ಶ್ರಾವಣ ಮಾಸದ ಪ್ರಯುಕ್ತ ಪಟ್ಟಣದ ಸಮೀಪದ ಕಾಲಕಾಲೇಶ್ವರಕ್ಕೆ ನಿತ್ಯ ಸಾವಿರಾರು ಭಕ್ತರು ಬರುತ್ತಾರೆ. ದೇವಸ್ಥಾನದ ಮೆಟ್ಟಿಲುಗಳ ಮೇಳೆ ಮಕ್ಕಳನ್ನು ಕೂಡಿಸಿ ಭಿಕ್ಷಾಟನೆ ಮಾಡಿಸುತ್ತಾರೆ. ಕೆಲವರಂತೂ ಭಿಕ್ಷೆ ಕೊಡುವವರೆಗೂ ಅವರನ್ನು ಮುಂದೆ ಹೋಗದಂತೆ ತಡೆಯುತ್ತಾರೆ. ತಾವರಗೆರೆ, ಹೊಸಪೇಟೆ, ಕುಷ್ಟಗಿ, ಇಲಕಲ್ಲ, ಕೊಪ್ಪಳ ಸೇರಿದಂತೆ ಜಿಲ್ಲೆಗಳಿಂದ ಮಹಿಳೆಯರು ಹಾಗೂ ಮಕ್ಕಳು ಭಿಕ್ಷೆ ಬೇಡಲು ಬರುತ್ತಾರೆ. ವಾರಗಳನ್ನು ಹಂಚಿಕೊಂಡಿರುವ ಭಿಕ್ಷುಕರು ಒಂದು ವಾರ ಒಂದು ಊರಿನವರು ಗಜೇಂದ್ರಗಡದಲ್ಲಿ ಭಿಕ್ಷೆ ಬೇಡಿದರೆ ಮತ್ತೊಂದು ವಾರ ಬೇರೆ ಗುಂಪು ಬಂದು ಇಲ್ಲಿ ಭಿಕ್ಷೆ ಬೇಡುತ್ತದೆ. ಈ ಬಗ್ಗೆ ಸಾರ್ವಜನಿಕರು ಮಕ್ಕಳ ಸಹಾಯವಾಣಿ 1098ಗೆ ಹಲವಾರು ಬಾರಿ ಕರೆ ಮಾಡಿದರೂ ಯಾವುದೇ ಪ್ರಯೋಜನವಾಗಿಲ್ಲ. ಸಂಬಂಧಪಟ್ಟ ಇಲಾಖೆಯವರಿಗೆ ಈ ಬಗ್ಗೆ ಮಾಹಿತಿ ನೀಡಿದರೂ ಮಕ್ಕಳ ರಕ್ಷಣೆಯಾಗುತ್ತಿಲ್ಲ. ಭಿಕ್ಷಾಟನೆಯಿಂದ ಸಾರ್ವಜನಿಕರಿಗೆ ಕಿರಿಕರಿ ಮಾತ್ರ ತಪ್ಪುತ್ತಿಲ್ಲ ಎನ್ನುತ್ತಾರೆ ಪಟ್ಟಣದ ವ್ಯಾಪಾರಿ ಪರಶುರಾಮ ಹಾಳಕೇರಿ.
