾಸ ಮೂಡಿಸಲು ಪೊಲೀಸರು ಮುಂದಾಗಿದ್ದಾರೆ.
ಈ ಹಿನ್ನೆಲೆಯಲ್ಲಿ ಎಲ್ಲ ನಗರಗಳು ಸೇರಿ ರಾಜ್ಯದ ಜಲಾಶಯ, ಪ್ರವಾಸಿತಾಣ, ಕೋರ್ಟ್- ಕಚೇರಿಗಳು, ಬಸ್, ರೈಲು, ವಿಮಾನ ನಿಲ್ದಾಣಗಳು, ಬಂದರು, ಆಸ್ಪತ್ರೆ ಮೊದಲಾದೆಡೆ ಶ್ವಾನದಳದೊಂದಿಗೆ ಪರಿಶೀಲನೆ ನಡೆಸುತ್ತಿದ್ದಾರೆ. ಪೊಲೀಸ್ ಮಹಾ ನಿರ್ದೇಶಕರ ಸೂಚನೆಯಂತೆ ಸ್ಫೋಟಕ ಪತ್ತೆ ಶ್ವಾನಗಳೊಂದಿಗೆ ಕಾರ್ಯಾರಣೆಗೆ ಇಳಿದಿದ್ದಾರೆ.
ಲೋಕಸಭಾ ಚುನಾವಣೆ ಘೋಷಣೆ ಮುನ್ನ ಜನಸಂದಣಿ ಇರುವ ಹೋಟೆಲ್ನಲ್ಲಾದ ಬಾಂಬ್ ಸ್ಫೋಟ ಸಹಜವಾಗಿಯೇ ಜನರ ಆತಂಕಕ್ಕೆ ಕಾರಣವಾಗಿದೆ. ಈ ಹಿನ್ನೆಲೆಯಲ್ಲಿ ನಿತ್ಯ ಕಟ್ಟುನಿಟ್ಟಿನಿಂದ ಪರಿಶೀಲನೆ ನಡೆಸಲು ಜಿಲ್ಲಾ ರಕ್ಷಣಾಧಿಕಾರಿಗಳಿಗೆ ಡಿಜಿಪಿ ಅಲೋಕ್ ಮೋಹನ್ ನಿರ್ದೇಶಿಸಿದ್ದಾರೆ.
ಚಿತ್ರದುರ್ಗದಲ್ಲಿ ಸೋಮವಾರ ರೈಲ್ವೇ ಸ್ಟೇಷನ್, ಬಸ್ ನಿಲ್ದಾಣ, ಕೋರ್ಟ್, ಕೋಟೆ ಮೊದಲಾದೆಡೆ ಚೆಕ್ಕಿಂಗ್ ನಡೆಯಿತು. ತಾಲೂಕು ಕೇಂದ್ರಗಳಲ್ಲೂ ಕನಿಷ್ಠ ವಾರಕ್ಕೆ ಒಂದೆರೆಡು ಬಾರಿಯಾದರೂ ಪರಿಶೀಲನೆ ನಡೆಸಲಾಗುತ್ತದೆ. ಈ ಮೊದಲು ಕೂಡ ಕೋರ್ಟ್,ನಿಲ್ದಾಣ, ಐತಿಹಾಸಿಕ ತಾಣ, ಜಲಾಶಯಗಳು ಮತ್ತಿತರ ಜನದಟ್ಟಣೆ ಸ್ಥಳಗಳಲ್ಲಿ ಚೆಕ್ಕಿಂಗ್ ನಡೆಯುತ್ತಿದ್ದು, ಈ ಕಾರ್ಯಕ್ಕೆ ಚುರುಕು ನೀಡಲಾಗಿದೆ ಎಂಬುದು ಶ್ವಾನದಳದ ಅಧಿಕಾರಿಯೊಬ್ಬರ ಅನಿಸಿಕೆ.
ಸದ್ಯ ಚಿತ್ರದುರ್ಗದ ಪೊಲೀಸ್ ಶ್ವಾನದಳದಲ್ಲಿ 3 ಅಪರಾಧ ಹಾಗೂ 3 ಸ್ಫೋಟಕ ಪತ್ತೆ ಶ್ವಾನಗಳಿವೆ. ಐದಾರು ತಿಂಗಳ ಮರಿಯೊಂದಕ್ಕೆ ತರಬೇತಿ ನೀಡಲಾಗುತ್ತಿದೆ.
*ವಾಟ್ಸ್ಆ್ಯಪ್ ಗ್ರೂಫ್:
