ಬಾಗಿಲು ತೆರೆದ ಅಂಚೆ ಕಚೇರಿ

ಶಿರಹಟ್ಟಿ: ಇಂಟರ್​ನೆಟ್ ಸಮಸ್ಯೆಯಿಂದಾಗಿ ಹಲವು ದಿನಗಳಿಂದ ಸಂಪೂರ್ಣ ಬಂದ್ ಆಗಿದ್ದ ಪಟ್ಟಣದ ಅಂಚೆ ಕಚೇರಿ ಬುಧವಾರ ಬಾಗಿಲು ತೆರೆದಿದೆ.

ಮೋಡೆಮ್ ಸುಟ್ಟುಹೋಗಿದ್ದರಿಂದ ನಿಸ್ಸಹಾಯಕ ರಾಗಿದ್ದ ಸಿಬ್ಬಂದಿ ಒಂದು ವಾರದ ಹಿಂದೆಯೇ ಕಚೇರಿ ಬಾಗಿಲಿಗೆ ಬೀಗ ಜಡಿದು ಎಲ್ಲ ಕೆಲಸ ಕಾರ್ಯಗಳನ್ನು ಸ್ಥಗಿತಗೊಳಿಸಿದ್ದರು. ಈ ಕುರಿತು ‘ವಿಜಯವಾಣಿ’ಯಲ್ಲಿ ವಿಸõತ ವರದಿ ಪ್ರಕಟಿಸಲಾಗಿತ್ತು. ವರದಿ ಗಮನಿಸಿದ ಅಧಿಕಾರಿಗಳು ಮೋಡೆಮ್ ವ್ಯವಸ್ಥೆ ಮಾಡಿದ್ದರಿಂದ ಕಚೇರಿಯ ಕೆಲಸ ಕಾರ್ಯಗಳು ಪುನರಾರಂಭವಾದವು. ವೃದ್ಧಾಪ್ಯ ವೇತನ, ವಿಧವಾ, ಅಂಗವಿಕಲರು, ವಿಮಾ ಕಂತು, ಠೇವಣಿ ಹಣ, ಸರ್ಕಾರಿ ಉದ್ಯೋಗ ಅರ್ಜಿಗಳ ಶುಲ್ಕ ಭರಣ ಸೇರಿದಂತೆ ಅಂಚೆ ಕಚೇರಿಯ ಸೇವೆಯನ್ನು ಅವಲಂಬಿಸಿದ ಗ್ರಾಹಕರು ಬುಧವಾರ ಸರದಿಯಲ್ಲಿ ನಿಂತು ಸೇವೆ ಪಡೆದರು.