ಬಿಮ್ಸ್ನಲ್ಲಿ ಕರೊನಾ ಚಿಕಿತ್ಸೆಗೆಂದು 300 ಬೆಡ್ ವ್ಯವಸ್ಥೆ ಮಾಡಲಾಗಿದೆ. ಆದರೆ, ಕಳೆದ ನಾಲ್ಕೈದು ದಿನಗಳಿಂದ ಪ್ರತಿ ದಿನವೂ 500ಕ್ಕಿಂತ ಹೆಚ್ಚು ಜನರು ಕರೊನಾ ಸೋಂಕಿಗೆ ತುತ್ತಾಗಿ ಜಿಲ್ಲಾಸ್ಪತ್ರೆಗೆ ಬರುತ್ತಿದ್ದಾರೆ. ಆದರೆ, ಬೆಡ್ ಕೊರತೆಯಿಂದಾಗಿ ದಿನವೂ 200ಕ್ಕೂ ಅಧಿಕ ಜನರು ಚಿಕಿತ್ಸೆಗೂ ಕ್ಯೂ ನಿಲ್ಲುವಂತಾಗಿದೆ. ಪರಿಸ್ಥಿತಿ ಎಷ್ಟು ಹೀನಾಯ ಹಂತ ತಲುಪುತ್ತಿದೆಯೆಂದರೆ, ಹೊಸ ಕರೊನಾ ಪೀಡಿತರು ಚಿಕಿತ್ಸೆಗಾಗಿ ಬೆಡ್ ಪಡೆಯಲು ಕೆಟ್ಟ ಆಶಯ ಮಾಡುವಂತಾಗಿದೆ. ಆಸ್ಪತ್ರೆಯೊಳಗೆ ಚಿಕಿತ್ಸೆಗೆ ಪಡೆಯುತ್ತಿರುವ ಯಾರಾದರೂ ಸೋಂಕಿತರು ಬೇಗನೆ ಮೃತಪಡಲಿ ಎಂದು ಬಯಸುವಂತಾಗಿದೆ. ಏಕೆಂದರೆ, ಯಾರಾದರೂ ಮೃತಪಟ್ಟರೆ ಮಾತ್ರ ಇವರಿಗೆ ಬೆಡ್ ಸಿಗುವ ಸಂದರ್ಭ ಬಂದೊದಗುತ್ತಿದೆ.
