ರಾಜ್ಯದಲ್ಲಿ ಅಧಿಕ ಹುಲಿಗಳು, ಆನೆಗಳಿರುವ ಕಾಡು ಮತ್ತು ಇತರೆ ಪ್ರಾಣಿಗಳ ನೆಚ್ಚಿನ ನೆಲೆ ಬಂಡೀಪುರ ಹುಲಿ ಸಂರಕ್ಷಿತಾರಣ್ಯ ಪ್ರದೇಶದಲ್ಲಿ ಅಳಿವಿನಂಚಿನಲ್ಲಿರುವ ಕತ್ತೆ ಕಿರುಬ(ಹೈನಾ) ಮತ್ತೊಮ್ಮೆ ಕಾಣಿಸಿಕೊಂಡಿದೆ. ಬಂಡೀಪುರ ವ್ಯಾಘ್ರಗಳ ಆಗರವಾಗಿ ಖ್ಯಾತಿ ಪಡೆದಿದೆ. ಗಜಪಡೆಗಳ ಬಿಡಾರವಾಗಿ ಕೀರ್ತಿ ಗಳಿಸಿದೆ. ಚಿರತೆ, ಕರಡಿ, ಕಾಡೆಮ್ಮೆ, ಜಿಂಕೆ, ಕಡವೆ, ವಿವಿಧ ಪ್ರಬೇಧದ ಪಕ್ಷಿಗಳು, ಬಗೆ ಬಗೆಯ ಸಸ್ಯ, ಮರಗಳಿರುವ ಬಯಲು ಖಜಾನೆ ಬಂಡೀಪುರ. ಹಾಗೆಯೇ ಅಳಿವನಂಚಿನಲ್ಲಿರುವ ಜೀವಿಗಳಿಗೂ ತನ್ನೊಡಲಿನಲ್ಲಿ ಜಾಗ ಕೊಟ್ಟು ಕಾಪಾಡುತ್ತಿದೆ. ಇಂತಹ ಪ್ರಾಣಿಗಳಲ್ಲಿ ಕನ್ನಡದಲ್ಲಿ ಕತ್ತೆ ಕಿರುಬ ಕೂಡ ಒಂದು. ಇದು ಹಲವು ದಶಕಗಳ ಹಿಂದೆ ಬಂಡೀಪುರದಲ್ಲಿ ತನ್ನ ಇರುವಿಕೆಯಲ್ಲಿ ಖಚಿತ ಪಡಿಸಿ ಬಳಿಕ ಕಣ್ಮರೆಯಾಗಿತ್ತು. ಇದೀಗ ಮತ್ತೆ ಮತ್ತೆ ತನ್ನ ಅಸ್ವಿತ್ವವನ್ನು ತೋರಿಸುತ್ತಿದೆ. ಇದು ಕೆಲವು ದಿನಗಳ ಹಿಂದಷ್ಟೇ ಬಂಡೀಪುರದ ಕಾಡಂಚಿನ ಗ್ರಾಮವಾಗಿರುವ ಎಲಚೆಟ್ಟಿಯಲ್ಲಿ ಕತ್ತೆ ಕಿರುಬ ಕಾಣಿಸಿಕೊಂಡಿದೆ. ಗ್ರಾಮದ ಕೆರೆ ಬಳಿ ಕತ್ತೆ ಕಿರುಬ ಓಡಾಡುತ್ತಿದ್ದ ದೃಶ್ಯವನ್ನು ಸ್ಥಳೀಯರು ಸೆರೆ ಹಿಡಿದಿದ್ದಾರೆ. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಪರಿಸರ ಪ್ರೇಮಿಗಳಿಂದ ಅಪಾರ ಮೆಚ್ಚಿಗೆಗೆ ಪಾತ್ರವಾಗಿದೆ.
