ಬಾರದ ಬ್ಯಾಡಗಿ ವರ್ತಕರು

ಗದಗ: ನಗರದ ಎಪಿಎಂಸಿಯಲ್ಲಿ ಶನಿವಾರ ನಡೆದ ಒಣಮೆಣಸಿನಕಾಯಿ ಆನ್​ಲೈನ್ ಟೆಂಡರ್ ಮಾರಾಟ ಪ್ರಕ್ರಿಯೆಯಲ್ಲಿ ಸ್ಥಳೀಯ ಖರೀದಿದಾರರು ಮಾತ್ರ ಪಾಲ್ಗೊಂಡಿದ್ದರು. ಬ್ಯಾಡಗಿ ಒಣಮೆಣಸಿನಕಾಯಿ ವರ್ತಕರು ಟೆಂಡರ್ ಪ್ರಕ್ರಿಯೆಯಲ್ಲಿ ಭಾಗವಹಿಸದಿರುವುದು ಕಂಡುಬಂದಿತು.

ಶುಕ್ರವಾರ ಸ್ಥಳೀಯ ಎಪಿಎಂಸಿ ಅಧ್ಯಕ್ಷ ಹಾಗೂ ಸದಸ್ಯರು ಬ್ಯಾಡಗಿಗೆ ತೆರಳಿ ಅಲ್ಲಿನ ಖರೀದಿದಾರರನ್ನು ಭೇಟಿ ಮಾಡಿ ಗದಗ ಮಾರ್ಕೆಟ್​ಗೂ ಆಗಮಿಸಿ ಉತ್ಪನ್ನ ಖರೀದಿಸಬೇಕು ಎಂದು ಮನವಿ ಮಾಡಿಕೊಂಡಿದ್ದರು. ಆದರೂ ಸಹ ಶನಿವಾರ ನಡೆದ ಆನ್​ಲೈನ್ ಟೆಂಡರ್ ಪ್ರಕ್ರಿಯೆಯಲ್ಲಿ ಬ್ಯಾಡಗಿಯ ಖರೀದಿದಾರರು ಪಾಲ್ಗೊಂಡಿಲ್ಲ. ಹೀಗಾಗಿ ದರ ಕೊಂಚ ಇಳಿಮುಖವಾಗಿದೆ. ಶನಿವಾರದ ದರ ಪ್ರತಿ ಕ್ವಿಂಟಾಲ್ ಗೆ ಕನಿಷ್ಠ 2,000 ರೂ., ಗರಿಷ್ಠ 22,000 ರೂ. ಇತ್ತು. ಕಳೆದ ಬುಧವಾರ ಪ್ರತಿ ಕ್ವಿಂಟಾಲ್​ಗೆ 27,99 ರೂ. ಮಾರಾಟವಾಗಿತ್ತು.

ರೈತರು-ಖರೀದಿದಾರರ ಮಧ್ಯೆ ಮಾತಿನ ಚಕಮಕಿ

ಗದಗ: ಇಲ್ಲಿನ ಎಪಿಎಂಸಿಯಲ್ಲಿ ಒಣ ಮೆಣಸಿನಕಾಯಿ ಖರೀದಿಯಲ್ಲಿ ವ್ಯತ್ಯಾಸವಾಗಿದ್ದರಿಂದ ಶನಿವಾರ ರೈತರು ಮತ್ತು ಖರೀದಿದಾರರ ಮಧ್ಯೆ ಮಾತಿನ ಚಕಮಕಿ ನಡೆದಿದೆ. ಎಪಿಎಂಸಿಯ ಎಂ.ಎಂ. ಕನವಳ್ಳಿ ಅಂಗಡಿಯವರು ಇ- ಟೆಂಡರ್​ನ ಬೆಲೆಗಿಂತ ಕಡಿಮೆ ಬೆಲೆ ನೀಡುತ್ತಿದ್ದಾರೆ ಎಂದು ರೋಣ ತಾಲೂಕಿನ ಚಿಕ್ಕಮಣ್ಣೂರಿನ ರೈತ ಎಂದು ರೋಣ ತಾಲೂಕಿನ ಚಿಕ್ಕಮಣ್ಣೂರು ಗ್ರಾಮದ ರೈತ ಬಸವಲಿಂಗಪ್ಪ ಈಶ್ವರಪ್ಪ ಮೇಟಿ ಆರೋಪಿಸಿದ್ದಾರೆ.

ಇ-ಟೆಂಡರ್​ನಲ್ಲಿ 13,175 ರೂ. ದರ ಸಿಕ್ಕಿತ್ತು. ಆದರೆ, ಅಂಗಡಿಯವರು 12, 170 ರೂ. ಹಣ ನೀಡಲು ಮುಂದೆ ಬಂದಿದ್ದಾರೆ. ಇ-ಟೆಂಡರ್ ಪರಿಶೀಲಿಸಿದಾಗ ದರ ಕಡಿಮೆ ಆಗಿರುವುದು ಗಮನಕ್ಕೆ ಬಂದಿದೆ ಎಂದು ರೈತ ತಿಳಿಸಿದರು. ಈ ಸಂದರ್ಭದಲ್ಲಿ ರೈತರು ಮತ್ತು ಖರೀದಿದಾರರ ಮಧ್ಯೆ ಮಾತಿನ ಚಕಮಕಿ ನಡೆದಿದ್ದು, ಪೊಲೀಸರು ಆಗಮಿಸಿ ಸಮಾಧಾನ ಪಡಿಸಿದರು.

ನಂತರ ಎಪಿಎಂಸಿ ಅಧಿಕಾರಿಗಳ ಮಧ್ಯಪ್ರವೇಶಿಸಿ ಟೆಂಡರ್ ದರ ಪರಿಶೀಲಿಸಿದರು. ಖರೀದಿದಾರರು ಕಣ್ತಪ್ಪಿನಿಂದ ದರ ಏರುಪೇರಾಗಿತ್ತು ಎಂದು ತಪ್ಪು ಒಪ್ಪಿಕೊಂಡ ನಂತರ ಸಮಸ್ಯೆ ಬಗೆಹರಿಯಿತು.