ಮಳೆಗೆ ಕೊಚ್ಚಿ ಹೋದ ನಾಟಿ ಭತ್ತದ ಗದ್ದೆಗಳು

ಬೇಲೂರು: ತಾಲೂಕಿನಾದ್ಯಂತ ಸುರಿಯುತ್ತಿರುವ ಭಾರಿ ಮಳೆಯಿಂದಾಗಿ ಲಕ್ಷ್ಮೀಪುರ, ಎನ್.ನಿಡಗೋಡು ಗ್ರಾಮಗಳಲ್ಲಿ 10 ಎಕರೆಗೂ ಹೆಚ್ಚು ನಾಟಿ ಮಾಡಿದ್ದ ಭತ್ತದ ಗದ್ದೆ ನೀರಿನಲ್ಲಿ ಕೊಚ್ಚಿ ಹೋಗಿವೆ.

ತಾಲೂಕಿನ ಲಕ್ಷ್ಮೀಪುರ ಹಾಗೂ ಎನ್.ನಿಡಗೋಡು ಗ್ರಾಮಗಳ ಭಾಗದಲ್ಲಿರುವ 8ಕ್ಕೂ ಹೆಚ್ಚಿನ ಕೆರೆ ಕಟ್ಟೆಗಳು ಸಂಪೂರ್ಣ ಭರ್ತಿಯಾಗಿವೆ. ಲಕ್ಷ್ಮೀಪುರ ಗ್ರಾಮದ ಕೆರೆಯ ತಡೆಗೋಡೆ ಕುಸಿದ ಪರಿಣಾಮ ತಗ್ಗು ಪ್ರದೇಶದಲ್ಲಿದ್ದ ಜಮೀನುಗಳಿಗೆ ನೀರು ನುಗ್ಗಿದೆ. ನೀರು ಹೊರ ಹೋಗಲು ನಿರ್ಮಿಸಿದ್ದ ಕಾಲುವೆಯೂ ಒಡೆದು ನೀರು ಹರಿದಿದ್ದರಿಂದ ಕೆಲ ದಿನಗಳ ಹಿಂದಷ್ಟೆ ನಾಟಿ ಮಾಡಿದ್ದ ಭತ್ತದ ಗದ್ದೆ ಹಾಗೂ ನಾಟಿಗಾಗಿ ಮಡಿ ಮಾಡಿದ್ದ ಸಸಿಗಳು ಕೊಚ್ಚಿ ಹೋಗಿವೆ. ಅಲ್ಲದೆ ಗ್ರಾಮದಲ್ಲಿನ ಕಾಫಿ, ಬಾಳೆ ಬೆಳೆದಿದ್ದ ಜಮೀನುಗಳಿಗೂ ನೀರು ನುಗ್ಗಿದೆ. ಇದರಿಂದಾಗಿ ರೈತರಿಗೆ ಸಾಕಷ್ಟು ನಷ್ಟ ಸಂಭವಿಸಿ ಸಂಕಷ್ಟಕ್ಕೆ ಸಿಲುಕಿದ್ದಾರೆ.

ಲಕ್ಷ್ಮೀಪುರ ಗ್ರಾಮದ ರತ್ನಾ ಮಂಜೇಗೌಡ ಮಾತನಾಡಿ, ಜಮೀನಿನಲ್ಲಿ ಬೆಳೆ ಬೆಳೆಯುವುದಕ್ಕಾಗಿ ಕೈಸಾಲ, ಬ್ಯಾಂಕ್ ಸಾಲ ಮಾಡಿದ್ದು, ಒಂದು ತಿಂಗಳಿಂದ ಸುರಿಯುತ್ತಿರುವ ಭಾರಿ ಮಳೆಯಿಂದಾಗಿ ನಮ್ಮ ಗದ್ದೆ, ಹೊಲಗಳಲ್ಲಿ ಬೆಳೆದಿದ್ದ ಬೆಳೆಗೆ ನೀರು ನುಗ್ಗಿದ್ದರಿಂದ ಗಿಡಗಳೆಲ್ಲ ಕೊಳೆಯುತ್ತಿವೆ. ಎರಡು ದಿನಗಳಿಂದ ಬಿರುಸಾಗಿ ಬರುತ್ತಿರುವ ಮಳೆಯಿಂದ ಕೆರೆ ಕಟ್ಟೆಗಳು ತುಂಬಿ ನೀರು ಉಕ್ಕಿ ಜಮೀನಿನ ಮೇಲೆ ಹರಿಯುತ್ತಿರುವುದರಿಂದ ನಾಟಿ ಮಾಡಿದ್ದ ಭತ್ತದ ಗದ್ದೆ, ಮಡಿ ಸಸಿಗಳು ಸಂಪೂರ್ಣ ಕೊಚ್ಚಿ ಹೋಗಿವೆ. ಕಳೆದ ಬಾರಿಯೂ ಇದೇ ರೀತಿ ಆಗಿದ್ದರಿಂದ ತುಂಬ ತೊಂದರೆ ಅನುಭವಿಸಿದೆವು ಎಂದು ತಮ್ಮ ನೋವು ತೋಡಿಕೊಂಡರು.

ಬೇಲೂರು ತಾಲೂಕಿನ ಲಕ್ಷ್ಮೀಪುರ ಮತ್ತು ಎನ್.ನಿಡಗೋಡು ಗ್ರಾಮಗಳ ಕೆರೆ ಕಟ್ಟೆಗಳ ತಡೆಗೋಡೆ ಕೊಚ್ಚಿ ಹೋಗಿದ್ದರಿಂದ ಜಮೀನುಗಳ ಮೇಲೆಲ್ಲ ನಿರು ಹರಿಯುತ್ತಿರುವುದು.