ಪ್ರಸಕ್ತ ಮುಂಗಾರು ಹಂಗಾಮಿನಲ್ಲಿ ಮುಳಗುಂದ ವ್ಯಾಪ್ತಿಯಲ್ಲಿ ಬೆಳೆದ ಹೆಸರು, ಗೆಜ್ಜೆಶೇಂಗಾ, ಅಲಸಂದಿ, ಗುರೆಳ್ಳು ಮತ್ತಿತರ ಬೆಳೆಗಳು ಕಟಾವಿಗೆ ಬಂದಿವೆ. ಆದರೀಗ ನಿರಂತರ ಮಳೆಯಿಂದಾಗಿ ಪೈರು ಹಾಳಾಗುತ್ತಿವೆ. ಮುಂಗಾರಿನ ಆರಂಭದಲ್ಲಿ ಬೆಳೆದ ಬಹುವಾರ್ಷಿಕ ಕಬ್ಬು, ಬಾಳೆ ಬೆಳೆಗಳು ಬಿರುಗಾಳಿಗೆ ನೆಲಕ್ಕುರುಳುತ್ತಿವೆ. ಕೈಗೆ ಬಂದ ತುತ್ತು ಬಾಯಿಗೆ ಬಾರದೆ ಹಾಳಾಗುತ್ತಿರುವುದನ್ನು ಕಂಡು ಬೆಳೆಗಾರರು ಕಣ್ಣೀರಿನಲ್ಲಿ ಕೈತೊಳೆಯುವಂತಾಗಿದೆ. ಸೊರಟೂರ ಗ್ರಾಮದ ರೈತ ತಿರಕಪ್ಪ ಬೋಳನವರ ಅವರ ಐದು ಎಕರೆಯಲ್ಲಿ ಬೆಳೆದ ಕಬ್ಬು ಅರ್ಧಕ್ಕಿಂತಲೂ ಹೆಚ್ಚು ಮಳೆ-ಗಾಳಿಯಿಂದ ಬೆಳೆ ನೆಲಕ್ಕುರುಳಿದೆ. ಕಳೆದ ವರ್ಷ ಇಲಿಗಳ ಹಾವಳಿಯಿಂದ ಸಂಪೂರ್ಣ ಬೆಳೆ ನಾಶವಾಗಿದೆ. ಈ ವರ್ಷ ಕಟಾವು ಹಂತದಲ್ಲಿದ್ದಾಗ ನೆಲಕ್ಕುರುಳಿದೆ.
