ಮೈಸೂರು: ಅಕಾಲಿಕ ಮಳೆಯಿಂದ ಬಹುರೂಪಿ ರಾಷ್ಟ್ರೀಯ ರಂಗೋತ್ಸವ ಸಂಭ್ರಮಕ್ಕೆ ರಸಭಂಗ ಉಂಟಾಯಿತು.
ಮಾಂಡೂಸ್ ಚಂಡಮಾರುತ ಪರಿಣಾಮದಿಂದಾಗಿ ಮೈಸೂರಿನಲ್ಲಿ ಶನಿವಾರದಿಂದಲೂ ಮಳೆ ಆಗುತ್ತಿದೆ. ಭಾನುವಾರ ಸಹ ಜಿಟಿ ಜಿಟಿ ಮಳೆಯೊಂದಿಗೆ ಆಗೊಮ್ಮೆ ಈಗೊಮ್ಮೆ ಧಾರಾಕಾರ ಮಳೆ ಆಗಿದೆ. ದಿನವಿಡೀ ಸುರಿದ ಮಳೆಯಿಂದ ಜನರು ರಂಗಾಯಣದ ಕಡೆಗೆ ಬರಲು ಮನಸ್ಸು ಮಾಡಲಿಲ್ಲ. 2ನೇ ದಿನವಾದ ಭಾನುವಾರವೂ ರಂಗಾಯಣದಲ್ಲಿ ಸಂಭ್ರಮ ಮೇಳೈಸಲಿಲ್ಲ.
ವಾರಾಂತ್ಯ ಸಂದರ್ಭದಲ್ಲಿ ಬಹುರೂಪಿ ರಂಗೋತ್ಸವವನ್ನು ಕಣ್ತುಂಬಿಕೊಳ್ಳಲು ಸಾರ್ವಜನಿಕರು ಇಲ್ಲಿಗೆ ಲಗ್ಗೆಯಿಡುತ್ತಾರೆ. ಜನರಿಂದ ಗಿಜಿಗುಡುವ ಇಲ್ಲಿ ಹಬ್ಬದ ವಾತಾವರಣವೇ ನಿರ್ಮಾಣವಾಗುತ್ತದೆ. ಆದರೆ, ಈ ಸಲ ಈ ರೀತಿ ಸಡಗರ, ಸಂಭ್ರಮ ಇರಲಿಲ್ಲ. ನಿರೀಕ್ಷಿತ ಮಟ್ಟದಲ್ಲೂ ಜನರೂ ಸೇರಿರಲಿಲ್ಲ.
ಈ ಬಾರಿ ರಂಗಾಸಕ್ತರನ್ನು ಸೆಳೆಯುವ ಕಾರ್ಯಕ್ರಮವೂ ಇರಲಿಲ್ಲ. ಉತ್ತಮ ನಾಟಕ ತಂಡ, ಅನ್ಯರಾಜ್ಯಗಳ ಕಲಾತಂಡಗಳನ್ನೂ ಕರೆಸಿರಲಿಲ್ಲ. ಒಟ್ಟಿನಲ್ಲಿ ಈ ಸಲ ಅಂತಹ ವಿಶೇಷತೆ ಇರದ ಕಾರಣಕ್ಕೂ ಜನರು ಬಹುರೂಪಿ ರಂಗೋತ್ಸವದತ್ತ ಸುಳಿಯಲಿಲ್ಲ ಎಂಬ ಮಾತು ಕೇಳಿ ಬಂದಿತು.
ಸಿನಿಮಾ ಪ್ರದರ್ಶನ:
ಚಲನಚಿತ್ರೋತ್ಸವದಲ್ಲಿ 3 ಸಿನಿಮಾಗಳು ಪ್ರದರ್ಶನಗೊಂಡವು. ಶ್ರೀರಂಗಮಂದಿರದಲ್ಲಿ ಆದಿತ್ಯ ರಾನಡೆ ನಿರ್ದೇಶನದ ಹಿಂದಿ ಭಾಷೆಯ ‘ರಾಂಚಿ ಪಖಾರ’ ಚಿತ್ರ, ಇಂಗ್ಲಿಷ್ ಭಾಷೆಯ ‘ದಿ ಪ್ರೈಸ್ ಆಫ್ ಫ್ರೀ’ ಮತ್ತು ಮಹೇಶ್ ನಾರಾಯಣನ್ ನಿರ್ದೇಶನದ ಮಲಯಾಳಂನ ‘ಟೇಕ್ಆಫ್’ ಸಿನಿಮಾ ತೆರೆಕಂಡಿತು. ಆದರೆ, ಮಳೆಯಿಂದ ಪ್ರೇಕ್ಷಕರ ಕೊರತೆ ಕಾಡಿತು.
