ಮಿಷನ್ ಮಿತವ್ಯಯ: ಶೇಕಡ 10 ಹುದ್ದೆ ಕಡಿತ, ಇಲಾಖೆ ವಿಲೀನಕ್ಕೂ ನಿರ್ಧಾರ

ಬೆಂಗಳೂರು: ರಾಜ್ಯ ಸರ್ಕಾರದ ಬದ್ಧವೆಚ್ಚಗಳ ಮೇಲಿನ ಹೊರೆ ಇಳಿಸಿ ಆಡಳಿತದಲ್ಲಿ ಸುಧಾರಣೆ ತರುವ ಉದ್ದೇಶದಿಂದ ಸರ್ಕಾರಿ ನೌಕರರ ಸಂಖ್ಯೆಯನ್ನು ಶೇ.10 ಕಡಿತ ಮಾಡಲು ಚಿಂತನೆ ನಡೆಸುವ ಮೂಲಕ ರಾಜ್ಯ ಸರ್ಕಾರ ಜೇನುಗೂಡಿಗೆ ಕಲ್ಲೆಸೆಯಲು ಮುಂದಾಗಿದೆ.

ಆಡಳಿತ ಸುಧಾರಣೆಗೆ ವೆಚ್ಚ ತಗ್ಗಿಸಲು ನೌಕರರ ಕಡಿತ, ಇಲಾಖೆಗಳ ವಿಲೀನ ಹಾಗೂ ಇತರ ವಿಚಾರಗಳ ಬಗ್ಗೆ ವರದಿ ನೀಡುವ ಸಂಬಂಧ ಕಂದಾಯ ಸಚಿವ ಆರ್. ಅಶೋಕ್ ಅಧ್ಯಕ್ಷತೆಯಲ್ಲಿ ರಚನೆಯಾಗಿರುವ ಸಚಿವ ಸಂಪುಟ ಉಪ ಸಮಿತಿ ಈ ನಿಟ್ಟಿನಲ್ಲಿ ಚರ್ಚೆ ಆರಂಭಿಸಿದೆ. ಅನೇಕ ಹುದ್ದೆ ಬಿಳಿಯಾನೆಗಳಾಗಿರುವ ಕಾರಣ ಇಲಾಖೆಗಳನ್ನೇ ವಿಲೀನಗೊಳಿಸುವ ಮೂಲಕ ಅಗತ್ಯ ಇರುವ ಕಡೆ ಸಿಬ್ಬಂದಿ ಬಳಸಿಕೊಂಡು ನೌಕರರ ಸಂಖ್ಯೆ ಕಡಿಮೆ ಮಾಡುವುದು ಉಪ ಸಮಿತಿಯ ನಿರ್ಧಾರವಾಗಿದೆ. ಬಹಳಷ್ಟು ಇಲಾಖೆಗಳಲ್ಲಿ ಅನಗತ್ಯ ಹುದ್ದೆ, ಆಪ್ತಶಾಖೆಗಳಿದ್ದು, ಅವುಗಳ ರದ್ದತಿ ಬಗ್ಗೆ ಚರ್ಚೆ ನಡೆದಿದೆ. ಈ ರೀತಿ ಮಾಡುವುದರಿಂದ ಹಿರಿಯ ಅಧಿಕಾರಿಗಳ ಕೊರತೆ ಎದುರಾದರೆ ನೌಕರರನ್ನು ಬಳಸಿಕೊಳ್ಳುವ ಬಗ್ಗೆ ಆಲೋಚನೆ ನಡೆದಿದೆ.

ಮಾಹಿತಿ ನೀಡದಿದ್ದರೆ ಛೀಮಾರಿ: ಇಲಾಖೆಗಳ ವಿಲೀನ, ಹುದ್ದೆಗಳ ಮರು ನಿಯೋಜನೆಗೆ ಸಂಬಂಧಿಸಿದಂತೆ ಎಲ್ಲ

ಅಧಿಕಾರಿಗಳಿಗೂ ಕಡಿವಾಣ: ಹಿರಿಯ ಅಧಿಕಾರಿಗಳದ್ದು ಆಡಿದ್ದೇ ಆಟ ಎಂಬಂತಾಗಿದೆ. ಅಧಿಕಾರಿಗಳ ಬಡ್ತಿಗೆ ಯಾವುದೇ ತೊಂದರೆ ಇಲ್ಲ. ಹಿಂದೆ ಕೇವಲ ಇಬ್ಬರು ಎಸಿಎಸ್​ಗಳು ಇರುತ್ತಿದ್ದರು. ಆದರೆ ಈಗ ಹದಿನೆಂಟು ಜನರಿದ್ದಾರೆ. ಅದೇ ರೀತಿ ಪೊಲೀಸ್ ಇಲಾಖೆಯಲ್ಲಿರುವ ಎಡಿಜಿಪಿಗಳೆಲ್ಲರಿಗೂ ಕೆಲಸ ಇಲ್ಲ. ಐಎಎಸ್ ಅಧಿಕಾರಿಗಳು ಒಬ್ಬೊಬ್ಬರು ಎರಡು, ಮೂರು ಇಲಾಖೆಗಳಲ್ಲಿ ಜವಾಬ್ದಾರಿ ಹೊಂದಿದ್ದಾರೆ.

ಇದರಲ್ಲಿ ಕೆಲವು ತಾವು ಜವಾಬ್ದಾರಿಯಲ್ಲಿರುವ ಎಲ್ಲ ಇಲಾಖೆಗಳ ವಾಹನ ಬಳಸುತ್ತಿರುವುದರಿಂದ ಇಂಧನ ವೆಚ್ಚ ಹೆಚ್ಚಾಗಿದೆ. ಹೆಂಡತಿ ಹಾಗೂ ಮಕ್ಕಳ ಬಳಕೆಗೂ ಕೆಲವರು ಸರ್ಕಾರಿ ವಾಹನ ಬಳಸುತ್ತಿರುವ ದೂರುಗಳಿವೆ. ಇದಕ್ಕೆ ಕಡಿವಾಣ ಹಾಕಲು ಉಪ ಸಮಿತಿ ನಿರ್ಧರಿಸಿದೆ.

ಹುದ್ದೆಗಳ ರದ್ದು ಹೇಗೆ?

ಇಲಾಖೆಗಳ ವಿಲೀನ ಮಾಡಿ ಅಗತ್ಯ ಇರುವ ಕಡೆ ಸಿಬ್ಬಂದಿ ನಿಯೋಜಿಸಿದ ಬಳಿಕ ಕಂಡು ಬರುವ ಅನಗತ್ಯ ಹುದ್ದೆ ರದ್ದು ಮಾಡಲಾಗುತ್ತದೆ. ಹಿಂದೆ ಕೆಲವು ಸಂದರ್ಭಗಳಲ್ಲಿ ರದ್ದು ಮಾಡಿರುವ ಉದಾಹರಣೆ ಇವೆ.

ಕಿರಿಯ ಸಹಾಯಕರ ಹುದ್ದೆ ರದ್ದು?

ಇ-ಆಫೀಸ್ ಜಾರಿಗೆ ತಂದಿರುವ ಹಿನ್ನೆಲೆಯಲ್ಲಿ ಸಚಿವಾಲಯದಲ್ಲಿರುವ 542 ಕಿರಿಯ ಸಹಾಯಕರ ಹುದ್ದೆ ರದ್ದು ಮಾಡುವಂತೆ ಮುಖ್ಯಮಂತ್ರಿಗಳ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ರವಿಕುಮಾರ್ ಸಿಬ್ಬಂದಿ ಮತ್ತು ಆಡಳಿತ ಸುಧಾರಣಾ ಇಲಾಖೆಗೆ ಸೂಚಿಸಿದ್ದಾರೆ. 542ರಲ್ಲಿ ಸದ್ಯ ಕೇವಲ 187 ಜನ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಆದರೆ, ರವಿಕುಮಾರ್ ಅವರ ಈ ನಡೆಯನ್ನು ಸಚಿವಾಲಯ ನೌಕರರ ಸಂಘ, ರಾಜ್ಯ ಸರ್ಕಾರಿ ನೌಕರರ ಸಂಘ ವಿರೋಧಿಸಿದ್ದವು. ಈ ನಿಲುವಿಗೆ ಸಿಎಂ ತಡೆ ಹಾಕಿದ್ದಾರೆ.

ಬದ್ಧ ವೆಚ್ಚ ಎಷ್ಟು?

ವೇತನಕ್ಕೆ 37291 (ಶೇ. 11)ಕೋಟಿ ರೂ.

ಪಿಂಚಣಿಗೆ 22211 (ಶೇ. 13.60)ಕೋಟಿ ರೂ.

ಬಡ್ಡಿ ಪಾವತಿ 22216 (ಶೇ. 19.20)ಕೋಟಿ ರೂ.

ಒಟ್ಟು ಬದ್ಧ ವೆಚ್ಚ 81718 (ಶೇ 13.80)ಕೋಟಿ ರೂ.

ಕಡತ ವಿಲೇವಾರಿ ಹಂತ ಕಡಿಮೆ

ರಾಜ್ಯದಲ್ಲಿ ಸದ್ಯ 7 ಹಂತದಲ್ಲಿ ನಡೆಯುತ್ತಿರುವ ಕಡತ ವಿಲೇವಾರಿಯನ್ನು 2 ಹಂತಕ್ಕೆ ಇಳಿಸುವುದು ಉಪ ಸಮಿತಿ ಉದ್ದೇಶವಾಗಿದೆ. ಅನೇಕ ಸಂದರ್ಭದಲ್ಲಿ ಹಣಕಾಸು ಇಲಾಖೆಗೆ ಅನಗತ್ಯವಾಗಿ ಕಳುಹಿಸುತ್ತಿದ್ದು, ಅದನ್ನು ತೆಗೆದು ಹಾಕಲಾಗುತ್ತದೆ. ಜಿಲ್ಲಾಧಿಕಾರಿಗಳಿಂದ ಬರುವ ಕಡತಗಳನ್ನು ನೇರವಾಗಿ ಉಪ ಕಾರ್ಯದರ್ಶಿ, ಪ್ರಧಾನ ಕಾರ್ಯದರ್ಶಿ ಮಾತ್ರ ನೋಡಿ ತೀರ್ವನಿಸುವಂತೆ ಮಾಡುವ ಬಗ್ಗೆ ಚರ್ಚೆಯಾಗಿದೆ. ಜಿಲ್ಲಾಧಿಕಾರಿಗಳಿಂದ ಬಂದ ನಂತರ ಕೆಳಹಂತದಿಂದ ಹೋಗುವ ಅಗತ್ಯವಿಲ್ಲ.

ರದ್ದತಿಗೆ ಒಪ್ಪದ ಡಿಪಿಎಆರ್

ಡಿಪಿಎಆರ್​ನ 53 ಹುದ್ದೆಗಳಿರುವ ಗೆಜೆಟೆಡ್ ಪ್ರೊಬೆಷನರ್ ಸಹಾಯಕ ಹುದ್ದೆಗಳು, 57 ಹಿರಿಯ ಶೀಘ್ರ ಲಿಪಿಗಾರರು, 408 ಶೀಘ್ರ ಲಿಪಿಗಾರರು, 313 ಟೈಪಿಸ್ಟ್, 542 ಕಿರಿಯ ಸಹಾಯಕರ ಹುದ್ದೆಗಳ ಅಗತ್ಯವಿದೆ ಎಂದೇ ಡಿಪಿಎಆರ್ ಉಪ ಸಮಿತಿಗೆ ಮಾಹಿತಿ ನೀಡಿದೆ.

ಹೇಗೆ ನಡೆಯುತ್ತದೆ ವಿಲೀನ ಪ್ರಕ್ರಿಯೆ?

• ಸರ್ಕಾರದಲ್ಲಿ ಸಚಿವಾಲಯಗಳ ಸಂಖ್ಯೆ ಹೆಚ್ಚಾಗಿದೆ. ಅವುಗಳನ್ನು ಕಡಿಮೆ ಮಾಡಿ ಒಂದೇ ವಿಷಯಕ್ಕೆ ಸಂಬಂಧಿಸಿದ ಸಚಿವಾಲಯ ವಿಲೀನಗೊಳಿಸಿ ಅಧಿಕಾರಿ ಹಾಗೂ ನೌಕರರ ಸಂಖ್ಯೆ ಕಡಿಮೆ ಮಾಡಲಾಗುತ್ತದೆ.
• ಹಿಂದುಳಿದ ವರ್ಗ, ಸಮಾಜ ಕಲ್ಯಾಣ, ಅಲ್ಪಸಂಖ್ಯಾತರ ಕಲ್ಯಾಣ ಸಚಿವಾಲಯಗಳನ್ನು ವಿಲೀನ ಮಾಡಲಾಗುತ್ತದೆ. ಒಬ್ಬರೇ ಪ್ರಧಾನ ಕಾರ್ಯದರ್ಶಿ ಇರುತ್ತಾರೆ. ಇಲಾಖೆಗಳಿಗೆ ಪ್ರತ್ಯೇಕ ಆಯುಕ್ತರನ್ನು ಮುಂದುವರಿಸಲಾಗುತ್ತದೆ
• ಸಾರ್ವಜನಿಕ ಉದ್ದಿಮೆ ಇಲಾಖೆಯನ್ನು ಕೈಗಾರಿಕಾ ಇಲಾಖೆಯಲ್ಲಿ ವಿಲೀನಗೊಳಿಸಿ ಪ್ರಧಾನ ಕಾರ್ಯದರ್ಶಿ ಹುದ್ದೆ ರದ್ದು, ಪ್ರಾದೇಶಿಕ ಆಯುಕ್ತರ ಹುದ್ದೆ ರದ್ದು, ಅಲ್ಲಿನ ಸಿಬ್ಬಂದಿ ಬೇರೆ ಕಡೆಗೆ ವರ್ಗಾವಣೆ
• ಕನ್ನಡ ಸಂಸ್ಕೃತಿ, ಪ್ರವಾಸೋದ್ಯಮ, ವಾರ್ತಾ, ಪತ್ರಗಾರ, ಯುವಜನ ಸೇವಾ ಮತ್ತು ಕ್ರೀಡೆಗೆ ಒಬ್ಬರೇ ಕಾರ್ಯದರ್ಶಿ. ಆಪ್ತಶಾಖೆಯ ಸಿಬ್ಬಂದಿ ಬೇರೆಡೆಗೆ ನಿಯೋಜನೆ
• ಕೃಷಿ, ತೋಟಗಾರಿಕೆ, ರೇಷ್ಮೆ ಇಲಾಖೆಗಳ ವಿಲೀನ, ಆರೋಗ್ಯ, ವೈದ್ಯಕೀಯ ಶಿಕ್ಷಣ ಇಲಾಖೆಗಳಿಂದ ಒಬ್ಬರೇ ಪ್ರಧಾನ ಕಾರ್ಯದರ್ಶಿ, ಪ್ರಾಥಮಿಕ, ಉನ್ನತ ಶಿಕ್ಷಣಕ್ಕೂ ಒಬ್ಬರೇ ಪ್ರಧಾನ ಕಾರ್ಯದರ್ಶಿ
• ಡಿಪಿಎಆರ್, ಆಡಳಿತ ಸುಧಾರಣೆ ಇಲಾಖೆಗಳ ವಿಲೀನ ಒಬ್ಬರೇ ಪ್ರಧಾನ ಕಾರ್ಯದರ್ಶಿ, ಪ್ರತಿ ಜಿಲ್ಲೆಯಲ್ಲಿ ಒಂದೊಂದು ವಿಷಯಕ್ಕೆ ಒಬ್ಬೊಬ್ಬ ಡಿಸಿಎಫ್​ಗಳಿದ್ದು, ಜಿಲ್ಲೆಗೆ ಒಬ್ಬರೇ ನೇಮಕ
• ಅಗತ್ಯ ಇಲ್ಲದ ಕಡೆ ಇರುವ ಮೀನುಗಾರಿಕೆ, ರೇಷ್ಮೆ ಇಲಾಖೆಗಳ ಕಚೇರಿ ರದ್ದು, ಸಿಬ್ಬಂದಿ ಬೇರೆಡೆಗೆ ವರ್ಗ

| ರುದ್ರಣ್ಣ ಹರ್ತಿಕೋಟೆ

https://www.vijayavani.net/alive-or-dead-family-of-deceased-covid-19-patient-cremates-body-ahmedabad-hospital-tells-his-health-is-improving/