ಬಿಸಿಯೂಟ ನೌಕರರಿಗೆ ಸರ್ಕಾರ ಮೂರು ತಿಂಗಳಿಗೊಮ್ಮೆ ವೇತನ ನೀಡುತ್ತದೆ. ಪ್ರಸ್ತುತ ಜೂನ್ 1ಕ್ಕೆ ಮೂರು ತಿಂಗಳು ಪೂರ್ಣವಾಗಿದೆ. ಆದರೆ, ಇನ್ನೂ ಸಂಬಳ ನೀಡಿಲ್ಲ. ಲಾಕ್ಡೌನ್ ಕಾರಣ ಆರ್ಥಿಕ ಸಂಕಷ್ಟದಲ್ಲಿ ಇರುವವರಿಗೆ ಸರ್ಕಾರ ಪ್ಯಾಕೇಜ್ ಘೊಷಿಸಿದೆ. ಆದರೆ, ಈ ನೌಕರರಿಗೆ ನೀಡಿಲ್ಲ. ಉತ್ತರ ಕನ್ನಡ ಜಿಲ್ಲೆಯಲ್ಲಿ ಅಂಗವಿಕಲರು, ವಿಧವೆಯರು, ಪತಿಯಿಂದ ದೂರವಾಗಿರುವವರು, ವೃದ್ಧೆಯರು ಹೀಗೆ ಆರ್ಥಿಕವಾಗಿ ಹಿಂದುಳಿದವರೇ ಬಿಸಿಯೂಟ ನೌಕರರಾಗಿ ಕೆಲಸ ಮಾಡುತ್ತಿದ್ದಾರೆ. ಮುಖ್ಯ ಅಡುಗೆ ಸಿಬ್ಬಂದಿಯು 2,700 ರೂ., ಅಡುಗೆ ಸಹಾಯಕರು 2,600 ರೂ. ಮಾಸಿಕ ವೇತನ ಪಡೆಯುತ್ತಿದ್ದರು. ಈ ಎಲ್ಲ ಸಿಬ್ಬಂದಿಯಿಂದ ಜಿಲ್ಲೆಗೆ ಅಂದಾಜು 1.06 ಕೋಟಿ ರೂ.ಗಳಷ್ಟು ಅನುದಾನ ಬಿಡುಗಡೆಯಾಗಬೇಕಿದೆ.
