ವಿಭಜನೆ ಅನಿವಾರ್ಯತೆ: 50 ಲಕ್ಷಕ್ಕೂ ಹೆಚ್ಚು ಜನಸಂಖ್ಯೆ ಹೊಂದಿರುವ ಬೆಳಗಾವಿಯಲ್ಲಿ 18 ಶಾಸಕರು, ಮೂವರು ಸಂಸದರು, 33 ನಗರ ಸ್ಥಳೀಯ ಸಂಸ್ಥೆಗಳು, 90 ಜಿಪಂ ಹಾಗೂ 245 ತಾಪಂ ಕ್ಷೇತ್ರಗಳಿದ್ದು, 500ಕ್ಕೂ ಅಧಿಕ ಗ್ರಾಪಂಗಳಿವೆ. ಬೆಳಗಾವಿ, ಚಿಕ್ಕೋಡಿ ಹಾಗೂ ಬೈಲಹೊಂಗಲ ಎಂದು ಮೂರು ಉಪವಿಭಾಗಗಳಾಗಿ ಜಿಲ್ಲಾಡಳಿತದಿಂದ ಆಡಳಿತ ನಡೆಯುತ್ತಿದೆ. ಆದರೆ, ಕಾಗವಾಡ, ಅಥಣಿ ಸೇರಿ ಗಡಿ ತಾಲೂಕಿನ ಜನ ಜಿಲ್ಲಾ ಕೇಂದ್ರಸ್ಥಾನಕ್ಕೆ ಬರಲು 200ಕ್ಕೂ ಅಧಿಕ ಕಿ.ಮೀ. ದೂರ ಕ್ರಮಿಸಬೇಕಿರುವುದು ದೊಡ್ಡ ಸಮಸ್ಯೆಯಾಗಿದೆ. ಆಯಾ ಪ್ರದೇಶಗಳಲ್ಲೇ ಪ್ರಮುಖ ಕಚೇರಿಗಳು ಕಾರ್ಯಾರಂಭಗೊಂಡು ಅಧಿಕಾರಿಗಳು ಲಭ್ಯವಾದರೆ ಸರ್ಕಾರಿ ಯೋಜನೆಗಳ ಸೌಲಭ್ಯಗಳು ಸಕಾಲಕ್ಕೆ ದೊರಕುತ್ತವೆ ಎಂಬ ಲೆಕ್ಕಾಚಾರದಿಂದ ಬೆಳಗಾವಿ ಜಿಲ್ಲೆ ವಿಭಜನೆಗೆ ದಶಕಗಳಿಂದ ಹೋರಾಟ ನಡೆದಿದೆ.
