ಮೈಸೂರು: ಮೈಸೂರು ನಗರ ಮತ್ತು ಚಾಮುಂಡಿಬೆಟ್ಟ ಪ್ಲಾಸ್ಟಿಕ್ ಮುಕ್ತ ಪ್ರದೇಶವಾಗಬೇಕು. ಈ ಕೆಲಸ ಪ್ರಸಕ್ತ ದಸರಾಕ್ಕೂ ಮುನ್ನವೇ ಆಗಬೇಕು ಎಂದು ರಾಷ್ಟ್ರೀಯ ಹಸಿರು ನ್ಯಾಯಮಂಡಳಿಯ ರಾಜ್ಯ ಮಟ್ಟದ ಸಮಿತಿ ಅಧ್ಯಕ್ಷ, ನಿವೃತ್ತ ನ್ಯಾಯಮೂರ್ತಿ ಸುಭಾಷ್ ಬಿ.ಅಡಿ ಜಿಲ್ಲಾಡಳಿತಕ್ಕೆ ತಾಕೀತು ಮಾಡಿದರು.
ಕಸ ವಿಲೇವಾರಿ ಕುರಿತು ಜಿಲ್ಲಾ ಪಂಚಾಯಿತಿ ಸಭಾಂಗಣದಲ್ಲಿ ಶುಕ್ರವಾರ ಕರೆದಿದ್ದ ಅಧಿಕಾರಿಗಳ ಸಭೆಯಲ್ಲಿ ಮಾತನಾಡಿದರು. ಮೈಸೂರು, ಚಾಮುಂಡಿಬೆಟ್ಟವನ್ನು ಮಾದರಿ ಪ್ಲಾಸ್ಟಿಕ್ಮುಕ್ತ ಪ್ರದೇಶವಾಗಿ ರೂಪಿಸಬೇಕು. ಇದು ರಾಜ್ಯದ ಇತರ ಪ್ರವಾಸಿ, ಧಾರ್ಮಿಕ ತಾಣಗಳಿಗೂ ಪ್ರೇರಣೆ ಮತ್ತು ಮಾದರಿ ಆಗಬೇಕು ಎಂದರು.
ಚಾಮುಂಡಿಬೆಟ್ಟ ಧಾರ್ಮಿಕವಷ್ಟೇ ಅಲ್ಲ, ಜೀವವೈವಿಧ್ಯತೆಗಳ ತಾಣ. ಇಲ್ಲಿನ ಸೂಕ್ಷ್ಮಪರಿಸರವನ್ನು ಸಂರಕ್ಷಿಸುವಲ್ಲಿ ಕಾಳಜಿ ವಹಿಸಬೇಕಿದೆ. ಆದ್ದರಿಂದ ತಿರುಪತಿ ಮಾದರಿಯಲ್ಲಿ ಚಾಮುಂಡಿಬೆಟ್ಟದ ಪ್ರವೇಶದಲ್ಲಿ ಪ್ಲಾಸ್ಟಿಕ್ ಒಯ್ಯುವುದನ್ನು ತಡೆಯಬೇಕು. ಚೆಕ್ಪೋಸ್ಟ್ ತೆರೆದು ಪರಿಶೀಲಿಸಬೇಕು ಎಂದು ಸೂಚಿಸಿದರು.
ಲೈಸೆನ್ಸ್ ರದ್ದುಗೊಳಿಸಿ:
ಚಾಮುಂಡಿಬೆಟ್ಟದಲ್ಲಿ ಹೂವು ಖರೀದಿ ಮಾಡಿದಾಗ ನನಗೇ ಪ್ಲಾಸ್ಟಿಕ್ನಲ್ಲಿ ಅದನ್ನು ಹಾಕಿಕೊಟ್ಟರು. ಅಷ್ಟು ಸಲೀಸಾಗಿ ಇದು ಬಿಕರಿಯಾಗುತ್ತಿದೆ. ಅಲ್ಲಿನ ಗ್ರಾಮ ಪಂಚಾಯಿತಿ, ದೇವಸ್ಥಾನ ಮಂಡಳಿ ಸೇರಿದಂತೆ ಅಂಗಡಿ ಮುಂಗಟ್ಟುಗಳಲ್ಲಿ ಪ್ಲಾಸ್ಟಿಕ್ ಬಳಸದಂತೆ ಕ್ರಮವಹಿಸಬೇಕು. ಅದಕ್ಕಾಗಿ ಮೊದಲು ಅಲ್ಲಿರುವ ಬೀದಿ ಬದಿ ವ್ಯಾಪಾರಿಗಳನ್ನು ಗುರುತಿಸಿ, ಅವರಿಗೆ ಷರತ್ತುಬದ್ಧವಾಗಿ ಪರವಾನಗಿ ನೀಡಿ. ಒಂದು ವೇಳೆ, ನಿಯಮ ಉಲ್ಲಂಘಿಸಿದರೆ ಅವರ ಲೈಸೆನ್ಸ್ ರದ್ದುಗೊಳಿಸಬೇಕು ಎಂದು ನಿರ್ದೇಶಿಸಿದರು.
ಬೆಟ್ಟದಲ್ಲಿ ತ್ಯಾಜ್ಯ ಸಂಸ್ಕರಣೆಗೆ ಅವಕಾಶವಿಲ್ಲ:
ಚಾಮುಂಡಿಬೆಟ್ಟದ ಮೇಲೆ ವಿವಿಧ ಮೂಲಗಳಿಂದ ಸಂಗ್ರಹಿಸಿದ ತ್ಯಾಜ್ಯ ಸಂಸ್ಕರಣೆಗೆ ಅವಕಾಶವಿಲ್ಲ. ಹೀಗೆ ಮಾಡಿದರೆ ಅಲ್ಲಿನ ಪರಿಸರ ಹಾಳಾಗಲಿದೆ. ಜಲಮೂಲಕ್ಕೂ ಧಕ್ಕೆಯಾಗಲಿದೆ. ಬೆಟ್ಟದ ಕೆಳಭಾಗದಲ್ಲಿ ಅಥವಾ ನಗರಪಾಲಿಕೆ ಸೂಚಿಸುವ ಸ್ಥಳದಲ್ಲಿ ಕಸ ಹಾಕಿ. ಅದಕ್ಕೂ ಮುನ್ನ ಬೆಟ್ಟದ ಮೇಲಿರುವ ತ್ಯಾಜ್ಯ ಸಂಸ್ಕರಣೆಯ ಶೆಡ್ಡು ತೆರವುಗೊಳಿಸಬೇಕು ಎಂದು ಸೂಚಿಸಿದರು.
