ಮೇಲನಹಳ್ಳಿ ಗ್ರಾಮದ ಸರ್ಕಾರಿ ಭೂಮಿಯಲ್ಲಿ ಕೆಲವು ರೈತರು ಉಳುಮೆ ಮಾಡುತ್ತಿದ್ದು, ಫಾರ್ಮ್ ನಂ.57ರಲ್ಲಿ ಅರ್ಜಿಗಳನ್ನು ಸಲ್ಲಿಸಿದ್ದಾರೆ. ಸುಮಾರು 30 ವರ್ಷಗಳಿಂದ ಬೇಸಾಯ ಮಾಡಿಕೊಂಡಿದ್ದರೂ ಸಾಗುವಳಿ ಚೀಟಿ ದೊರೆತಿರಲಿಲ್ಲ. ಗ್ರಾಮದ ಪರಿಶಿಷ್ಟ ಜಾತಿ ನಿವೇಶನ ರಹಿತರು 5 ತಿಂಗಳ ಹಿಂದೆ ನಮಗೆ ಸರ್ಕಾರದಿಂದ ಯಾವುದೇ ನಿವೇಶನ ನೀಡಿಲ್ಲ. ಆದ್ದರಿಂದ ನಮಗೆ ಸರ್ಕಾರಿ ಬೀಳು ಭೂಮಿಯಲ್ಲಿ ನಿವೇಶನ ನೋಂದಾಯಿಸಿಕೊಡಿ ಎಂದು ಒತ್ತಾಯಿಸಿ ಪರ-ವಿರೋಧಗಳ ನಡುವೆ ಅನಧಿಕೃತವಾಗಿ 58 ಗುಡಿಸಲುಗಳನ್ನು ನಿರ್ಮಾಣ ಮಾಡಿಕೊಂಡಿದ್ದರು. ಇದರ ಬಗ್ಗೆ ರೈತರು ಮತ್ತು ಸ್ಥಳೀಯರಿಂದ ಬಂದ ದೂರುಗಳನ್ವಯ ಕಂದಾಯ ಇಲಾಖೆ ಅಧಿಕಾರಿಗಳು ಗುಡಿಸಲುಗಳನ್ನು ತೆರವು ಮಾಡುವಂತೆ ಸೂಚಿಸಿದ್ದರು. ಆದರೆ ನಿವೇಶನರಹಿತರು ನಮಗೆ ಆಶ್ರಯವಿಲ್ಲದೆ ಜೀವನ ಸಾಗಿಸುತ್ತಿದ್ದೇವೆ. ಆದ್ದರಿಂದ ಸರ್ಕಾರಿ ಬೀಳು ಭೂಮಿಲ್ಲಿ ವಸತಿ ಕಲ್ಪಿಸಿಕೊಡಬೇಕೆಂದು ಪಟ್ಟು ಹಿಡಿದಿದ್ದರಿಂದ ತೆರವು ಮಾಡಿರಲಿಲ್ಲ.
