ಬೆಸ್ಕಾಂ, ಗ್ರಾಪಂ ಗುದ್ದಾಟ, ನೀರಿಗಾಗಿ ಗ್ರಾಮಸ್ಥರ ಪರದಾಟ

ಬಾಗೇಪಲ್ಲಿ: ಕೆಟ್ಟ ವಿದ್ಯುತ್ ಪರಿವರ್ತಕ ಅನ್ನು ಒಪ್ಪಿಸಿ ಹೊಸ ವಿದ್ಯುತ್ ಪರಿವರ್ತಕ ತೆಗೆದುಕೊಂಡು ಬರಲು ವಾಹನದ ಬಾಡಿಗೆ ಮತ್ತು ಖರ್ಚಿನ ವಿಚಾರವಾಗಿ ಬೆಸ್ಕಾಂ ಹಾಗೂ ಗ್ರಾಮ ಪಂಚಾಯಿತಿ ಪರಸ್ಪರ ನಿಂದನೆ, ಆರೋಪಗಳಲ್ಲಿಯೇ ಕಾಲಹರಣ ಮಾಡುತ್ತಿದ್ದು, ಎರಡು ಗ್ರಾಮಗಳ 200 ಕುಟುಂಬಗಳು ಕುಡಿಯುವ ನೀರಿಗಾಗಿ 6 ತಿಂಗಳಿನಿಂದ ಪರಿತಪಿಸುತ್ತಿವೆ.

ತಾಲೂಕಿನ ರಾಶ್ಚೇರುವು ಗ್ರಾಪಂ ವ್ಯಾಪ್ತಿಯ ದೋರಣಾಲಪಲ್ಲಿ, ಕದಿರನ್ನಗಾರಿಕೋಟೆ ಗ್ರಾಮ ಮತ್ತು ಕಾಲನಿಯಲ್ಲಿ 200 ಕುಟುಂಬಗಳು ವಾಸವಾಗಿದೆ, ಈ ಗ್ರಾಮಗಳಿಗೆ ಕುಡಿಯುವ ನೀರು ಸರಬರಾಜು ಮಾಡುವ ಸಾರ್ವಜನಿಕ ಕೊಳವೆಬಾವಿಗೆ ವಿದ್ಯುತ್ ಪೂರೈಕೆಯ ವಿದ್ಯುತ್ ಪರಿವರ್ತಕ ಕೆಟ್ಟು 6 ತಿಂಗಳಾಗಿದೆ. ಆದರೆ ಇದರತ್ತ ಬೆಸ್ಕಾಂ ಇಲಾಖೆಯಾಗಿಲಿ, ಗ್ರಾಮ ಪಂಚಾಯಿತಿಯಾಗಲಿ ತಿರುಗಿಯೂ ನೋಡಿಲ್ಲ.

ಬೆಸ್ಕಾಂ ಹಾಗೂ ಗ್ರಾಪಂ ಮುಸುಕಿನ ಗುದ್ದಾಟದಲ್ಲಿ ಹೈರಾಣಾಗಿರುವ ಗ್ರಾಮಸ್ಥರು ವಿದ್ಯುತ್ ಪರಿವರ್ತಕ ರಿಪೇರಿ ಮಾಡುವಂತೆ ಎರಡೂ ಇಲಾಖೆಗೆ ಹಲವು ಬಾರಿ ಮನವಿ ಮಾಡಿದರೂ ಪ್ರಯೋಜನವಾಗಿಲ್ಲ. ಇವರನ್ನ ಕೇಳಿದರೆ ಅವರತ್ತ, ಇವರನ್ನ ಕೇಳಿದರೆ ಅವರತ್ತ ಬೆರಳು ತೋರಿಸುತ್ತ ಕಾಲಹರಣ ಮಾಡುತ್ತಿದ್ದಾರೆ, ಕೊನೆಗೆ ಕುಡಿಯುವ ನೀರಿಗಾಗಿ ಗ್ರಾಮಸ್ಥರು ಖಾಸಗಿ ಕೊಳವೆಬಾವಿ ಮಾಲೀಕರನ್ನು ಕಾಡಿಬೇಡಿ ಕುಡಿಯುವ ನೀರು ತಂದುಕೊಳ್ಳುತ್ತಿದ್ದಾರೆ.