ಮೈಸೂರು: ಸಾರ್ವಜನಿಕರ ತೆರಿಗೆ ಹಣದಲ್ಲಿ ಮೈಸೂರು ನಗರಾಭಿವೃದ್ಧಿ ಪ್ರಾಧಿಕಾರ (ಮುಡಾ)ದಿಂದ ನಗರದಲ್ಲಿ ನಿರ್ಮಿಸಿರುವ ಮಿನಿ ಮಾರುಕಟ್ಟೆಗಳು ಈಗ ನಿರುಪಯುಕ್ತವಾಗಿವೆ.
ವಿವಿಧ ಬಡಾವಣೆಯ 9 ಕಡೆ ಮಿನಿ ಮಾರುಕಟ್ಟೆಗಳನ್ನು ನಿರ್ಮಿಸಲಾಗಿದ್ದು, ಈಗ ಪಳೆಯುಳಿಕೆಗಳಂತೆ ನಿಂತಿವೆ. ಹಣ್ಣು, ತರಕಾರಿ ಸೇರಿದಂತೆ ಇನ್ನಿತರ ಉತ್ಪನ್ನಗಳನ್ನು ರೈತರಿಂದ ನೇರ ಗ್ರಾಹಕರಿಗೆ ಮಾರಾಟ ಮಾಡುವ ಉದ್ದೇಶದಿಂದ ಈ ಮಿನಿ ಮಾರುಕಟ್ಟೆಗಳನ್ನು ನಿರ್ಮಿಸಲಾಗಿದೆ.
ವಿಜಯನಗರ 2ನೇ ಹಂತ, ಶಕ್ತಿನಗರ, ಅರವಿಂದನಗರ, ಕಲ್ಯಾಣಗಿರಿನಗರ, ಶಾರದಾದೇವಿನಗರ, ಹೆಬ್ಬಾಳ ಮೂರನೇ ಹಂತದ ಸುಬ್ರಹ್ಮಣ್ಯನಗರ ಸೇರಿದಂತೆ ಒಂಬತ್ತು ಕಡೆ ಮಿನಿ ತರಕಾರಿ ಮಾರುಕಟ್ಟೆಗಳು ನಿರ್ಮಾಣಗೊಂಡಿವೆ. ಈಗ ಅವು ಬಳಕೆ ಆಗದಿರುವುದರಿಂದ ಗಿಡಗಂಟಿಗಳು ಬೆಳೆದುಕೊಂಡು ಸೊರಗಿವೆ. ಅಲ್ಲದೆ, ಈ ಕಟ್ಟಡಗಳು ಪುಂಡಪೋಕರಿಗಳು, ಕುಡುಕರು, ಜಾನುವಾರು, ನಾಯಿಗಳಿಗೆ ಆಶ್ರಯ ತಾಣವಾಗಿವೆ.
ಜನರು ಹೆಚ್ಚಾಗಿ ದೇವರಾಜ ಮಾರುಕಟ್ಟೆ, ವಾಣಿವಿಲಾಸ, ಮಂಡಿ, ಎಂ.ಜಿ.ರಸ್ತೆಯಲ್ಲಿರುವ ಮಾರುಕಟ್ಟೆಗಳಿಗೆ ದೂರದ ಬಡಾವಣೆಗಳಿಂದಲೂ ಬರುತ್ತಾರೆ. ಇದರಿಂದ ನಗರದ ಹೃದಯ ಭಾಗಗಳಲ್ಲಿ ಸಂಚಾರ ದಟ್ಟಣೆ ಉಂಟಾಗುತ್ತದೆ. ಹಬ್ಬ, ವಿಶೇಷ ದಿನಗಳಲ್ಲಿ ಜನರ ಬವಣೆ ಹೇಳತೀರದು.
ಹಾಗಾಗಿ, ಬಡಾವಣೆಗಳಲ್ಲಿ ನಿರ್ಮಿಸಿರುವ ಮಿನಿ ಮಾರುಕಟ್ಟೆಗಳಲ್ಲಿ ವ್ಯಾಪಾರ ಮಾಡುವಂತಾದರೆ ವಾಹನಗಳ ದಟ್ಟಣೆ, ಜನರ ಸಮಯವನ್ನು ಉಳಿಸಬಹುದು. ಆದರೆ ಮಾರುಕಟ್ಟೆಯ ಬಗ್ಗೆ ಪ್ರಚಾರ ನೀಡುವಂತಹ ಕನಿಷ್ಠ ಕೆಲಸವನ್ನು ಮುಡಾ ಅಧಿಕಾರಿಗಳು, ಜನಪ್ರತಿನಿಧಿಗಳು ಮಾಡುತ್ತಿಲ್ಲ ಎನ್ನುವ ಆರೋಪವಿದೆ. ಮಾರುಕಟ್ಟೆಗಳನ್ನು ಬಳಸಿಕೊಳ್ಳವಂತೆ ಮುಡಾ ಹಲವು ಪ್ರಯತ್ನಗಳನ್ನು ಮಾಡಿದರೂ, ತರಕಾರಿ ಮಾರಾಟಗಾರರು ಮತ್ತು ಖರೀದಿದಾರರ ಕೊರತೆಯಿಂದಾಗಿ ವಿಫಲವಾಗಿವೆ. ಜನರು ಸ್ಪಂದಿಸಿದರೆ ಹೆಚ್ಚು ಉಪಯೋಗವಾಗುತ್ತದೆ. ಮಿನಿ ಮಾರುಕಟ್ಟೆಗಳು ಉಪಯೋಗಕ್ಕೂ ಬರುತ್ತವೆ ಎನ್ನುವುದು ಅಧಿಕಾರಿಗಳ ವಾದವಾಗಿದೆ.
