ನಿಲುವಾಗಿಲು ಗ್ರಾಮದ ದಾಸಪ್ಪ ಅವರ ಜೋಡೆತ್ತುಗಳು ಮೃತಪಟ್ಟಿದ್ದು, ಮಾಲೀಕ ಕಂಗಾಲಾಗಿದ್ದಾರೆ. ಸೋಮವಾರ ಸಂಜೆ ಮನೆ ಬಳಿ ಕಟ್ಟಿಹಾಕಲಾಗಿದ್ದ ಎತ್ತುಗಳಿಗೆ ನೀರಿಗೆ ಭತ್ತದ ಹೊಟ್ಟು ಹಾಕಿ ಕುಡಿಸಿದ್ದಾರೆ. ನೀರು ಕುಡಿದ ಸ್ವಲ್ಪ ಹೊತ್ತಿನಲ್ಲೇ ಎತ್ತುಗಳು ಒದ್ದಾಡಲಾರಂಭಿಸಿರುವುದನ್ನು ಕಂಡು ಗಾಬರಿಗೊಂಡ ರೈತ ದಾಸಪ್ಪ ಪಶುವೈದ್ಯ ಇಲಾಖೆಗೆ ನೀಡಿದ ಮಾಹಿತಿ ಮೇರೆಗೆ ಹುಣಸೂರು ಅರಣ್ಯ ಇಲಾಖೆಯ ವನ್ಯಜೀವಿ ವಿಭಾಗದ ಪಶು ವೈದ್ಯ ಡಾ.ರಮೇಶ್ ಬಂದು ತಕ್ಷಣವೇ ಚಿಕಿತ್ಸೆ ಆರಂಭಿಸಿ 20 ಬಾಟಲ್ನಷ್ಟು ಗ್ಲೂಕೋಸ್ ನೀಡಿದರಾದರೂ ಚಿಕಿತ್ಸೆ ಫಲಕಾರಿಯಾಗದೆ ರಾತ್ರಿ 10ರ ವೇಳೆಗೆ ಸಾವನ್ನಪ್ಪಿವೆ. ಕೃಷಿ ಮತ್ತು ಜೀವನಕ್ಕೆ ಆಧಾರವಾಗಿದ್ದ ಜೋಡೆತ್ತುಗಳ ಸಾವಿನಿಂದ ರೈತ ದಾಸಪ್ಪರ ಕುಟುಂಬ ಕಂಗಾಲಾಗಿ, ಕಣ್ಣೀರು ಹಾಕಿದ ದೃಶ್ಯ ಮನಮಿಡಿಯುವಂತಿತ್ತು.
