ಮೈಸೂರು: ಯುವ ಭಾರತೀಯರ ಹೃದಯದ ಆರೋಗ್ಯ ಅಷ್ಟೊಂದು ಚೆನ್ನಾಗಿಲ್ಲ ಎಂದು ಜಯದೇವ ಹೃದ್ರೋಗ ಮತ್ತು ಸಂಶೋಧನಾ ಸಂಸ್ಥೆ ನಿರ್ದೇಶಕ ಡಾ.ಸಿ.ಎನ್.ಮಂಜುನಾಥ್ ತಿಳಿಸಿದರು.
ಜಿಲ್ಲಾ ಪತ್ರಕರ್ತರ ಸಂಘದಿಂದ ನಗರದಲ್ಲಿ ಶುಕ್ರವಾರ ಆಯೋಜಿಸಿದ್ದ ಮಾಧ್ಯಮ ಸಂವಾದದಲ್ಲಿ ಮಾತನಾಡಿದರು.
ಅಧ್ಯಯನವೊಂದರ ಪ್ರಕಾರ ಶೇ.50ರಷ್ಟು ಧೂಮಪಾನ, ಮದ್ಯಪಾನ, ಶೇ.10ರಷ್ಟು ಅಧಿಕ ರಕ್ತದೊತ್ತಡ, ಮಧುಮೇಹ, ಕೊಲೆಸ್ಟ್ರಾಲ್, ಶೇ.16ರಷ್ಟು ಕೌಟುಂಬಿಕ ಅನುವಂಶೀಯತೆ ಮತ್ತು ಶೇ.30ರಷ್ಟು ಯಾವುದೇ ಕಾರಣವಿಲ್ಲದೆ ಹೃದಯಾಘಾತವಾಗುತ್ತದೆ. ಈ ಪಟ್ಟಿಗೆ ಅತಿ ಒತ್ತಡವೂ ಇತ್ತೀಚಿಗೆ ಸೇರಿಕೊಂಡಿದೆ. ಇದು ಹೊಸ ಆರೋಗ್ಯ ಸಮಸ್ಯೆ. ಪ್ರತಿಯೊಬ್ಬರೂ ಇದರಲ್ಲಿ ಸಿಲುಕೊಂಡಿದ್ದಾರೆ. ಮಿತಿ ಮೀರಿದ ನಿರೀಕ್ಷೆ, ಆಪೇಕ್ಷಗಳೇ ಇದಕ್ಕೆ ಕಾರಣ ಎಂದರು.
ಮಕ್ಕಳ ಮೇಲೆಯೂ ಒತ್ತಡ ಶುರುವಾಗಿದೆ. ಕಲಿಕೆ, ಪಠ್ಯಕ್ರಮ, ಶಾಲಾ ಚಟುವಟಿಕೆಗಳ ಹೊರೆಯೇ ಇದಕ್ಕೆ ಕಾರಣ. ಆದ್ದರಿಂದ ಶಿಕ್ಷಣ ಪದ್ಧತಿಯಲ್ಲಿ ಬದಲಾವಣೆ ಮಾಡಬೇಕಿದೆ ಎಂದರು.
ಕೊಲೆಸ್ಟ್ರಾಲ್ನಿಂದ ಹೃದಯಾಘಾತ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತದೆ. ಇದು ಶರೀರದ ಮತ್ತು ರಕ್ತದಲ್ಲಿರುವ ಕೊಲೆಸ್ಟ್ರಾಲ್ಗೂ ಸಂಬಂಧವಿಲ್ಲ. ಭಾರತೀಯ ಜೀವನ ಬದಲಾವಣೆ ಆಗಿರುವುದು ಈ ಸಮಸ್ಯೆಯನ್ನು ಸೃಷ್ಟಿ ಮಾಡಿದೆ. ವಾಯುಮಾಲಿನ್ಯ ಮತ್ತು ಮಣ್ಣಿನ ಮಾಲಿನ್ಯದಿಂದಲೂ ಹೃದ್ರೋಗ, ಹೃದಯ ಸಂಬಂಧಿ ಕಾಯಿಲೆಗಳು ಉಂಟಾಗುತ್ತಿದೆ. ಡ್ರಗ್ಸ್, ಕೊಕೇನ್, ಗಾಂಜಾವೂ ಹೃದ್ರೋಗಕ್ಕೆ ರಹದಾರಿಯಾಗಿದೆ. ಆದ್ದರಿಂದ ಯುವ ಜನರು ಎಚ್ಚರಿಕೆ ವಹಿಸಬೇಕು ಎಂದರು.
ಪ್ರತಿವರ್ಷ ಮದುವೆ ವಾರ್ಷಿಕೋತ್ಸವ, ಜನ್ಮದಿನ ಆಚರಣೆ ಮಾಡಿಕೊಳ್ಳುವಂತೆ ಆರೋಗ್ಯ ತಪಾಸಣಾ ವಾರ್ಷಿಕೋತ್ಸವವನ್ನೂ ಮಾಡಿಕೊಳ್ಳಬೇಕು. ಬಿಪಿ, ಮಧುಮೇಹ, ಇಸಿಜಿ ಮಾಡಿಸಿಕೊಳ್ಳಬೇಕು. ರಕ್ತದೊತ್ತಡಕ್ಕೆ ಸಕಾಲಕ್ಕೆ ಚಿಕಿತ್ಸೆ ಪಡೆದುಕೊಳ್ಳದಿದ್ದರೆ 5ವರ್ಷದ ಬಳಿಕ ಪರಿಣಾಮ ಬೀರುತ್ತದೆ. ಆಗ ಪಾಶ್ವವಾಯು, ಕಿಡ್ನಿ, ಹೃದಯ ವಿಫಲತೆಗೆ ಕಾರಣವಾಗಲಿದೆ ಎಂದರು.
ನಮ್ಮ ಆರೋಗ್ಯ ನಮ್ಮ ಕೈಯಲ್ಲಿದೆ. ನಿತ್ಯ ವಾಕಿಂಗ್, ಉತ್ತಮ ನಿದ್ದೆ, ವಾರಕ್ಕೆ ಒಮ್ಮೆ ಉಪವಾಸ, ನಗು, ಉತ್ತಮ ಸ್ನೇಹಿತರೊಂದಿಗೆ ಒಡನಾಟ, ಹಣ್ಣು-ತರಕಾರಿ ಸೇವನೆ, ಸಕಾರಾತ್ಮಕ ಚಿಂತನೆಯೇ ಉತ್ತಮ ಔಷಧ ಎಂದು ತಿಳಿಸಿದರು.
ಪುನೀತ್ ಸಾವಿಗೆ ಅನುವಂಶೀಯ ಕಾರಣ:
ಅನುವಂಶೀಯ ಕಾರಣಗಳಿಂದ ಪುನೀತ್ರಾಜ್ಕುಮಾರ್ಗೆ ಹೃದಯಾಘಾತ ಉಂಟಾಗಿ ಮೃತಪಟ್ಟರು ಎಂದು ಡಾ.ಮಂಜುನಾಥ್ ವಿವರಿಸಿದರು. ಪುನೀತ್ ಸಹೋದರರಾದ ರಾಘವೇಂದ್ರ ರಾಜ್ಕುಮಾರ್, ಶಿವರಾಜ್ಕುಮಾರ್ ಇಬ್ಬರಿಗೂ ಹೃದಯ ಸಂಬಂಧಿ ತೊಂದರೆಗಳಿದ್ದು ಅದು ಅನುವಂಶಿಕವಾಗಿದೆ ಎಂದರು.
