ಯುಐಡಿ ಯೋಜನೆ ಜಾರಿ ನಿಧಾನಗತಿ

ಸುಭಾಸ ಧೂಪದಹೊಂಡ ಕಾರವಾರ

ಜಾನುವಾರುಗಳಿಗೆ ಗುರುತಿನ ಚೀಟಿ ನೀಡುವ ಯುಐಡಿ ಯೋಜನೆಯು ವಿವಿಧ ಕಾರಣಗಳಿಂದಾಗಿ ಜಿಲ್ಲೆಯಲ್ಲಿ ವಿಳಂಬವಾಗಿದೆ. 2017ರಲ್ಲೇ ರಾಜ್ಯದಲ್ಲಿ ಜಾರಿಯಾದ ಯೋಜನೆಯು ಜಿಲ್ಲೆಯಲ್ಲಿ ಇದುವರೆಗೂ ಶೇ. 50ರಷ್ಟು ಪ್ರಗತಿಯನ್ನೂ ಸಾಧಿಸಿಲ್ಲ.

ಜಿಲ್ಲೆಯಲ್ಲಿ ಒಟ್ಟಾರೆ 4,19,223 ಹಸು, ಎಮ್ಮೆ, ಮುಂತಾದ ಜಾನುವಾರುಗಳಿವೆ. ಇದುವರೆಗೆ ಜಿಲ್ಲೆಗೆ 1,30,800 ಕಾರ್ಡ್​ಗಳು ಪೂರೈಕೆಯಾಗಿದ್ದು, ಇದರಲ್ಲಿ ಶೇ. 86ರಷ್ಟು ಅಂದರೆ, 1,12,472 ಜಾನುವಾರುಗಳಿಗೆ ಗುರುತಿನ ಚೀಟಿ ಅಳವಡಿಸಲಾಗಿದೆ. ಇನ್ನೂ 3 ಲಕ್ಷಕ್ಕೂ ಅಧಿಕ ಜಾನುವಾರುಗಳಿಗೆ ಇದನ್ನು ಅಳವಡಿಸುವುದು ಬಾಕಿ ಇದೆ.

ಏನಿದು ಗುರುತಿನ ಚೀಟಿ?: ಮನುಷ್ಯರಿಗೆ ಆಧಾರ ಕಾರ್ಡ್ ನೀಡಿದಂತೆ ಜಾನುವಾರುಗಳಿಗೆ 12 ಅಂಕಿಗಳು ಹಾಗೂ ಬಾರ್ ಕೋಡ್ ಇರುವ ಪಾಲಿ ಯುರೇಥಿನ್ ಗುರುತಿನ ಚೀಟಿ ನೀಡುವ ಯೋಜನೆ ಇದಾಗಿದೆ. ಜಾನುವಾರುಗಳ ಕಿವಿಗೆ ಇದನ್ನು ಪಂಚ್ ಮಾಡಿ ಅಳವಡಿಸಲಾಗುತ್ತದೆ. ನಂತರ ಇನ್​ಫಾರ್ವೆಷನ್ ನೆಟ್​ವರ್ಕ್ ಫಾರ್ ಎನಿಮಲ್ ಪ್ರೊಡೆಕ್ಟಿವಿಟಿ ಆಂಡ್ ಹೆಲ್ತ್ (ಐಎನ್​ಎಪಿಎಚ್) ಎಂಬ ತಂತ್ರಾಂಶದಲ್ಲಿ ಅಳವಡಿಸಲಾಗುತ್ತದೆ. ಐಎನ್​ಎಪಿಎಚ್ ಹಾಗೂ ರಾಷ್ಟ್ರೀಯ ಡೇರಿ ಅಭಿವೃದ್ಧಿ ನಿಗಮ (ಎನ್​ಡಿಡಿಬಿ)ಯಿಂದ ಯೋಜನೆ ಜಾರಿಯಾಗುತ್ತಿದೆ.

ಪ್ರಯೋಜನ ಏನು?: ಇಡೀ ದೇಶದಲ್ಲಿ ಎಲ್ಲ ಜಾನುವಾರುಗಳ ಸಂಖ್ಯೆ ಆನ್​ಲೈನ್​ನಲ್ಲಿ ನೋಂದಣಿಯಾಗುತ್ತದೆ. ಪ್ರಾಣಿಗಳ ಕಳ್ಳತನವಾದಲ್ಲಿ ಹುಡುಕಬಹುದು. ಬಿಡಾಡಿ ದನಗಳ ಮಾಲೀಕರನ್ನು ಹುಡುಕಬಹುದು. ಎಲ್ಲಕ್ಕಿಂತ ಮುಖ್ಯವಾಗಿ ಮುಂದೆ ಜಾನುವಾರುಗಳು ಮೃತಪಟ್ಟರೆ ಅವುಗಳಿಗೆ ಪರಿಹಾರ, ಅವುಗಳಿಗೆ ಕೃತಕ ಗರ್ಭಧಾರಣೆ, ಔಷಧ ವಿತರಣೆ, ಹಾಲಿನ ಇಳುವರಿ ಹೆಚ್ಚಳಕ್ಕೆ ತಜ್ಞರ ಸಲಹೆಗಳು ಎಲ್ಲವಕ್ಕೂ ಈ ಯುಐಡಿ ಸಂಖ್ಯೆ ಕಡ್ಡಾಯವಾಗಲಿದೆ.

ವಿಳಂಬವೇಕೆ?: ಜಾನುವಾರುಗಳ ಮಾಲೀಕರು ಹಲವೆಡೆ ವಿರೋಧ ವ್ಯಕ್ತಪಡಿಸುತ್ತಿದ್ದಾರೆ. ಅವುಗಳ ಕಿವಿಗೆ ಹೊಡೆಯುವುದು ಬೇಡ ಕಾಲಿಗೆ ಕೊಡಿ ಎನ್ನುತ್ತಿದ್ದಾರೆ.
ಪಶು ಸಂಗೋಪನಾ ಇಲಾಖೆಯಲ್ಲಿ ಶೇ. 50ಕ್ಕಿಂತ ಹೆಚ್ಚು ಸಿಬ್ಬಂದಿ ಕೊರತೆ ಇದೆ.
ತಂಟೆ ಮಾಡುವ ಮಲೆನಾಡು ಗಿಡ್ಡದಂಥ ಸ್ಥಳೀಯ ತಳಿಯ ಹಸುಗಳಿಗೆ ಟ್ಯಾಗ್ ಅಳವಡಿಸುವುದು ದೊಡ್ಡ ಸವಾಲು.
ಯೋಜನೆಯ ಲಾಭಗಳ ಬಗ್ಗೆ ಜಾನುವಾರು ಮಾಲೀಕರಿಗೆ ಮಾಹಿತಿ ಇಲ್ಲದಿರುವುದು.