ಯಡನವನಾಡು ಗ್ರಾಮದಿಂದ ಬೇಳೂರುಬಾಣೆಯ ತನಕ ರಸ್ತೆಯ ಇಕ್ಕೆಲಗಳಲ್ಲಿ ಸಂಗ್ರಹವಾಗಿದ್ದ ಪ್ಲಾಸ್ಟಿಕ್ ಮತ್ತು ಬಾಟಲ್ಗಳನ್ನು ಸಿಬ್ಬಂದಿ ಸ್ವಚ್ಛಗೊಳಿಸಿದರು. ಆರ್ಎಫ್ಒ ಶೈಲೇಂದ್ರ ಮಾತನಾಡಿ, ಬೇಳೂರು ಗ್ರಾಮದಿಂದ ಯಡವನಾಡು ತನಕ ರಸ್ತೆಯ ಬದಿಯಲ್ಲಿ ಮೀಸಲು ಅರಣ್ಯವಿದ್ದು, 4 ಕಿ.ಮೀ. ತನಕ ಯಾವುದೇ ಕಟ್ಟಡ ಇಲ್ಲ. ವನ್ಯಪ್ರಾಣಿಗಳು ಸಂಚರಿಸುವ ಸ್ಥಳವಾಗಿರುವುದರಿಂದ ವಾಹನಗಳನ್ನು ನಿಲ್ಲಿಸುವುದನ್ನು ನಿಷೇಧಿಸಲಾಗಿದೆ. ಆದರೂ ಕೆಲ ಪ್ರವಾಸಿಗರು ವಾಹನಗಳನ್ನು ನಿಲ್ಲಿಸುತ್ತಾರೆ. ಪ್ಲಾಸ್ಟಿಕ್ ಮತ್ತು ಬಾಟಲ್ ಎಸೆಯುತ್ತಾರೆ. ಇವುಗಳನ್ನು ಪ್ರಾಣಿಗಳು ತಿಂದು ಅಸ್ವಸ್ಥಗೊಳುತ್ತಿವೆ. ಈ ಕಾರಣದಿಂದ ಸ್ವಚ್ಛತಾ ಕಾರ್ಯ ನಡೆದಿದೆ. ಈ ಬಗ್ಗೆ ಜಾಗೃತಿ ಮೂಡಿಸಲಾಗುತ್ತದೆ ಎಂದು ಹೇಳಿದರು.
