ಮಳೆ ಬಿಡುವು ನೀಡುವುದರಿಂದ ಕೃಷಿ ಚಟುವಟಿಕೆ ಚುರುಕು

ಶಿಕಾರಿಪುರ: ನಾಲ್ಕು ದಿನಗಳಿಂದ ಮಳೆ ಬಿಡುವು ನೀಡಿರುವುದರಿಂದ ಕೃಷಿ ಚಟುವಟಿಕೆಗೆ ಚಾಲನೆ ದೊರಕಿದ್ದು ಬಹುತೇಕ ತಾಲೂಕಿನ ಎಲ್ಲ ಹೋಬಳಿಗಳಲ್ಲಿಯೂ ಬಿತ್ತನೆ ಕಾರ್ಯ ನಡೆಯುತ್ತಿದೆ. ಪ್ರತಿವರ್ಷ ಮೇ ಅಂತ್ಯ ಅಥವಾ ಜೂನ್ ಮೊದಲನೆ ವಾರದಲ್ಲಿ ಮೆಕ್ಕೆಜೋಳ ಬಿತ್ತನೆ ಮಾಡುತ್ತಿದ್ದರು. ಬಿತ್ತನೆಯ ನಂತರ ಮಳೆ ಒಂದು ವಾರ ಬಿಡುವು ಕೊಟ್ಟರೆ ಬೀಜ ಮೊಳಕೆಯೊಡೆಯಲು ಸಹಕಾರಿಯಾಗುತ್ತದೆ. ಆದ್ದರಿಂದ ಈಗ ಮಳೆಯಿಂದ ನೆಲ ಹದವಾಗಿರುವುದರ ಜತೆಗೆ ಮಳೆ ಬಿಡುವು ಕೊಟ್ಟಿರುವುದರಿಂದ ಬಹುತೇಕ ರೈತರು ಬಿತ್ತನೆಗೆ ಮುಂದಾಗಿದ್ದಾರೆ. ಯಾವಾಗಲೂ ಮುಂಗಾರಿನಲ್ಲಿ ಬಿತ್ತನೆ ಮಾಡುತ್ತಿದ್ದ ರೈತರು ಈ ಬಾರಿ ಪೂರ್ವ ಮುಂಗಾರಿನಲ್ಲಿಯೇ ಬಿತ್ತನೆ ಮಾಡುತ್ತಿದ್ದಾರೆ. ನಂತರ ಸ್ವಲ್ಪ ಪ್ರಮಾಣದಲ್ಲಿ ಮಳೆಯಾದರೂ ಮೆಕ್ಕೆಜೋಳಕ್ಕೆ ಸಮಸ್ಯೆ ಇರುವುದಿಲ್ಲ. ಹಿಂಗಾರು ಮಳೆ ಕೈಕೊಟ್ಟರೂ ಮೆಕ್ಕೆಜೋಳಕ್ಕೆ ಹೆಚ್ಚಿನ ತೊಂದರೆಯಾಗುವುದಿಲ್ಲ ಎಂಬ ನಂಬಿಕೆ ರೈತರದ್ದು. ಅಕಾಲಿಕ ಮಳೆಯಿಂದ ಮೆಕ್ಕೆಜೋಳ ಮತ್ತು ಭತ್ತ ಹಾಳಾಗುವ ಸ್ಥಿತಿ ಕಂಡು ಬಂದಿತ್ತು. ಮೆಕ್ಕೆಜೋಳ ಮುರಿದ ರೈತರು ಒಣಗಿಸಲಾರದೆ ಸಾಕಷ್ಟು ತೊಂದರೆ ಅನುಭವಿಸಿದ್ದರು. ಮೆಕ್ಕೆಜೋಳಕ್ಕೆ ಫಂಗಸ್ ಉಂಟಾಗಿರುವುದಲ್ಲದೆ ಕೆಲವು ಕಡೆಗಳಲ್ಲಿ ಮೊಳಕೆಯೊಡೆದಿವೆ. ರೈತರು ಈಗ ಬಿಸಿಲಿನಲ್ಲಿ ಮೆಕ್ಕೆಜೋಳವನ್ನು ಒಣಗಿಸುತ್ತಿದ್ದಾರೆ. ಆದರೂ ಮೆಕ್ಕೆಜೋಳಕ್ಕೆ ಮೊದಲಿನ ಗುಣಮಟ್ಟ ಸಿಗುವುದಿಲ್ಲ ಮತ್ತು ಬೆಲೆಯೂ ಸಿಗುವುದಿಲ್ಲ. ಬಣ್ಣ, ಗುಣಮಟ್ಟ ಕಡಿಮೆಯಾದರೆ, ಫಂಗಸ್ ಆಗಿದ್ದರೆ ಮಾರುಕಟ್ಟೆಯಲ್ಲಿ ಬೆಳೆಗೆ ಸೂಕ್ತವಾದ ಬೆಲೆ ದೊರೆಯುವುದಿಲ್ಲ. ಮಳೆಯಿಂದಾಗಿ ಬೇಸಿಗೆಯ ಭತ್ತವನ್ನು ಹೊಲದಲ್ಲಿಯೇ ಬಿಟ್ಟಿದ್ದ ರೈತರು ಈಗ ಕೊಯ್ಲು ಪ್ರಾರಂಭಿಸಿದ್ದಾರೆ. ಭತ್ತದ ಗದ್ದೆಗಳು ವರ್ಷದಿಂದ ವರ್ಷಕ್ಕೆ ಕಡಿಮೆಯಾಗಿ ಅಡಕೆ ತೋಟಗಳಾಗಿ ಮಾರ್ಪಾಟಾಗುತ್ತಿವೆ.