ಬಳ್ಳಾರಿ : ಸಮಾಜ ಸೇವಕ ಎಸ್.ಕೆ. ಮೋದಿ, ಶ್ರೀ ಚಂದ್ರಮೌಳೇಶ್ವರ ಶಿವಾಚಾರ್ಯ ಸ್ವಾಮೀಜಿ ಅವರಿಗೆ ಮರಣೋತ್ತರ ಹಾಗೂ ನಟಿ ಉಮಾಶ್ರಿ ಅವರಿಗೆ ಇಲ್ಲಿನ ವಿಜಯನಗರ ಶ್ರೀ ಕೃಷ್ಣ ದೇವರಾಯ ವಿಶ್ವ ವಿದ್ಯಾಲಯವು ಗೌರವ ಡಾಕ್ಟರೇಟ್ ಪ್ರಧಾನ ಮಾಡಿದೆ.
ವಿವಿಯಲ್ಲಿ ಶುಕ್ರವಾರ ಆಯೋಜಿಸಿದ್ದ 12ನೇ ಘಟಿಕೋತ್ಸವದಲ್ಲಿ ಉನ್ನತ ಶಿಕ್ಷಣ ಸಚಿವ ಎಂ. ಸಿ. ಸುಧಾಕರ ಹಾಗೂ ವಿವಿ ಕುಲಪತಿ ಪ್ರೊ. ಎಂ. ಮುನಿರಾಜು ಪ್ರದಾನ ಮಾಡಿದರು.
ಔದ್ಯೋಗಿಕ ರಸಾಯನ ಶಾಸ್ತ್ರದಲ್ಲಿ ನಗರದ ಕೌಲಬಜಾರ್ ನಿವಾಸಿ ಪಿ. ಉಮಾ, ಖನಿಜ ಸಂಸ್ಕರಣದಲ್ಲಿ ಸಂಡೂರು ತಾಲೂಕಿನ ಸೋವೆನಹಳ್ಳಿಯ ಕೆ.ಬಿ. ನಾಗರಾಜ, ವಾಣಿಜ್ಯಶಾಸ್ತ್ರದಲ್ಲಿ ಸಿರುಗುಪ್ಪ ತಾಲೂಕಿನ ಉಡೇಗೊಳ ಗ್ರಾಮದ ದೌಲತ್ ಬಾನು ಅವರಿಗೆ ತಲಾ ಮೂರು ಚಿನ್ನದ ಪದಕ ಪಡೆದರು. ಕನ್ನಡ ವಿಭಾಗದಲ್ಲಿ ಹೊಸಪೇಟೆ ತಾಲೂಕಿನ ವ್ಯಾಸನಹಳ್ಳಿ ನಿವಾಸಿ ಎ.ಕೆ. ಹುಲಿಗೆಮ್ಮ , ರಸಾಯನ ಶಾಸ್ತ್ರ ಬಳ್ಳಾರಿ ತಾಲೂಕಿನ ಕುಡುತಿನಿಯ ಎ. ಪ್ರಿಯಾಂಕ, ಭೌತಶಾಸ್ತ್ರ ದಲ್ಲಿ ಕೊಪ್ಪಳ ನಿವಾಸಿ ಪೂಜಾ ಹಿರೇಹಾಳ್, ಸಮಾಜಶಾಸ್ತ್ರದಲ್ಲಿ ಸಂಡೂರಿನ ಆಕಾಶ ಕ್ಯಾಂಪ್ನ ನಿವಾಸಿ ಸಾಲುಂಕೆ ಮಿತ್ರಾ, ಬಿಎಸ್ಸಿ ಪದವಿಯಲ್ಲಿ ನಗರದ ನಿವಾಸಿ ಬಿ. ಪಿ. ಶ್ರೇಯಾ ತಲಾ ಎರಡು ಚಿನ್ನದ ಪದಕಗಳನ್ನು ಮುಡಿಗೇರಿಸಿಕೊಂಡಿದ್ದಾರೆ. ಒಟ್ಟಾರೆ ಘಟಿಕೋತ್ಸವದಲ್ಲಿ ಸ್ನಾತಕ ಮತ್ತು ಸ್ನಾತಕೋತ್ತರ ವಿವಿಧ ವಿಭಾಗಗಳ 42 ವಿದ್ಯಾರ್ಥಿಗಳು 53 ಚಿನ್ನದ ಪದಕಗಳನ್ನು ಮುಡಿಗೇರಿಸಿಕೊಂಡರು. 36 ಸಂಶೋಧನಾರ್ಥಿಗಳು ಡಾಕ್ಟರೇಟ್ ಪದವಿ ಹಾಗೂ ಎಲ್ಲ ವಿಭಾಗಗಳ ಸ್ನಾತಕ ಮತ್ತು ಸ್ನಾತಕೋತ್ತರ ಪದವಿಯಿಂದ 125 ವಿದ್ಯಾರ್ಥಿಗಳು ರ್ಯಾಂಕ್ ಪ್ರಮಾಣ ಪತ್ರ ಪಡೆದರು.
ಪ್ರಮುಖರಾದ ಕುಲಸಚಿವರಾದ ಎಸ್.ಎನ್. ರುದ್ರೇಶ್, ರಮೇಶ ಓಲೇಕಾರ್, ಪ್ರೊ. ಎಸ್. ಎಂ. ಶಿವಪ್ರಸಾದ್ ಇದ್ದರು.
