ನಿಡ್ತ, ಮಾಲಂಬಿ, ಯಡವನಾಡು, ಜೇನಕಲ್ಲು ಬೆಟ್ಟದಲ್ಲಿ ಅಮೂಲ್ಯವಾದ ಜೀವಸಂಕುಲಗಳಿವೆ. ಬಿದಿರು ಒಂದಕ್ಕೊಂದು ಉಜ್ಜುವುದರಿಂದ ಬೆಂಕಿ ಉತ್ಪತಿಯಾಗುತ್ತದೆ. ವನ್ಯಮೃಗಗಳು ಕಲ್ಲಿನ ಮೇಲೆ ಜಿಗಿದಾಗ ಬೆಂಕಿ ಕಿಡಿಯಿಂದ ಬೆಂಕಿ ಹತ್ತಿಕೊಳ್ಳಬಹುದು. ತೇಗದ ಎಲೆಗಳು ಒಣಗಿ, ಉಷ್ಣಾಂಶ ಹೆಚ್ಚಾದಾಗ ಬೆಂಕಿ ಹತ್ತಿಕೊಂಡು ಕಾಳ್ಗಿಚ್ಚು ಉಂಟಾಗಬಹುದು. ಅಲ್ಲದೆ ಕಿಡಿಗೇಡಿಗಳು ಬೆಂಕಿ ಹಚ್ಚುವುದರಿಂದ, ಬೀಡಿ, ಸಿಗರೇಟಿನ ಕಿಡಿಯಿಂದಲೂ ಬೆಂಕಿ ಆವರಿಸುತ್ತದೆ.
ತೇಗ, ಹೊನ್ನೆ, ಬೀಟೆ, ಶ್ರೀಗಂಧ, ನಂದಿ, ಅರಿಸಿನ ತೇಗ, ಬಿಲ್ವರ್, ಬೂರುಗ, ತಡಸಲು, ಕಡಲ, ದಿಂಡಿಗ, ಮತ್ತಿ, ಹಸಿರುಗಣೆ ಇಂತಹ ಅನೇಕ ಜಾತಿಯ ಮರಗಳು ಮೀಸಲು ಅರಣ್ಯದಲ್ಲಿವೆ. ಅರಣ್ಯದೊಳಗಿರುವ ಅರಸಿಕೆರೆ, ಗಾರೇಕಟ್ಟೆಕೆರೆ, ಹೊನ್ನಕೆರೆ, ಸಜ್ಜಳ್ಳಿ ಕೆರೆಗಳಲ್ಲಿ ನೀರಿದ್ದು, ಅವುಗಳಲ್ಲಿ ಕಾಡುಪ್ರಾಣಿಗಳು ನೀರು ಕುಡಿಯುತ್ತಿವೆ. ಈ ಕಾರಣದಿಂದ ಕಾಡಾನೆಗಳು ಸೇರಿದಂತೆ ವನ್ಯಪ್ರಾಣಿಗಳು ವಲಸೆ ಹೋಗಿಲ್ಲ. ಕೆರೆಗಳಲ್ಲಿ ನೀರು ಬತ್ತಿ ಹೋದರೆ, ಕಾಡು ಪ್ರಾಣಿಗಳಿಗೂ ಕುಡಿಯುವ ನೀರನ್ನು ಸರಬರಾಜು ಮಾಡಬೇಕಾಗಬಹುದು. ಇದು ಸಾಧ್ಯವಾಗದಿದ್ದರೆ, ಕುಡಿಯುವ ನೀರು ಅರಸಿ, ಪ್ರಾಣಿಗಳು ಗ್ರಾಮಗಳ ಕಡೆ ವಲಸೆ ಬರಬಹುದು. ಒಂದೆರಡು ಇಂಚು ಮಳೆ ಸುರಿದರೆ, ಲಂಟಾನ, ಮರ-ಗಿಡಗಳು ಚಿಗುರಿ, ಕಾಳ್ಗಿಚ್ಚು ಆತಂಕದಿಂದ ಬಚವಾಗಬಹುದು. ಅಪರೂಪದ ಪ್ರಾಣಿ ಪಕ್ಷಿಗಳು ಬದುಕುಳಿಯಲಿವೆ ಎಂದು ಅರಣ್ಯ ಸಿಬ್ಬಂದಿ ಅಭಿಪ್ರಾಯಪಟ್ಟಿದ್ದಾರೆ.
