ಯಶಸ್ವಿಯಾಗಿ ಮುಕ್ತಾಯಗೊಂಡ ಆಹಾರ ಮೇಳ

*ನೆರೆದವರನ್ನು ರಂಜಿಸಿದ ಗಾಯನ ಕಾರ್ಯಕ್ರಮ

*ವೈವಿಧ್ಯಮಯ ಆಹಾರ ಸವಿದ ಜನರು

ಚಾಮರಾಜನಗರ:ಕಾಡಂಚಿನಲ್ಲಿರುವ ಮೂಕನಪಾಳ್ಯ ಸರ್ಕಾರಿ ಶಾಲೆಯ ಅಭಿವೃದ್ದಿಗಾಗಿ ರೋಟರಿ ಸಿಲ್ಕ್ ಸಿಟಿ ಆಯೋಜನೆ ಮಾಡಿದ್ದ ಆಹಾರ ಮೇಳ ಮತ್ತು ವಸ್ತು ಪ್ರದರ್ಶನ ಯಶಸ್ವಿಯಾಗಿ ಭಾನುವಾರ ಮುಕ್ತಾಯಗೊಂಡಿತು.

ನಗರದ ಶ್ರೀಸಿದ್ದಮಲ್ಲೇಶ್ವರ ವಿರಕ್ತ ಮಠದ ಅವರಣದಲ್ಲಿ ಎರಡು ದಿನಗಳು ಆಯೋಜಿಸಿದ್ದ ಆಹಾರ ಮೇಳ ಮತ್ತು ವಸ್ತು ಪ್ರದರ್ಶನಕ್ಕೆ ಅಂದಾಜು 10 ಸಾವಿರಕ್ಕೂ ಹೆಚ್ಚು ಜನರು ಭಾಗವಹಿಸುವ ಮೂಲಕ ಕಾರ್ಯಕ್ರಮಕ್ಕೆ ನಿರೀಕ್ಷೆಗೂ ಮೀರಿದ ಜನರು ಭೇಟಿ ನೀಡಿದರು. ಭಾನುವಾರವೂ ಹೆಚ್ಚಿನ ಸಂಖ್ಯೆಯಲ್ಲಿ ಭೇಟಿ ನೀಡಿದ ಜನರು, ಕುಟುಂಬ ಸಮೇತರಾಗಿ ಆಗಮಿಸಿ ಹತ್ತಾರು ಮಳೆಗೆಗಳಲ್ಲಿ ಇಷ್ಟವಾದ ಖಾದ್ಯಗಳನ್ನು ಸವಿದರು. ಯುವಕ ಮತ್ತು ಯುವತಿಯರು ಗುಂಪು ಗುಂಪಾಗಿ ವಸ್ತು ಪ್ರದರ್ಶನ ಮತ್ತು ಆಹಾರ ಮೇಳಕ್ಕೆ ಬಂದು ಇಷ್ಟದ ಅಗತ್ಯ ವಸ್ತುಗಳನ್ನು ಖರೀದಿಸಿದರು. ಎರಡು ದಿನಗಳು ಕೂಡ ಕಾರ್ಯಕ್ರಮಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಯಿತು.

ಸರ್ಕಾರಿ ಶಾಲೆಯನ್ನು ಅಭಿವೃದ್ದಿಪಡಿಸಲು ಆಯೋಜಿಸಿರುವ ಪುಣ್ಯದ ಕಾರ್ಯಕ್ಕೆ ವರುಣನು ಕೂಡ ಕೃಪೆ ತೋರಿದ ಎಂದು ಶ್ರೀ ಚನ್ನಬಸವಸ್ವಾಮೀಜಿ ಹೇಳಿದರು. ಶ್ರೀಸಿದ್ದಮಲ್ಲೇಶ್ವರ ವಿರಕ್ತ ಮಠದ ಅವರಣದಲ್ಲಿ ಆಯೋಜಿಸಿದ್ದ ಸಮಾರೋಪ ಸಮಾರಂಭದಲ್ಲಿ ಸಾನಿಧ್ಯ ವಹಿಸಿ ಮಾತನಾಡಿದರು. ಹವಾಮಾನ ಇಲಾಖೆಯವರು ಡಿ. 18 ರವರೆಗೆ ಮಳೆ ಇರುತ್ತದೆ ಎಂದು ಹೇಳಿದ್ದರು. ಆದರೆ ಒಳ್ಳೆಯ ಹಾಗು ಪುಣ್ಯದ ಕಾರ್ಯಕ್ಕೆ ದೇವರ ಕೃಪೆ ಸದಾ ಇರುತ್ತದೆ ಎಂಬುದಕ್ಕೆ ಇದು ಸಾಕ್ಷಿಯಾಗಿದೆ. ಬಹಳ ಉತ್ಸಾಹ ಹಾಗು ಶಿಸ್ತಿನಿಂದ ರೋಟರಿ ಸಿಲ್ಕ್ ಸಿಟಿ ತಂಡದವರು ಕಾರ್ಯಕ್ರಮ ಆಯೋಜನೆ ಮಾಡಿದ್ದಾರೆ. ಇನ್ನು ಹೆಚ್ಚಿನ ರೀತಿಯಲ್ಲಿ ಕಾರ್ಯಕ್ರಮಗಳು ನಡೆಯಲಿ ಎಂದರು.

ಈ ವೇಳೆ ಎದೆ ತುಂಬಿ ಹಾಡುವೆನು ಖ್ಯಾತಿಯ ಶ್ರೇಯ ಪಿ.ಜೈನ್ ಅವರು ಭಾವಗೀತೆ ಹಾಗೂ ಭಕ್ತಿಗೀತೆಗಳನ್ನು ಹಾಡಿ ರಂಜಿಸಿದರೆ. ಮೈಸೂರಿನ ಗುರುಸ್ವಾಮಿ ಅವರು ಮ್ಯಾಜಿಕ್ ಶೋ ಮೂಲಕ ಪುಟಾಣಿಗಳನ್ನು ಸಂತೋಷ ಪಡಿಸಿದರು. ರೋಟರಿ ಸಿಲ್ಕ್ ಸಿಟಿಯಿಂದ ಪ್ರಾಯೋಜಕರು ಹಾಗು ಮಳಿಗೆ ಹಾಕಿದ್ದ ಮಾಲೀಕರಿಗೆ ನೆನಪಿನ ಕಾಣಿಕೆಯನ್ನು ನೀಡಿ ಅಭಿನಂದಿಸಲಾಯಿತು.

ಕಾರ್ಯಕ್ರಮದಲ್ಲಿ ಪಡಗೂರು ಅಡವಿ ಮಠಾಧ್ಯಕ್ಷರಾದ ಶ್ರೀ ಉದ್ದಾನಸ್ವಾಮೀಜಿ, ಮೇಳದ ಕ್ಯಾಪ್ಟನ್ ಡಿ.ಪಿ. ವಿಶ್ವಾಸ್, ಉಪ ಕ್ಯಾಪ್ಟನ್ ಮುರುಗೇಂದ್ರಸ್ವಾಮಿ, ರೋಟರಿ ಸಿಲ್ಕ್ ಸಿಟಿ ಅಧ್ಯಕ್ಷ ಮಾಣಿಕ್ಯ ಚಂದ್ರ ಸೀರ್ವಿ, ಕಾರ್ಯದರ್ಶಿ ಶಮಿತ್ ಕುಮಾರ್, ಮಾಜಿ ಅಧ್ಯಕ್ಷರಾದ ದೊಡ್ಡರಾಯಪೇಟೆ ಗಿರೀಶ್, ಅಕ್ಷಯ್‌ಕುಮಾರ್, ಚೈತನ್ಯ ಜಿ. ಹೆಗಡೆ, ರಾಜೇಶ್, ಮಣಿಕಂಠ, ರಾಜು, ಶ್ರೀನಿಧಿ ಇತರರು ಹಾಜರಿದ್ದರು.