ರಸ್ತೆ ಉಬ್ಬುಗಳಿಲ್ಲದೆ ಪರದಾಟ: ವಿವಿ ಮುಂಭಾಗದಲ್ಲಿ ವಾಹನಗಳ ವೇಗಕ್ಕೆ ಬಿದ್ದಿಲ್ಲ ಬ್ರೇಕ್​

ತುಮಕೂರು: ನಗರದ ಬಿ.ಎಚ್​.ರಸ್ತೆಯಲ್ಲಿ ಸಂಚಾರ ಸುವ್ಯವಸ್ಥೆ ಸುಧಾರಣೆಗೆ ಪೊಲೀಸರು ದಿಟ್ಟ ಕ್ರಮ ಕೈಗೊಂಡಿರುವುರಾದರೂ ಬಂದ್​ ಮಾಡಲಾಗಿದ್ದ ರಸ್ತೆ ವಿಭಜಕ ತೆರವುಗೊಳಿಸಿದ ಬಳಿಕ ರಸ್ತೆ ಉಬ್ಬು (ಹಂಪ್ಸ್​) ನಿರ್ಮಿಸದೇ ಇರುವುದರಿಂದ ವಾಹನ ಸವಾರರು ಪರದಾಡುವಂತಾಗಿದೆ.

ತುಮಕೂರು ವಿವಿ ಮುಂಭಾಗದಲ್ಲಿ ಬಿ.ಎಚ್​.ರಸ್ತೆಯ (ಶಿವಕುಮಾರಸ್ವಾಮೀಜಿ ರಸ್ತೆ) ಡಿವೈಡರ್​ ಬಂದ್​ ಮಾಡಿದ ಬಳಿಕ ಕುವೆಂಪು ನಗರದಿಂದ ಬಿ.ಎಚ್​.ರಸ್ತೆ ಸೇರುವ ಭಾಗದಲ್ಲಿ ರಸ್ತೆವಿಭಜಕ ತೆರವುಗೊಳಿಸಲಾಗಿದೆ. ಹನುಮಂತಪುರ, ಕುವೆಂಪುನಗರದ ಭಾಗದಿಂದ ಬಂದವರು ವಿವಿ ಮುಂಭಾಗದಲ್ಲಿ ಅಡ್ಡಾದಿಡ್ಡಿ ಚಲುಸುತ್ತಿದ್ದಕ್ಕೆ ಬ್ರೇಕ್​ ಬಿದ್ದಂತಾಗಿದೆ.

ಅಪಘಾತ ತಡೆಯಲು ರಸ್ತೆ ಉಬ್ಬು: ವಾಹನ ದಟ್ಟಣೆಯಿಂದ ನಾಗರಿಕರು ಹಾಗೂ ವಿದ್ಯಾರ್ಥಿಗಳ ಸಂಚಾರಕ್ಕೆ ತೀವ್ರ ತೊಂದರೆಯಾಗಿದ್ದು ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿ ರಾಹುಲಕುಮಾರ್​ ಶಹಾಪೂರವಾಡ್​ ತೆಗೆದುಕೊಂಡ ಕ್ರಮದಿಂದ 20 ದಿನಗಳಿಂದ ಈ ಸಮಸ್ಯೆಗೆ ಮುಕ್ತಿ ಸಿಕ್ಕಂತಾಗಿದೆ. ಈ ಮಧ್ಯೆ ಬಿ.ಎಚ್​.ರಸ್ತೆಗೆ ಕುವೆಂಪುನಗರ ಭಾಗದಿಂದ ವೇಗವಾಗಿ ವಾಹನ ಸವಾರರು ನುಗ್ಗುತ್ತಿರುವುದರಿಂದ ವಿಘ್ನೇಶ್ವರ ಕಂಫರ್ಟ್ಸ್​ ಮುಂಭಾಗ ತಾತ್ಕಾಲಿಕವಾಗಿ ಬ್ಯಾರಿಕೇಡ್​ ಹಾಕಿ ವಾಹನಗಳ ವೇಗಕ್ಕೆ ತಡೆಯೊಡ್ಡಿ ಅಪಘಾತಗಳನ್ನು ತಪ್ಪಿಸಲು ಸಂಚಾರ ಪೊಲೀಸರು ಕ್ರಮಕೈಗೊಂಡಿರುವರಾದರೂ ಬಿ.ಎಚ್​.ರಸ್ತೆಯ ಎರಡು ಕಡೆ ರಸ್ತೆ ಉಬ್ಬು ಅಗತ್ಯವಿದೆ.

ಅಶೋಕನಗರದಿಂದ, ಮತ್ತೊಂದು ಕಡೆ ಕುವೆಂಪು ನಗರದಿಂದ ಬಿ.ಎಚ್​.ರಸ್ತೆಗೆ ಪ್ರವೇಶ ಪಡೆಯುವ ಸಂದರ್ಭದಲ್ಲಿ ಅಪಘಾತ ಸಂಭವಿಸುವ ಸಾಧ್ಯತೆ ಹಿನ್ನೆಲೆಯಲ್ಲಿ ಪೊಲೀಸರು ತತ್​ಕ್ಷಣವೇ ರಸ್ತೆ ಉಬ್ಬು (ಹಂಪ್ಸ್​ ) ಹಾಕಿ ಪ್ರಾಣಹಾನಿ ತಪ್ಪಿಸಬೇಕೆಂಬುದು ನಾಗರಿಕರ ಆಗ್ರಹವಾಗಿದೆ. ರಸ್ತೆ ವಿಭಜಕ ತೆರವುಗೊಳಿಸಿದಷ್ಟೇ ವೇಗವಾಗಿ ಪೊಲೀಸರು ರಸ್ತೆ ಉಬ್ಬು ನಿರ್ಮಿಸುವರೇ ಕಾದುನೋಡಬೇಕಿದೆ.