ವಿಜಯವಾಣಿ ವಿಶೇಷ ಮೈಸೂರು
ಲಸಿಕೆ ವಂಚಿತರಿಗೆ ಲಚಿಕೆ ನೀಡುವ ಮಹಾ ಅಭಿಯಾನ ‘ಮಿಷನ್ ಇಂದ್ರಧನುಷ್’ಗೆ ಜಿಲ್ಲೆಯಲ್ಲಿ ಸಿದ್ಧತೆ ನಡೆದಿದ್ದು, ಸಮೀಕ್ಷೆಗೆ ಕ್ಷಣಗಣನೆ ಆರಂಭಗೊಂಡಿದೆ. ತಾಯಿ ಮತ್ತು ಮಗುವಿನ ಗಂಭೀರ ಕಾಯಿಲೆಗಳ ವಿರುದ್ಧ ಹೋರಾಡುವ ರೋಗನಿರೋಧಕ ಶಕ್ತಿ ಮತ್ತು ರಕ್ಷಣೆ ನೀಡುವ ಸಲುವಾಗಿ ಕೇಂದ್ರ ಸರ್ಕಾರದಿಂದ ಈ ಮಹಾ ಅಭಿಯಾನ ನಡೆಯುತ್ತಿದೆ.
ಜಿಲ್ಲೆಯಲ್ಲಿ ಮೂರು ಹಂತದಲ್ಲಿ ಲಸಿಕೆ ನೀಡಲಾಗುತ್ತಿದ್ದು, ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಹಾಗೂ ನಗರಪಾಲಿಕೆ ಸಹಯೋಗದಲ್ಲಿ ಮನೆ-ಮನೆ ಸರ್ವೆ ಕಾರ್ಯ ನಡೆಸಿ ಯಾರು ಲಸಿಕೆಯಿಂದ ವಂಚಿತರಾಗಿದ್ದಾರೆ ಎನ್ನುವ ಮಾಹಿತಿ ಕಲೆ ಹಾಕಲಾಗುತ್ತದೆ.
ಲಸಿಕೆ ಪಡೆಯದೆ ಬಿಟ್ಟು ಹೋದ ಐದು ವರ್ಷದೊಳಗಿನ ಮಕ್ಕಳು ಮತ್ತು ಗರ್ಭಿಣಿಯರಿಗೆ ಇಂದ್ರ ಧನುಷ್ ಅಭಿಯಾನದಲ್ಲಿ ನಿಗದಿತ ಲಸಿಕಾ ಕೇಂದ್ರಗಳಲ್ಲಿ ರಾಷ್ಟ್ರೀಯ ಸಾರ್ವತ್ರಿಕ ಲಸಿಕೆ ಕಾರ್ಯಕ್ರಮದಡಿ ಉಚಿತವಾಗಿ ಲಸಿಕೆ ನೀಡಲಾಗುವುದು. ಗಂಭೀರ ಕಾಯಿಲೆಗಳಾದ ಪೋಲಿಯೋ ಇನ್ನಿತರ ಕಾಯಿಲೆಗಳಿಂದ ರಕ್ಷಣೆ ಪಡೆಯಲು ಎರಡು ವರ್ಷದ ಮಕ್ಕಳು ಲಸಿಕೆ ಪಡೆಯುವುದು ಅತಿ ಮುಖ್ಯ. ಈ ರೋಗಗಳಿಂದ ಮರಣ ತಪ್ಪಿಸಲು ಎಲ್ಲ ಸಿದ್ಧತೆ, ಪರೀಕ್ಷೆಯೊಂದಿಗೆ ಈ ಲಸಿಕೆಯನ್ನು ನೀಡಲಾಗುತ್ತಿದೆ.
ಜಾಗತಿಕವಾಗಿ ತಲ್ಲಣಗೊಳಿಸಿದ ಕೋವಿಡ್ ಮಹಾಮಾರಿ ದಾಳಿಯ ಬಳಿಕ ಸಾಂಕ್ರಾಮಿಕ ಕಾಯಿಲೆಗಳಿಂದ ರಕ್ಷಿಸಲು ಸಜ್ಜುಗೊಳ್ಳುವಂತೆ ಮಾಡುವುದು ಈ ಕಾರ್ಯಕ್ರಮದ ಉದ್ದೇಶಗಳಲ್ಲಿ ಒಂದಾಗಿದೆ.
ಸಶಕ್ತ, ಆರೋಗ್ಯ ಭಾರತ ನಿರ್ಮಾಣಕ್ಕೆ ಮಿಷನ್ ಇಂದ್ರಧನುಷ್ ಯಶಸ್ವಿ ಅನುಷ್ಠಾನಕ್ಕಾಗಿ ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯವು ಯುನಿಸೆಫ್, ಡಬ್ಲು್ಲೃಎಚ್ಒ, ಅಂತಾರಾಷ್ಟ್ರೀಯ ರೋಟರಿ ಸೇರಿದಂತೆ ಇನ್ನಿತರ ಪಾಲದಾರರೊಂದಿಗೆ 2015ರಿಂದ ಮುನ್ನಡಿ ಇಟ್ಟಿದೆ.
ಅಭಿಯಾನವನ್ನು ಅರ್ಹರಿಗೆ ಮುಟ್ಟಿಸುವ ಉದ್ದೇಶದಿಂದ ಮುಂಚೂಣಿಯ ಆರೋಗ್ಯ ಕಾರ್ಯಕರ್ತರು, ಆಶಾ ಅಂಗನವಾಡಿ ಕಾರ್ಯಕರ್ತರು, ಪಾಲಿಕೆ ಸಿಬ್ಬಂದಿಯನ್ನು ಬಳಸಿಕೊಳ್ಳಲಾಗುತ್ತಿದೆ.
ಮನೆ-ಮನೆ ಸಮೀಕ್ಷೆ ಕಾಲದಲ್ಲಿ ಯಾವ ಮಕ್ಕಳು ಯಾವ ಲಸಿಕೆ ಎಷ್ಟು ಡೋಸ್ ಪಡೆದಿದ್ದಾರೆ, ಬಾಕಿ ಇರುವ ಲಸಿಕೆ ಯಾವುದು ಅಥವಾ ಒಂದೂ ಲಸಿಕೆ ಪಡೆಯದೆ ಇರುವ ಮಕ್ಕಳು ಎಷ್ಟು ಎನ್ನುವುದನ್ನು ಗುರುತಿಸಲಾಗುತ್ತದೆ.
ನಗರ ಪ್ರದೇಶ ಅಲ್ಲದೆ ಹೊರ ವಲಯಗಳು, ಮೊಹಲ್ಲಾ, ಕೊಳಗೇರಿ ಪ್ರದೇಶಗಳು, ಅಲ್ಲದೆ ದಡಾರ, ಗಂಟಲು ಮಾರಿ ಮತ್ತು ಧನುರ್ವಾಯು ಪ್ರಕರಣಗಳು ವರದಿಯಾದ ಪ್ರದೇಶಗಳು, ಹೆಚ್ಚು ಸಾಂಕ್ರಾಮಿಕ ರೋಗಗಳು ವರದಿಯಾಗುವ ಪ್ರದೇಶ, ಲಸಿಕೆಯನ್ನು ವಿರೋಧಿಸುವ ಪ್ರದೇಶಗಳಲ್ಲಿ ಈ ಅಭಿಯಾನವನ್ನು ಬಿರುಸಾಗಿ ನಡೆಸಲಾಗುತ್ತಿದೆ.
