ಕಳಸ: ಹಿರೇಬೈಲ್ ಕೋರೆ ಗ್ರಾಮದ ಜ್ಯೋತಿಕುಮಾರ್ ಅವರ ಮೂತ್ರಪಿಂಡ ನಿಷ್ಕ್ರಿಯಗೊಂಡಿದ್ದು ಮೂತ್ರಪಿಂಡ ಬದಲಾವಣೆಗೆ ಧನಸಹಾಯದ ನಿರೀಕ್ಷೆಯಲ್ಲಿದ್ದಾರೆ. ವಾಹನ ಚಾಲಕ ಜ್ಯೋತಿಕುಮಾರ್ ಅವರ ಕಾಲುಗಳು ತಿಂಗಳ ಹಿಂದೆ ಊದತೊಡಗಿದ್ದು ಕಾರ್ಕಳ ಹಾಗೂ ಮಡಿಕೇರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದರೂ ವಾಸಿಯಾಗಲಿಲ್ಲ. ದೇರಳಕಟ್ಟೆ ಆಸ್ಪತ್ರೆಯೊಂದರಲ್ಲಿ ತಪಾಸಣೆ ಮಾಡಿಸಿದಾಗ ಮೂತ್ರಪಿಂಡಗಳು ನಿಷ್ಕ್ರಿಯಗೊಂಡಿರುವುದಾಗಿ ತಿಳಿಸಿದರು. ಇದರಿಂದಾಗಿ ಜ್ಯೋತಿಕುಮಾರ್ ಕುಟುಂಬ ಆಘಾತಕ್ಕೆ ಒಳಗಾಗಿದೆ. ಡಯಾಲಿಸಿಸ್ ಮಾಡಲಾಗುತ್ತಿದ್ದು ಜ್ಯೋತಿಕುಮಾರ್ ಅವರ ಮೂತ್ರಪಿಂಡ ಬದಲಾಯಿಸಬೇಕು ಅಥವಾ ಜೀವನ ಪರ್ಯಂತ ಡಯಾಲಿಸಿಸ್ ಮಾಡಿಸುತ್ತಿರಬೇಕು ಎಂದು ವೈದ್ಯರು ತಿಳಿಸಿದ್ದಾರೆ. ಮೂತ್ರಪಿಂಡ ನೀಡಲು ಜ್ಯೋತಿಕುಮಾರ್ ಕುಟುಂಬದ ಸದಸ್ಯರು ಮುಂದೆ ಬಂದಿದ್ದು ಇದಕ್ಕೆ ಸುಮಾರು 10 ಲಕ್ಷ ರೂಪಾಯಿ ವೆಚ್ಚವಾಗುತ್ತದೆ ಎಂದು ವೈದ್ಯರು ತಿಳಿಸಿದ್ದಾರೆ.
