ಮಾವು ಇಳುವರಿ ಭಾರೀ ಕುಸಿತ : ಈಗಿರುವುದು ಶೇ.30 ಮಾತ್ರ, ಮಳೆ, ಗಾಳಿ ಹೆಚ್ಚಾದರೆ ಅದೂ ಸಿಗಲ್ಲ, ಬಂಗಾರದ ಬೆಲೆ ಬರುವ ಸಾಧ್ಯತೆ

ಕಾರಂಗುಟ್ಟೆ ನಾರಾಯಣಸ್ವಾಮಿ ಕೋಲಾರ

ಜಿಲ್ಲೆಯಲ್ಲಿ ಈ ಬಾರಿ ಮಾವು ಫಸಲು ತೀರಾ ಕಡಿಮೆಯಾಗಿದೆ. ಹವಾಮಾನ ವೈಪರೀತ್ಯದಿಂದಾಗಿ ಶೇ.70ಕ್ಕೂ ಅಧಿಕ ಪ್ರಮಾಣದಲ್ಲಿ ಇಳುವರಿ ಕುಸಿತ ಕಂಡಿದೆ. ರಾಜ್ಯದ ಇತರ ಜಿಲ್ಲೆಗಳಲ್ಲೂ ಇದೇ ಪರಿಸ್ಥಿತಿ ಇದ್ದು, ಮುಂದಿನ ತಿಂಗಳು ಹಣ್ಣುಗಳು ಮಾರುಕಟ್ಟೆಗೆ ಬರಲಿದ್ದು, ಬೆಲೆ ದುಬಾರಿಯಾಗುವ ಸಾಧ್ಯತೆಯಿದೆ.

ಕಳೆದ ವರ್ಷ ಆಗಸ್ಟ್​ನಿಂದ ಡಿಸೆಂಬರ್​ ತನಕ ಎಡೆ ಬಿಡದೆ ಸುರಿದ ಮಳೆಯ ಪರಿಣಾಮ ಭೂಮಿಯಲ್ಲಿ ತೇವಾಂಶ ಹೆಚ್ಚಾಗಿದ್ದೇ ಇಂದಿನ ಈ ಪರಿಸ್ಥಿತಿಗೆ ಪ್ರಮುಖ ಕಾರಣ. ನವೆಂಬರ್​, ಡಿಸೆಂಬರ್​ನಲ್ಲಿ ಭೂಮಿಯಲ್ಲಿ ತೇವಾಂಶವಿಲ್ಲದೆ, ಬಿಸಿಲು ಚೆನ್ನಾಗಿದ್ದರೆ ಜನವರಿಯಲ್ಲಿ ಹೂವು ಚೆನ್ನಾಗಿ ಬಂದು ಮರಗಳಲ್ಲಿ ಕಾಯಿಗಳು ನಿಲ್ಲುತ್ತಿದ್ದವು. ಆದರೆ ಈ ಬಾರಿ ಹೂವು ಬಂದಾಗ, ಕಾಯಿ ಕಚ್ಚುವಾಗ ಮಳೆ, ಮಂಜು ಹೆಚ್ಚಾಗಿದ್ದರಿಂದ ಕಾಯಿಗಳ ಸಂಖ್ಯೆ ಕಡಿಮೆಯಾಗಿದೆ.

ಜಿಲ್ಲೆಯಲ್ಲಿ 50 ಸಾವಿರ ಹೆಕ್ಟೇರ್​ನಲ್ಲಿ ಮಾವು ಬೆಳೆಯಲಾಗಿದೆ. ವಾರ್ಷಿಕ ಐದರಿಂದ ಏಳೂವರೆ ಲಕ್ಷ ಟನ್​ ಇಳುವರಿ ನಿರೀಕ್ಷಿಸಲಾಗುತ್ತದೆ. ಮಾವು ಮಾರಾಟಕ್ಕೆ ರಾಜ್ಯದ ದೊಡ್ಡ ಮಾರುಕಟ್ಟೆ ಎನಿಸಿರುವ ಶ್ರೀನಿವಾಸಪುರದಲ್ಲಿ ವಾರ್ಷಿಕ 75 ಕೋಟಿ ರೂ.ಗೂ ಅಧಿಕ ವಹಿವಾಟು ನಡೆಯುತ್ತದೆ. ಆದರೆ ಈ ಬಾರಿ 50ರಿಂದ 60 ಸಾವಿರ ಟನ್​ ಇಳುವರಿ ಸಹ ನಿರೀಕ್ಷಿಸಲಾಗದು. ಜಿಲ್ಲೆಯಲ್ಲಿ ತೋತಾಪುರಿ ಶೇ.60, ಬಂಗಾನಪಲ್ಲಿ ಶೇ.10 ಪ್ರದೇಶದಲ್ಲಿ ಬೆಳೆಯಲಾಗಿದ್ದು, ಈ ಹಣ್ಣುಗಳು ಮೇ ಕಡೇ ವಾರದ ನಂತರ ಮಾರುಕಟ್ಟೆಗೆ ಬರುತ್ತವೆ. ಇದು ಜ್ಯೂಸ್​ಗೆ ಹೆಚ್ಚಾಗಿ ಸರಬರಾಜಾಗುತ್ತವೆ.

ಮಲ್ಲಿಕಾ, ರಸಪುರಿ, ಸಿಂಧೂರ, ಬಾದಾಮಿ, ದಶಾರಿ, ಕೇಸರ್​ ಮತ್ತಿತರ ತಳಿಗಳು ಈ ಬಾರಿ ಶೇ.10ಕ್ಕಿಂತ ಕಡಿಮೆ ಇಳುವರಿ ಇರುವುದರಿಂದ ಮಾವು ಪ್ರಿಯರು ಹಣ್ಣು ತಿನ್ನುವ ಆಸೆ ಬಿಡಬೇಕಾಗುತ್ತದೆ. ಹಣ್ಣುಗಳು ದೇಶದಲ್ಲಷ್ಟೇ ಅಲ್ಲದೆ, ಅಮೆರಿಕ, ಕೆನಡಾ, ದುಬೈ, ಯೂರೋಪ್​ಗೆ ರಫ್ತಾಗುತ್ತವೆ.

ಕಳೆದ ವರ್ಷ ಶೇ.50 ಸಲು ಬಂದಿತ್ತು. ಲಾಕ್​ಡೌನ್​ ಜತೆಗೆ ನೊಣದ ಕಾಟದಿಂದ ತೋಟಗಳಲ್ಲೇ ಹಣ್ಣುಗಳು ಕೊಳೆತುಹೋಗಿ ರೈತರು ಲಕ್ಷಾಂತರ ರೂ. ನಷ್ಟ ಅನುಭವಿಸಿದ್ದರು. ಈ ಬಾರಿ ಸಲು ಕೈಕೊಟ್ಟಿದ್ದು, ನಾಲ್ಕು ಕಾಸು ನೋಡುವ ರೈತನ ಆಸೆಗೆ ತಣ್ಣೀರೆರಚುವಂತೆ ವಾತಾವರಣ ಮಾಡಿದೆ. ಇನ್ನು ಗಾಳಿ ಮಳೆ ಹೆಚ್ಚಾದರೆ ಇರುವ ಕಾಯಿಗಳೂ ಉದುರುತ್ತವೆ. ಈ ತಿಂಗಳಲ್ಲಿ ಮಳೆ ಹೆಚ್ಚಾದರೆ ಕಾಯಿಗಳು ದಪ್ಪವಾಗಿ ಇಳುವರಿ ಸ್ವಲ್ಪಮಟ್ಟಿಗೆ ಹೆಚ್ಚಾಗುತ್ತಾದರೂ, ನೀರಿನಾಂಶ ಅಧಿಕವಾಗಿ ರುಚಿ ಕಳೆದುಕೊಳ್ಳುತ್ತವೆ. ಹಾಗಾಗಿ ಮಾವು ಈ ವರ್ಷ ರೈತ, ವ್ಯಾಪಾರಿ, ಗ್ರಾಹಕರಿಗೆ ಸಿಹಿಗಿಂತ ಕಹಿಯಾಗುವ ಸಾಧ್ಯತೆ ಹೆಚ್ಚಾಗಿದೆ.

ಏ.15, 16ರಂದು ಶ್ರೀನಿವಾಸಪುರ ಸೇರಿ ಜಿಲ್ಲೆಯ ಹಲವೆಡೆ ಬಿರುಗಾಳಿ ಸಹಿತ ಮಳೆಯಾಗಿದ್ದರಿಂದ ಮಾವು, ಪಪ್ಪಾಯ, ಟೊಮ್ಯಾಟೊ, ಹೂ ಸೇರಿ ಇತರ ತೋಟಗಾರಿಕೆ ಬೆಳೆಗಳು 54.60ಹೆಕ್ಟೇರ್​ನಲ್ಲಿ ಹಾನಿಗೊಳಗಾಗಿವೆ. ಸುಮಾರು 33ಲಕ್ಷದಷ್ಟು ಬೆಳೆನಷ್ಟ ಸಂಭವಿಸಿರುವ ಸಾಧ್ಯತೆಯಿದೆ. ಸರ್ಕಾರಕ್ಕೆ ಸಮೀಕ್ಷಾ ವರದಿ ಸಲ್ಲಿಸಲಾಗುವುದು ಎಂದು ತೋಟಗಾರಿಕೆ ಉಪನಿರ್ದೇಶಕಿ ಎಂ.ಗಾಯತ್ರಿ ತಿಳಿಸಿದ್ದಾರೆ.