ಮಧುಗಿರಿ: ಮಧುಗಿರಿಯಿಂದ ನೇರವಾಗಿ ಬೆಂಗಳೂರಿಗೆ ಬಸ್ ಸೌಕರ್ಯ ಕಲ್ಪಿಸಬೇಕು ಎಂಬ ತಾಲೂಕಿನ ಜನತೆಯ ಹಲವಾರು ವರ್ಷಗಳ ಬೇಡಿಕೆಗೆ ಮನ್ನಣೆ ದೊರೆತಿದ್ದು, ಮಧುಗಿರಿ ಕೆಎಸ್ಆರ್ಟಿಸಿ ಡಿಪೋದಿಂದ ಬೆಂಗಳೂರಿಗೆ ನೇರವಾಗಿ ನೂತನ ಬಸ್ ಮಾರ್ಗ ಕಲ್ಪಿಸಿದೆ. ಮಧುಗಿರಿಯಲ್ಲಿ ಡಿಪೋ ಪ್ರಾರಂಭವಾದರೂ ಬೆಂಗಳೂರಿಗೆ ಯಾವುದೇ ನೇರ ಬಸ್ ಸೌಕರ್ಯವಿರಲಿಲ್ಲ. ಪಾವಗಡದಿಂದ ಬೆಂಗಳೂರಿಗೆ ಸಂಚರಿಸುವ ಬಸ್ಗಳು ಮಧುಗಿರಿ ಮಾರ್ಗವಾಗಿ ಹೋಗುತ್ತಿದ್ದು, ಬಹಳಷ್ಟು ಬಸ್ಗಳು ಪಾವಗಡದಲ್ಲೇ ಭರ್ತಿಯಾಗುತ್ತಿದ್ದವು. ಇದರಿಂದ ಮಧುಗಿರಿಯ ಜನತೆ ಬೆಂಗಳೂರಿಗೆ ಪ್ರಯಾಣ ಮಾಡಬೇಕೆಂದರೆ ಯಾವುದೇ ಸೀಟ್ಗಳು ದೊರೆಯದೇ ಸುಮಾರು 4 ಗಂಟೆಗಳ ಕಾಲ ನೂಕು-ನುಗ್ಗಲಿನಲ್ಲಿ ನಿಂತುಕೊಂಡು, ಬಸ್ಗಳ ಡೋರ್ ಬದಿ ನಿಂತು ಓಲಾಡಿಕೊಂಡು ಬೆಂಗಳೂರು ತಲುಪುವ ವೇಳೆಗೆ ಹೈರಣಾಗುತ್ತಿದ್ದರು. ಮಹಿಳೆಯರು, ಮಕ್ಕಳು ಮತ್ತು ವೃದ್ಧರೂ ಇದಕ್ಕೆ ಹೊರತಾಗಿರಲಿಲ್ಲ. ಇದರಿಂದಾಗಿ ಮಧುಗಿರಿ ತಾಲೂಕಿನ ಜನತೆ ತೊಂದರೆ ಅನುಭವಿಸಿದ್ದರು.
