ಭೂಮಿ ಹುಣ್ಣಿಮೆಯ ಹಿಂದಿನ ದಿನ ಭೂಮಿ ಪೂಜೆಗಾಗಿ ಭರ್ಜರಿ ತಯಾರಿಯಲ್ಲಿ ಕೃಷಿಕರು ತೊಡಗುತ್ತಾರೆ. ಸಾಗುವಳಿ ಜಮೀನಿನ ಸಮೀಪ ಪೂಜೆ ಮಾಡಲು ಸ್ಥಳ ಮಟ್ಟಮಾಡಿ, ಸಗಣಿ ಸಾರಿಸಿ, ಎರಡು ಬಾಳೆಕಂಬಗಳು, ಮಾವಿನಸೊಪ್ಪಿನ ತೋರಣ ಹಾಗೂ ಬಣ್ಣ ಬಣ್ಣದ ಹೂಗಳಿಂದ ಅಲಂಕರಿಸಿ ಪುಟ್ಟ ಮಂಟಪ ಮಾಡಲಾಗುತ್ತದೆ. ಬೆಳಗಿನಜಾವ ಗದ್ದೆಗೆ ಪೂಜಿಸಲು ಬೇಕಾಗುವ ತೆಂಗಿನಕಾಯಿ, ಹೂಗಳು, ಅರಶಿಣ ಕುಂಕುಮ, ಹಾಲು ಮುಂತಾದ ಪೂಜಾ ಸಾಮಗ್ರಿಗಳನ್ನು ಜಮೀನಿನ ಬಳಿ ಇರಿಸಿ ಶಂಖನಾದ, ಜಾಗಟೆ, ಪಟಾಕಿ ಸಿಡಿಸಿ ಪೂಜೆ ನೆರವೇರಿಸಲಾಗುತ್ತದೆ. ನೂರಾಒಂದು ಜಾತಿಯ ಮರಗಿಡಗಳ ಸೊಪ್ಪಿನ ಪಲ್ಯ, ಬೆಲ್ಲ ಹಾಕಿ ಗೆಣಸು ಬೇಯಿಸಿ ತಯಾರಿಸಿದ ಸಿಹಿಪದಾರ್ಥ, ಪಾಯಸ, ಬಣ್ಣದ ಸೌತೆಕಾಯಿ ಪಲ್ಯ, ಚೀನಿಕಾಯಿ, ಸೋರೆಕಾಯಿ ಕಡಬು, ಸಾರು, ಅನ್ನ ಹೀಗೆ ವಿಶೇಷವಾಗಿ ತಯಾರಿಸಿದ ಅಡುಗೆಯನ್ನು ಸಾಗುವಳಿ ಗದ್ದೆಯ ಸಮೀಪವಿರಿಸಿ ಉತ್ತಮ ಸಲು ನೀಡಿ ನಮ್ಮನ್ನು ಕಾಪಾಡು ತಾಯಿ ಎಂದು ಕುಟುಂಬಸ್ಥರು ಭಕ್ತಿಯಿಂದ ಪ್ರಾರ್ಥನೆ ಮಾಡುತ್ತಾರೆ. ಮನೆಮಂದಿಗಾಗಿ ವಿಶೇಷ ಅಡುಗೆ ಮಾಡುತ್ತಾರೆ. ಕೃಷಿ ಚಟುವಟಿಕೆ ಮತ್ತು ನಿಸರ್ಗಕ್ಕೆ ಪೂಜನೀಯ ಸ್ಥಾನ ನೀಡಿವ ಮಲೆನಾಡಿಗರು ಆಧುನಿಕತೆಯ ಅಬ್ಬರದ ನಡುವೆ ಭೂಮಿಪೂಜೆ ಸಂಪ್ರದಾಯ ಮುಂದುವರಿಸುತ್ತಿದ್ದಾರೆ.
