ಮುಳ್ಳು ಪಲ್ಲಕ್ಕಿ ಪವಾಡ ಸಂಪನ್ನ

ಚಿತ್ರದುರ್ಗ: ತಾಲೂಕಿನ ದೊಡ್ಡ ಸಿದ್ಧವ್ವನಹಳ್ಳಿ ಆಂಜನೇಯ ಸ್ವಾಮಿಯ ಜಾತ್ರಾ ಮಹೋತ್ಸವದ ಅಂಗವಾಗಿ ಭಾನುವಾರ ನೂರಾರು ಭಕ್ತರ ಸಮ್ಮುಖದಲ್ಲಿ ಮುಳ್ಳು ಪಲ್ಲಕ್ಕಿ ಪವಾಡ ಜರುಗಿತು.

ಸ್ವಾಮಿಗೆ ವಿಶೇಷ ಪೂಜೆಯಾದ ಬಳಿಕ ನಡೆದ ಚಿಕ್ಕ ರಥೋತ್ಸವದಲ್ಲಿ ಭಕ್ತೋತ್ಸಾಹ ಹೆಚ್ಚಾಯಿತು. ರಥಕ್ಕೆ ಬೃಹದಾಕಾರದ ಹೂವಿನ ಹಾರಗಳಿಂದ ಅಲಂಕರಿಸಲಾಗಿತ್ತು. ಹಲವರು ತೇರು ಎಳೆದು ಭಕ್ತಿ ಸಮರ್ಪಿಸಿದರು. ಎಣ್ಣೆಗೆರೆ ಗ್ರಾಮಸ್ಥರಿಂದ ಎಡೆ ಪೂಜೆ ನೆರವೇರಿತು.

ದಾಸಪ್ಪನ ಉತ್ಸವ ನಂತರ ಇಂಗಳದಾಳ್ ಗ್ರಾಮಕ್ಕೆ ದೇವರ ಉತ್ಸವ ಮೂರ್ತಿ ಕರೆತರಲಾಯಿತು. ನಂತರ ಗ್ರಾಮದಲ್ಲಿ ನಡೆದ ಮುಳ್ಳು ಪಲ್ಲಕ್ಕಿ ಪವಾಡಕ್ಕೆ ಅನೇಕ ಭಕ್ತರು ಸಾಕ್ಷಿಯಾದರು.

ಸಂಜೆ 4ಕ್ಕೆ ಡಿ.ಎಸ್.ಹಳ್ಳಿಯ ತೋಪರದಾಸಪ್ಪನ ಗುಡಿ ಮುಂದೆ ತೋಪರಮಾಳಿಗೆ ಗ್ರಾಮಸ್ಥರಿಂದ ಮಣೆವು ಪೂಜೆ, 5ಕ್ಕೆ ದೊಡ್ಡಸಿದ್ಧವ್ವನಹಳ್ಳಿಯಲ್ಲೂ ಮುಳ್ಳು ಪಲ್ಲಕ್ಕಿ ಪವಾಡ, ರಾತ್ರಿ 8ಕ್ಕೆ ದೊಡ್ಡ ಎಡೆ ಪೂಜಾ ಕೈಂಕರ್ಯ ಜಾತ್ರಾ ಸಂಪ್ರದಾಯದಂತೆ ಶಾಸ್ತ್ರೋಕ್ತವಾಗಿ ನಡೆದವು.