ಬಿರುಗಾಳಿ ಮಳೆಗೆ ಬಾಳೆ ತೋಟ ನಾಶ, ದಡಿಘಟ್ಟುಮಡುಗು ಗ್ರಾಮದಲ್ಲಿ ಕುಸಿದ ಮನೆಗಳು

ದೊಡ್ಡಬಳ್ಳಾಪುರ: ತಾಲೂಕಿನ ಸಾಸಲು ಹೋಬಳಿಯ ಕೆರೆಕಲ್ಲಹಳ್ಳಿ, ಹನುಮಂತಪುರ, ದಡ್ಡಿಘಟ್ಟಮಡುಗು ಗ್ರಾಮಗಳಲ್ಲಿ ಶುಕ್ರವಾರ ರಾತ್ರಿ ಸುರಿದ ಬಿರುಗಾಳಿ ಸಹಿತ ಭಾರಿ ಮಳೆಗೆ 5 ಎಕರೆಯಲ್ಲಿ ಕಟಾವಿಗೆ ಬಂದಿದ್ದ ಬಾಳೆ ಫಸಲು ನೆಲಕಚ್ಚಿದೆ.

ತಾಲೂಕಿನ ಸಾಸಲು ಹೋಬಳಿಯ ಕೆರೆಕಲ್ಲಹಳ್ಳಿ ಗ್ರಾಮದ ಸುರೇಶ್ ಅವರ 2 ಎಕರೆ ಬಾಳೆ ಫಸಲು ಸಂಪೂರ್ಣ ನೆಲಕಚ್ಚಿದೆ. ಹನುಮಂತಪುರದ ಮಂಜುನಾಥ ಅವರ 3 ಎಕರೆ ಪ್ರದೇಶದಲ್ಲಿದ್ದ ಏಲಕ್ಕಿ ಬಾಳೆ ತೋಟ ಸಂಪೂರ್ಣ ಹಾಳಾಗಿದೆ. ಸುತ್ತಮುತ್ತಲಿನ ಗ್ರಾಮಗಳಲ್ಲಿ ತೆಂಗು ಹಾಗೂ ಅಡಿಕೆ ಮರಗಳು ಕೂಡ ಧರಶಾಹಿಯಾಗಿವೆ.

ಹಾರಿಹೋದ ಶೀಟ್ ಗಳು: ದಡಿಘಟ್ಟಮಡುಗು ಗ್ರಾಮದ ನಾಗಲಕ್ಷ್ಮಮ್ಮ ಅವರ ಮನೆಯ ಛಾವಣಿ ಬಿರುಗಾಳಿ ರಭಸಕ್ಕೆ ಹಾರಿದೆ. ಇದರಿಂದ ಮನೆಯಲ್ಲಿ ಸಂಗ್ರಹಿಸಿಟ್ಟಿದ್ದ ದವಸ-ಧಾನ್ಯ, ಟಿವಿ ಮತ್ತಿತರ ಗೃಹೋಪಯೋಗಿ ವಸ್ತುಗಳು ಹಾಳಾಗಿವೆ. ಇದೇ ಗ್ರಾಮದ ಹನುಮಂತರಾಜು ಅವರ ಮಾಳಿಗೆ ಮನೆಯ ಗೋಡೆ ಕುಸಿದಿದೆ.