ಲಿಂಗಾಯತ ಸಮುದಾಯದ ಮುಖಂಡರಿಗೆ ಅನ್ಯಾಯ, ಪಂಚಮಸಾಲಿ ಸಮುದಾಯದ ತೀವ್ರ ಹೋರಾಟ ನಡೆದಾಗ, ಸಕಾಲಕ್ಕೆ ಬಿಜೆಪಿ ರಾಜ್ಯ ನಾಯಕರಿಂದ ಸ್ಪಂದನೆ ದೊರೆಯದ ಕಾರಣ, ಅತಿಹೆಚ್ಚು ವಿಧಾನಸಭೆ ಕ್ಷೇತ್ರಗಳನ್ನು ಹೊಂದಿರುವ ಬಿಜೆಪಿ ಭದ್ರಕೋಟೆ ಕುಸಿದು ಬಿದ್ದಿತು. ಕೆಎಲ್ಇ ಕಾರ್ಯಾಧ್ಯಕ್ಷ ಡಾ.ಪ್ರಭಾಕರ ಕೋರೆ ಅವರಿಗೆ ರಾಜ್ಯಸಭೆ ಟಿಕೆಟ್ ತಪ್ಪಿಸಿದ ಬಳಿಕ, ಡಾ.ಕೋರೆ ಅವರ ಜನ್ಮ ದಿನಾಚರಣೆಗೆ ಬೆಳಗಾವಿಗೆ ಆಗಮಿಸಿದ್ದ ಕೇಂದ್ರ ಸಚಿವರೊಬ್ಬರು, ಶೀಘ್ರದಲ್ಲಿಯೇ ಭಾರತೀಯ ಜನತಾ ಪಕ್ಷವೂ ಡಾ.ಪ್ರಭಾಕರ ಕೋರೆ ಅವರಿಗೆ ಸೂಕ್ತ ಸ್ಥಾನ ಮಾನ ನೀಡಲಿದೆ ಎಂದು ಹೇಳಿ ವರ್ಷವಾದರೂ, ಯಾವುದೇ ಸ್ಥಾನ ನೀಡಲಿಲ್ಲ. ಹಾಗಾಗಿ ಬಿಜೆಪಿಯಲ್ಲಿ ಲಿಂಗಾಯತ, ಕುರುಬ ಹಾಗೂ ತಳಸಮುದಾಯಗಳಿಗೆ ಹೆಚ್ಚಿನ ಆದ್ಯತೆ ನೀಡುತ್ತಿಲ್ಲ ಎಂಬ ಧೋರಣೆಯಿಂದಾಗಿ, ಮತದಾರರು ‘ಕೈ’ಗೆ ಒಲವು ತೋರಿಸಿದ್ದರಿಂದ ಈ ಬಾರಿಯ ವಿಧಾನಸಭೆ ಚುನಾವಣೆಯಲ್ಲಿ ಬಿಜೆಪಿ ಹೀನಾಯ ಸೋಲು ಅನುಭವಿಸಿದೆ. ಬಿಜೆಪಿಯಲ್ಲಿಯೂ ಜಾರಕಿಹೊಳಿ ಬಣ, ಕಡಾಡಿ ಬಣ ಹೀಗೆ ನಾಲ್ಕೈದು ಬಣಗಳಿಂದಾಗಿ ಬಿಜೆಪಿ ‘ಭಣ-ಭಣ’ ಎನ್ನುವಂತಾಗಿದೆ. 18 ಸ್ಥಾನಗಳಲ್ಲಿ 7 ಜನ ಮಾತ್ರ ಬಿಜೆಪಿಯಿಂದ ಗೆಲ್ಲಲು ಸಾಧ್ಯವಾಯಿತು.
