ಬಿಜೆಪಿಗೆ ಸೇರಿದ ಮರುದಿನವೇ ಅಧಿಕಾರ

ಕೆಜಿಹಳ್ಳಿ ಗ್ರಾಪಂಗೆ ಯಲ್ಲಪ್ಪ ಅಧ್ಯಕ್ಷ, ಅದೃಷ್ಟದಾಯ್ಕೆಯಲ್ಲಿ ಜಯ

ಟೇಕಲ್​: ತೀವ್ರ ಕುತೂಹಲ ಕೆರಳಿಸಿದ್ದ ಮಾಲೂರು ತಾಲೂಕಿನ ಕೆಜಿಹಳ್ಳಿ ಗ್ರಾಮ ಪಂಚಾಯಿತಿ ಅಧ್ಯಕ್ಷ ಸ್ಥಾನಕ್ಕೆ ನಿಗದಿಯಾಗಿದ್ದ ಚುನಾವಣೆಯಲ್ಲಿ ಮಾಜಿ ಅಧ್ಯಕ್ಷ ಎಸ್​.ಆರ್​.ಯಲ್ಲಪ್ಪ, ಮುರಗೇಶ್​ ಸಮಬಲದ ಮತಗಳನ್ನು ಪಡೆದು ಕೊನೆಗೆ ಬಿಜೆಪಿ ಬೆಂಬಲಿತ ಸದಸ್ಯ ಎಸ್​.ಆರ್​.ಯಲ್ಲಪ್ಪ ಅವರು ಲಾಟರಿ ಪ್ರಕ್ರಿಯೆಯಲ್ಲಿ ನೂತನ ಅಧ್ಯಕ್ಷರಾಗಿ ಆಯ್ಕೆಯಾದರು.

ಮಾಲೂರು ತಾಲೂಕಿನ ಕೆಜಿ ಹಳ್ಳಿ ಗ್ರಾಮ ಪಂಚಾಯಿತಿ ಅಧ್ಯಕ್ಷರಾಗಿದ್ದ ಎಸ್​.ಆರ್​.ಯಲ್ಲಪ್ಪ ಅವರು ಸೋಮವಾರ

ಕಾಂಗ್ರೆಸ್​ ಒಳ ಒಪ್ಪಂದದಂತೆ ಶಾಸಕರ ಸಲಹೆ ಮೇರೆಗೆ ತಮ್ಮ ಹುದ್ದೆಗೆ ರಾಜೀನಾಮೆ ನೀಡಿದ್ದರು. ರಾಜೀನಾಮೆ ಅಂಗೀಕಾರವಾದ ಹಿನ್ನೆಲೆಯಲ್ಲಿ ಜಿಲ್ಲಾ ಉಪ ವಿಭಾಗಾಧಿಕಾರಿ ಚುನಾವಣೆ ನಿಗದಿಪಡಿಸಿ ಚುನಾವಣಾ ಅಧಿಕಾರಿಗಳನ್ನು ನೇಮಿಸಿದ್ದರು. ಅದರಂತೆ ಮಂಗಳವಾರ ಕೆಜಿಹಳ್ಳಿ ಗ್ರಾಪಂ ಕಾರ್ಯಾಲಯದಲ್ಲಿ ನಡೆದ ಚುನಾವಣೆಯಲ್ಲಿ ಎಸ್​.ಆರ್​.ಯಲ್ಲಪ್ಪ ಅವರು ಬಿಜೆಪಿ ಬೆಂಬಲಿತರಾಗಿ ಅಧ್ಯಕ್ಷ ಸ್ಥಾನಕ್ಕೆ ನಾಮಪತ್ರ ಸಲ್ಲಿಸಿದರೆ, ಸದಸ್ಯ ಮುರುಗೇಶ್​ ಅವರು ಕಾಂಗ್ರೆಸ್​ ಬೆಂಬಲಿತರಾಗಿ ನಾಮಪತ್ರ ಸಲ್ಲಿಕೆ ಮಾಡಿದ್ದರು. ನಂತರ ನಡೆದ ಚುನಾವಣೆಯಲ್ಲಿ ಎಸ್​.ಆರ್​.ಯಲ್ಲಪ್ಪ ಮತ್ತು ಮುರುಗೇಶ್​ ತಲಾ 11 ಮತ ಪಡೆದಿದ್ದರಿಂದ ಚುನಾವಣಾಧಿಕಾರಿ ಮಂಜುನಾಥ್​ ಅವರು ಲಾಟರಿ ಪ್ರಕ್ರಿಯೆ ನಡೆಸಿದಾಗ ಎಸ್​.ಆರ್​.ಯಲ್ಲಪ್ಪ ಅವರ ಹೆಸರು ಬಂದಿದ್ದರಿಂದ ಅಧ್ಯಕ್ಷರಾಗಿ ಆಯ್ಕೆಯಾದರು.

ಶಾಸಕರ ಪ್ರತಿಷ್ಠೆಯ ತವರು ಕ್ಷೇತ್ರವಾದ ಕೆ.ಜಿ.ಹಳ್ಳಿ ಪಂಚಾಯಿತಿ ಅಧ್ಯಕ್ಷರಾಗಿ ಕಾಂಗ್ರೆಸ್​ ಬೆಂಬಲಿತ ಮುರುಗೇಶ್​ರನ್ನು ಕಣಕ್ಕೆ ಇಳಿಸಿದ್ದರು. ಪರಾಭವಗೊಂಡ ಅಭ್ಯರ್ಥಿ ಮುರುಗೇಶ್​ ಮನೆಗೆ ಶಾಸಕ ಕೆ.ವೈ.ನಂಜೇಗೌಡ, ಕಾರ್ಯರ್ತರು ಸಮಾಧಾನ ಪಡಿಸಿದರು.

ಮುಖಂಡರಾದ ಚಿನ್ನಸ್ವಾಮಿಗೌಡ, ಕೆ.ಬಿ.ನಾರಾಯಣಸ್ವಾಮಿ, ಮುನಿಸ್ವಾಮಿಗೌಡ, ಹಳೆಪಾಳ್ಯ, ಮಂಜುನಾಥ್​, ಚಂದ್ರಶೇಖರ್​, ಸೋಮಣ್ಣ, ಕಿರಣ್​, ವಿಜಯ್​ ಕುಮಾರ್​, ಮುರುಳಿ, ನಾಗರಾಜ್​, ಮಂಜುನಾಥ್​, ಚಲಪತಿ, ಪಿಡಿಒ ವೆಂಕಟೇಶ್​ ಇದ್ದರು.

ಕಿರುಕುಳ ಸಹಿಸದೆ ಕಾಂಗ್ರೆಸ್​ ಬಿಟ್ಟೆ: ಮಾಲೂರು ತಾಲೂಕಿನ ಕಾಂಗ್ರೆಸ್​ನಲ್ಲಿರುವ ಸರ್ವಾಧಿಕಾರ ಹಾಗೂ ನನ್ನ ಮೇಲೆ ಆಗುತ್ತಿದ್ದ ದೌರ್ಜನ್ಯಗಳನ್ನು ಖಂಡಿಸಿ, ಬಿಜೆಪಿಗೆ ಸೇರ್ಪಡೆಯಾಗಿದ್ದೇನೆ. ಕಾಂಗ್ರೆಸ್​ನಲ್ಲಿ ನಿಷ್ಠಾವಂತ ಕಾರ್ಯಕರ್ತನಾಗಿ ಕೆಲಸ ಮಾಡಿಕೊಂಡು ಬಂದಿದ್ದರೂ ಸಹ ಟೇಕಲ್​ ಹೋಬಳಿಯ ಕಾಂಗ್ರೆಸ್​ನ ಪ್ರಭಾವಿ ನಾಯಕರಿಂದ ಅವಮಾನ ಮತ್ತು ದೌರ್ಜನ್ಯವಾಗುತ್ತಿರುವ ಕಾರಣ ಬಿಜೆಪಿ ಸಿದ್ಧಾಂತಗಳನ್ನು ಒಪ್ಪಿಕೊಂಡು ಸೇರ್ಪಡೆಗೊಂಡಿದ್ದೇನೆ. ಮುಂದಿನ ದಿನಗಳಲ್ಲಿ ತಾಲೂಕಿನಲ್ಲಿ ಪಕ್ಷ ಬಲಗೊಳಿಸಲು ಯತ್ನಿಸುವೆ ಎಂದು ಅಧ್ಯಕ್ಷ ಎಸ್​.ಆರ್​.ಯಲ್ಲಪ್ಪ ತಿಳಿಸಿದರು.