ವಿಜಯವಾಣಿ ಸುದ್ದಿಜಾಲ ಆನೇಕಲ್
ಇಂಡ್ಲವಾಡಿಯಲ್ಲಿ ಗ್ರಾಮದೇವತಾ ಚಾರಿಟಬಲ್ ಟ್ರಸ್ಟ್ನಿಂದ ನವರಾತ್ರಿ ಉತ್ಸವ ಆಯೋಜಿಸಲಾಗಿತ್ತು.
ಗ್ರಾಮದ ವಿವಿಧ ದೇವತೆಗಳಿಗೆ ವಿಶೇಷ ಅಲಂಕಾರ ಮಾಡಲಾಗಿತ್ತು. ಭಾನುವಾರ ಕುಸ್ತಿ ಪಂದ್ಯ ವೀಕ್ಷಿಸಲು ಸುತ್ತಮುತ್ತ ಗ್ರಾಮಗಳ ಜನರು ಜಮಾಯಿಸಿದ್ದರು. ಕನಕಪುರ, ಬೆಂಗಳೂರು, ಮಳವಳ್ಳಿ, ಮೈಸೂರು, ಮಾಗಡಿ, ತುಮಕೂರು, ಮಂಡ್ಯ, ರಾಮನಗರ ಸೇರಿ ವಿವಿಧೆಡೆಯಿಂದ ಕುಸ್ತಿಪಟುಗಳು ಸ್ಪರ್ಧೆಯಲ್ಲಿ ಭಾಗವಹಿಸಿದ್ದರು. ಇಂಡ್ಲವಾಡಿ ಗ್ರಾಪಂ ಮುಂಭಾಗದ ಬಯಲಿನಲ್ಲಿ ಮಣ್ಣಿನ ಅಖಾಡದಲ್ಲಿ ಪೈಲ್ವಾನರು ಸಾಮರ್ಥ್ಯ ಪ್ರದರ್ಶಿಸಿದರು. ಮೈಯಿಗೆ ಮಣ್ಣನ್ನು ಬಳಿದುಕೊಂಡು ಎದುರಾಳಿಯನ್ನು ಹಣಿಯಲು ಸಜ್ಜಾಗಿದ್ದು ಗಮನಸೆಳೆಯಿತು. ಪ್ರೇಕ್ಷಕರು ಚಪ್ಪಾಳೆ, ಶಿಳ್ಳೆ ಹಾಕುವ ಮೂಲಕ ಪ್ರೋತ್ಸಾಹಿಸಿದರು. ಕುಸ್ತಿ ಪ್ರದರ್ಶನದಲ್ಲಿ ಕುಸ್ತಿಪಟುಗಳು, ವಿವಿಧ ಗರಡಿ ಮನೆಗಳ ಪೈಲ್ವಾನ್ರನ್ನು ಸನ್ಮಾನಿಸಲಾಯಿತು.
