ಬೇಡಿಕೆ ಬೆಟ್ಟದಷ್ಟಿದೆ: ಕೃಷಿ ಉತ್ಪನ್ನಗಳಿಗೆ ಮೆಗಾ ಮಾರುಕಟ್ಟೆ, ಕಸದ ವಿಲೇವಾರಿಗೆ ವೈಜ್ಞಾನಿಕ ಘಟಕಗಳ ಸ್ಥಾಪನೆ, ಕುಡಿಯುವ ನೀರು ಪೂರೈಕೆ ಯೋಜನೆಗಳಿಗೆ ಅನುದಾನ. ಹೀಗೆ ಹತ್ತು ಹಲವು ಯೋಜನೆಗಳು ಬೇಕು ಎನ್ನುವುದು ಜಿಲ್ಲೆಯ ಜನತೆ ಬೇಡಿಕೆ.ಮೇಕೆದಾಟು ಯೋಜನೆ ಜಾರಿ, ಜಿಲ್ಲೆಯಲ್ಲಿ ಮಾವು ಮತ್ತು ತೆಂಗು, ಬಾಳೆ ಸಂಸ್ಕರಣಾ ಘಟಕದ ಬಗ್ಗೆ ಸರ್ಕಾರ ಘೋಷಣೆ ಮಾಡಿದೆಯಾದರೂ ಕಾರ್ಯರೂಪಕ್ಕೆ ಬಂದಿಲ್ಲ. ಜಿಲ್ಲಾ ಕೇಂದ್ರದಲ್ಲಿ ವ್ಯವಸ್ಥಿತವಾದ ಬಸ್ ನಿಲ್ದಾಣ ನಿರ್ಮಾಣಕ್ಕೆ ಬೇಕಾದ ಅನುದಾನವನ್ನು ಸರ್ಕಾರ ಒದಗಿಸಬೇಕಿದೆ. ಜಿಲ್ಲೆಯಲ್ಲಿ ವೈಜ್ಞಾನಿಕ ತ್ಯಾಜ್ಯ ಸಂಸ್ಕರಣಾ ಘಟಕಗಳ ಆರಂಭಕ್ಕೆ ಸರ್ಕಾರ ಘೋಷಣೆ ಮಾಡಬೇಕಿದೆ. ಅರ್ಕಾವತಿ, ವೃಷಭಾವತಿ ನದಿ ಶುದ್ಧೀಕರಣಕ್ಕೆ ಸರ್ಕಾರ ಧೃಢ ನಿರ್ಧಾರ ತಾಳಬೇಕಿದೆ. ಥೇಮ್ಸ್ ಮಾದರಿಯಲ್ಲಿ ಅರ್ಕಾವತಿ ದಡದ ಅಭಿವೃದ್ಧಿ ಪ್ರಸ್ತಾವವು ಈಗಾಗಲೇ ಸರ್ಕಾರದ ಮುಂದಿದೆ. ಮಂಚನಬೆಲೆ ಮತ್ತು ಕಣ್ವ ಜಲಾಶಯಗಳ ಕಾಲುವೆಗಳು ಸದ್ಯ ಬಳಕೆಗೆ ಬಾರದಂತೆ ಆಗಿವೆ. ಇವುಗಳ ನವೀಕರಣ ಆದಲ್ಲಿ ರೈತರಿಗೆ ಅನುಕೂಲ ಆಗಲಿದೆ.
