ರಾಜ್ಯ ಹೆದ್ದಾರಿಗೆ ರೈತರಿಂದ ಬ್ಯಾರಿಕೇಡ್, ರಸ್ತೆಯಲ್ಲಿ ಓಡಾಡದಂತೆ ಬಾಶೆಟ್ಟಿಹಳ್ಳಿ ರೈತರ ಮನವಿ, ಭೂ ಸ್ವಾಧೀನಪಡಿಸಿಕೊಂಡ ಭೂಮಿಗೆ 5 ವರ್ಷವಾದರೂ ಪರಿಹಾರ ನೀಡಿದ ಕೆಆರ್‌ಡಿಸಿಎಲ್

ವೆಂಕಟರಾಜು ಎಸ್. ದೊಡ್ಡಬಳ್ಳಾಪುರ

‘ಈ ಜಾಗವನ್ನು ಸ್ವಾಧೀನಪಡಿಸಿಕೊಳ್ಳಲು ಹಣ ನೀಡದೆ ನಮ್ಮ ಸ್ವಂತ ಜಾಗದಲ್ಲಿ ರಸ್ತೆ ನಿರ್ಮಾಣ ಮಾಡಿರುವುದರಿಂದ ಈ ಜಾಗದಲ್ಲಿ ಯಾರೂ ಓಡಾಡಬಾರದು’!

ಹಿಂದೂಪುರ-ಯಲಹಂಕದ ರಾಜ್ಯ ಹೆದ್ದಾರಿ 9 ರಲ್ಲಿ ಇಂಥದೊಂದು ಲಕ ರಾರಾಜಿಸುತ್ತಿದೆ. ಬಾಶೆಟ್ಟಿಹಳ್ಳಿ ಬಳಿ ಹೆದ್ದಾರಿಯಲ್ಲೇ ಬ್ಯಾರಿಕೇಡ್ ಇಟ್ಟು ಸೂಚನಾ ಲಕ ಅಳವಡಿಸಿರುವ ರೈತರು ಸರ್ಕಾರ ಭೂಮಿಗೆ ಪರಿಹಾರ ನೀಡಿಲ್ಲದ ಕಾರಣ ಸಾರ್ವಜನಿಕರು ರಸ್ತೆಯಲ್ಲಿ ಸಂಚರಿಸದಂತೆ ಮನವಿ ಮಾಡಿ ಕೆಆರ್‌ಡಿಸಿಎಲ್ ಮಾನವನ್ನು ಹರಾಜು ಹಾಕಿದ್ದಾರೆ.

ಐದು ವರ್ಷಗಳ ಹಿಂದೆ ಹಿಂದೂಪುರ-ಯಲಹಂಕದ ರಾಜ್ಯ ಹೆದ್ದಾರಿ 9 ನಿರ್ಮಾಣಕ್ಕಾಗಿ ಕರ್ನಾಟಕ ರಸ್ತೆ ಅಭಿವೃದ್ಧಿ ನಿಗಮಕ್ಕೆ (ಕೆಆರ್‌ಡಿಸಿಎಲ್) ಭೂಮಿ ನೀಡಿದ ರೈತರಿಗೆ ಇದುವರೆಗೂ ಪರಿಹಾರ ಸಿಕ್ಕಿಲ್ಲ. ಪರಿಹಾರಕ್ಕಾಗಿ ಅಲೆದು ಸುಸ್ತಾದ ಎಂಟು ರೈತರು ಈ ಮೂಲಕ ವಿನೂತನವಾಗಿ ಅಧಿಕಾರಿಗಳ ಕಣ್ತೆರೆಸಲು ಮುಂದಾಗಿದ್ದಾರೆ.

ರಾಜ್ಯ ಹೆದ್ದಾರಿ ವಿಸ್ತರಣೆಗಾಗಿ ಸರ್ಕಾರ 2015ರಲ್ಲಿ ಸರ್ವೇ ಮಾಡಿ ಅವಶ್ಯವಿರುವ ಕಡೆ 1 ಗುಂಟೆಗೆ 6 ಲಕ್ಷ ರೂ. ಪರಿಹಾರ ನೀಡುವುದಾಗಿ ಒಡಂಬಡಿಕೆ ಮಾಡಿಕೊಂಡು ಜಮೀನು ವಶಪಡಿಸಿಕೊಂಡಿದೆ. ಆದರೆ ಭೂಮಿ ಮಾಲೀಕರಿಗೆ 5 ವರ್ಷವಾದರೂ ಪರಿಹಾರ ಕೊಟ್ಟಿಲ್ಲ. ಈ ಮಾರ್ಗದಲ್ಲಿನ ಎರಡು ಟೋಲ್‌ಗಳಲ್ಲಿ ಶುಲ್ಕ ವಸೂಲಿ ಮಾಡಲಾಗುತ್ತಿದೆ. ಆದರೂ, ಬಾಶೆಟ್ಟಿಹಳ್ಳಿ ಸಮೀಪ ವಶಪಡಿಸಿಕೊಂಡಿದ್ದ ಭೂಮಿಗೆ ಪರಿಹಾರ ನೀಡಿಲ್ಲ. ಈ ಬಗ್ಗೆ ಸಂಬಂಧಿಸಿದ ಅಧಿಕಾರಿಗಳಿಗೆ ಹಾಗೂ ಕಚೇರಿಗಳಿಗೆ ತೆರಳಿ ಮನವಿ ಮಾಡಿದರೂ ಸ್ಪಂದನೆ ದೊರಕದ ಹಿನ್ನೆಲೆಯಲ್ಲಿ ರೈತರು ನೀಡಿದ್ದ ಭೂಮಿಗೆ ಬ್ಯಾರಿಕೇಡ್ ಹಾಕಿದ್ದಾರೆ.

ರಸ್ತೆ ಅರ್ಧಕ್ಕೆ ತಡೆ: 2015ರಿಂದ ಈವರೆಗೆ ಪರಿಹಾರ ಹಣಕ್ಕಾಗಿ ಇಲಾಖೆಯ ಕಚೇರಿಗೆ ಹೋಗಿ, ಮನವಿ ಮಾಡಿಕೊಂಡು ಬರಿಗೈಯಲ್ಲಿ ಮರಳುತ್ತಿದ್ದೇವೆ. ಅಧಿಕಾರಿಗಳು ಮಾತ್ರ ನಮ್ಮ ಮಾತನ್ನು ಕೇಳುವುದೇ ಇಲ್ಲ. ಸ್ವಾಧೀನಪಡಿಸಿಕೊಳ್ಳುವಾಗ ಮಾತ್ರ ಪ್ರತಿದಿನವೂ ಮನೆಗೆ ಸುತ್ತುತ್ತಿದ್ದರು. ಈಗ ನಮ್ಮ ಪರಿಹಾರ ಹಣ ಕೇಳಿದರೆ ಇಂದು, ನಾಳೆ ಎಂದು ಸಾಗಹಾಕುತ್ತಿದ್ದಾರೆ. ಇದರಿಂದ ಬೇಸತ್ತಿರುವ ನಾವು, ನಮ್ಮ ಹೊಲಗಳಿದ್ದ ರಸ್ತೆಯ ಭಾಗದಲ್ಲಿ ಬ್ಯಾರಿಕೇಡ್ ಹಾಕಿ ವಾಹನಗಳು ಓಡಾಡದಂತೆ ಮಾಡಿದ್ದೇವೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.