ತಾಲೂಕಿನ ಕ್ಯಾದಗಿ, ಕೊರ್ಲಕೈ, ಕಾನಸೂರು, ದೊಡ್ಮನೆ ಪ್ರಾಥಮಿಕ ಆರೋಗ್ಯ ಕೇಂದ್ರದ ವ್ಯಾಪ್ತಿಯಲ್ಲಿ ಮಂಗನ ಕಾಯಿಲೆ ಹರಡುತ್ತಿರುವುದು ಜನರಲ್ಲಿ ಭಯ ಮೂಡಿಸಿದೆ. ಮುಖ್ಯವಾಗಿ ದೊಡ್ಮನೆ ಹಾಗೂ ಕೊರ್ಲಕೈ ಗ್ರಾಪಂ ವ್ಯಾಪ್ತಿಯಲ್ಲಿ ಹೆಚ್ಚು ಮಂಗನ ಕಾಯಿಲೆ ಕಾಣಿಕೊಂಡಿದೆ. ಶಿವಮೊಗ್ಗ ಹಾಗೂ ಉತ್ತರ ಕನ್ನಡ ಗಡಿಭಾಗದಲ್ಲಿರುವ ಕೊರ್ಲಕೈ ಪ್ರಾಥಮಿಕ ಆರೋಗ್ಯ ಕೇಂದ್ರ ವ್ಯಾಪ್ತಿಯ ಜೋಗಿನಮಠದಲ್ಲಿ ನಾಲ್ಕು ವರ್ಷದ ಬಾಲಕನಿಗೆ ಈಗಾಗಲೇ ಮಂಗನ ಕಾಯಿಲೆ ಕಾಣಿಸಿಕೊಂಡಿರುವುದರಿಂದ ಸುತ್ತ್ತನ ಜನತೆ ಭಯಗೊಂಡಿದ್ದಾರೆ. ಅದರಂತೆ ದೊಡ್ಮನೆ ಪ್ರಾಥಮಿಕ ಆರೋಗ್ಯ ಕೇಂದ್ರ ವ್ಯಾಪ್ತಿಯ ಮಾದಲಮನೆಯ ಯುವತಿಗೆ ಹಾಗೂ ಸಂಪೇಸರದಲ್ಲಿ ಓರ್ವ ಮಹಿಳೆಗೆ ಕೆಎಫ್ಡಿ ಖಚಿತವಾಗಿದೆ. ಮಂಗನ ಕಾಯಿಲೆ ಕಾಣಿಸಿಕೊಂಡಿರುವುದರಿಂದ ದೊಡ್ಮನೆ, ಕ್ಯಾದಗಿ, ಕೊರ್ಲಕೈ ಪ್ರಾಥಮಿಕ ಆರೋಗ್ಯ ಕೇಂದ್ರ ವ್ಯಾಪ್ತಿಯಲ್ಲಿ ಜನತೆ ತೋಟ ಗದ್ದೆಗಳಿಗೆ ಹೋಗುವುದಕ್ಕೂ ಮುಂದಾಗುತ್ತಿಲ್ಲ. ಮಳೆಗಾಲದ ಪೂರ್ವ ತಯಾರಿ ಮಾಡಿಕೊಳ್ಳುವುದಕ್ಕೆ ತೋಟದಲ್ಲಿ ಕೆಲಸ ಮಾಡುವುದಕ್ಕೆ ಆಗುತ್ತಿಲ್ಲ. ಒಂದೆಡೆ ಕರೊನಾ ಲಾಕ್ಡೌನ್ ಪಾಲನೆಗೆ ಸರ್ಕಾರದ ಸೂಚನೆ, ಇನ್ನೊಂದೆಡೆ ಮಂಗನ ಕಾಯಿಲೆ ಭಯದಿಂದ ಮನೆಯಲ್ಲಿಯೇ ಜನತೆ ಕಾಲಕಳೆಯುವಂತಾಗಿದೆ.
