ಬೇಸಿಗೆ ಬೆಳೆಗಳಿಗೆ ಸಿಗುತ್ತಿಲ್ಲ ಬೆಲೆ

ಮಂಜುನಾಥ ಅಂಗಡಿ ಧಾರವಾಡ

ಕರೊನಾ ಲಾಕ್​ಡೌನ್ ಪ್ರತಿಯೊಬ್ಬರಿಗೂ ಬಿಸಿ ತಟ್ಟಿಸಿದೆ. ಮುಂಗಾರು ಪೂರ್ವ ಬೇಸಿಗೆಯಲ್ಲಿ ವಿವಿಧ ತರಕಾರಿ ಬೆಳೆದು ಲಾಭದ ಕನಸು ಕಂಡಿದ್ದ ರೈತರಿಗೆ ಭ್ರಮನಿರಸನವಾಗಿದೆ. ಬಿರು ಬೇಸಿಗೆಯಲ್ಲಿ ದುಡಿದು ತರಕಾರಿ ಬೆಳೆದ ರೈತರು ಬೆಲೆ ಇಲ್ಲದೆ ಕಂಗಾಲಾಗಿದ್ದಾರೆ. ಸಾಗಣೆ, ಮಾರಾಟದ ಜಂಜಾಟಕ್ಕೆ ಹೋಗದ ಅನೇಕ ರೈತರು ಬೆಳೆದು ನಿಂತ ತರಕಾರಿಯನ್ನು ಕಟಾವು ಮಾಡಲೂ ಮುಂದಾಗುತ್ತಿಲ್ಲ.

ಜಿಲ್ಲೆಯ ರೈತರು ಹಿಂಗಾರು ಜೋಳ, ಗೋಧಿ, ಹತ್ತಿ, ಗೋವಿನಜೋಳ ಒಕ್ಕಣೆಯ ನಂತರ ಮುಂಗಾರು ಪೂರ್ವ ಬೇಸಿಗೆ ಬೆಳೆಗಳನ್ನು ಬೆಳೆದಿದ್ದಾರೆ. ಮೆಣಸಿನಕಾಯಿ, ಟೊಮ್ಯಾಟೊ, ಬೆಂಡೆ, ಇತರ ಬೆಳೆಗಳನ್ನು ತಿಂಗಳುಗಟ್ಟಲೇ ದುಡಿದು ಬೆಳೆಸಿದ್ದಾರೆ. ಆದರೆ ಕರೊನಾ ಲಾಕ್​ಡೌನ್ ಘೊಷಣೆಯಾದಾಗಿನಿಂದ ಮಾರುಕಟ್ಟೆಗೆ ಹೋಗಲೂ ಹಲವಾರು ನಿರ್ಬಂಧಗಳನ್ನು ವಿಧಿಸಲಾಗಿದೆ. ಮೇಲಾಗಿ ತರಕಾರಿ ಬೆಳೆಗಳ ದರ ಪಾತಾಳಕ್ಕೆ ಕುಸಿದಿರುವುದರಿಂದ ಲಾಭಕ್ಕಿಂತ ಹಾನಿಯೇ ಹೆಚ್ಚು.

ಹಸಿ ಮೆಣಸಿನಕಾಯಿ ಕೇಳೋರಿಲ್ಲ: ಬಂದ್ ಪರಿಣಾಮ ಬೇಸಿಗೆಯಲ್ಲಿ ಬೆಳೆದ ಹಸಿ ಮೆಣಸಿನಕಾಯಿ ಕೇಳೋರಿಲ್ಲದಂತಾಗಿದೆ. ಮಾರ್ಚ್, ಏಪ್ರಿಲ್​ನಲ್ಲಿ ಪ್ರತಿ 10 ಕೆಜಿಗೆ ಗರಿಷ್ಠ 500- 600 ರೂ. ಸಿಗುತ್ತಿತ್ತು. ಸದ್ಯ ಮಾರುಕಟ್ಟೆಯಲ್ಲಿ 60 ರೂ.ಗೆ 10 ಕೆಜಿ ಮಾರಾಟವಾಗುತ್ತಿದೆ. ಕ್ವಿಂಟಾಲ್ ಕಾಯಿ ಕಟಾವು ಮಾಡಲು 200 ರೂ.ದಂತೆ ಕನಿಷ್ಠ 4 ಕೂಲಿ ಆಳುಗಳು ಬೇಕು. ಇನ್ನು ಸಾಗಣೆಗೆ ಬಾಡಿಗೆ, ದಲಾಲಿ, ಹಮಾಲಿ ಬೇರೆ. ಇದೆಲ್ಲವನ್ನು ಲೆಕ್ಕ ಹಾಕಿರುವ ರೈತರು, ಮೆಣಸಿನಕಾಯಿ ಕಟಾವು ಮಾಡುವುದನ್ನೇ ಬಿಟ್ಟಿದ್ದಾರೆ.

ಖರೀದಿ ಕಡಿಮೆ: ಲಾಕ್​ಡೌನ್ ಪರಿಣಾಮ ತರಕಾರಿ ಖರೀದಿ ಪ್ರಮಾಣ ಕಡಿಮೆಯಾಗಿದೆ. ದಿನಬಳಕೆಗೆ ಮಾತ್ರ ಖರೀದಿ ನಡೆಯುತ್ತಿರುವುದು ದರ ಕುಸಿತಕ್ಕೆ ಕಾರಣ. ವಿವಿಧ ಹಾಸ್ಟೆಲ್​ಗಳು, ಪಿಜಿಗಳು, ಹೋಟೆಲ್​ಗಳು ಆರಂಭವಾದರೆ ಸ್ಥಳೀಯವಾಗಿ ಮಾರಾಟ ಹೆಚ್ಚುತ್ತದೆ. ಆದರೆ ಎಲ್ಲವೂ ಬಂದ್ ಇರುವುದರಿಂದ ತರಕಾರಿಗೆ ಬೆಲೆ ಇಲ್ಲದಾಗಿದೆ. ಆದಾಗ್ಯೂ ಬಿಡಿ ಮಾರಾಟಗಾರರು ತರಕಾರಿಗಳನ್ನು ಕನಿಷ್ಠ 30 ರೂ.ಗೆ ಕೆಜಿಯಂತೆ ಮಾರಾಟ ಮಾಡುತ್ತಿದ್ದಾರೆ.