ಬಡ ಕಲಾವಿದರ ಬದುಕಿಗೆ ಲಾಕ್​ಡೌನ್ ಬರೆ

ಶ್ರೀಧರ ಅಣಲಗಾರ ಯಲ್ಲಾಪುರ

ಲಾಕ್​ಡೌನ್ ಸಂದರ್ಭದಲ್ಲಿ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯಿಂದ ಬಡ ಕಲಾವಿದರಿಗೆ ಪಡಿತರ ಹಾಗೂ ಅಗತ್ಯ ಸಾಮಗ್ರಿ ನೀಡಲು ಕ್ರಮ ಕೈಗೊಳ್ಳಲಾಗಿದೆ. ಆದರೆ, ಕಲಾವಿದರು ಎಂದು ಹೇಳಿಕೊಳ್ಳುವುದಕ್ಕೆ ಯಾವುದೇ ಪ್ರಮಾಣಪತ್ರ, ಗುರುತಿನ ಪತ್ರ ಇಲ್ಲದೇ ಯಕ್ಷಗಾನ ಕಲಾವಿದರು ಈ ಸೌಲಭ್ಯದಿಂದ ವಂಚಿತರಾಗುವಂತಾಗಿದೆ.

ಬಡ ಕಲಾವಿದರಿಗೆ ಆಯಾ ತಹಸೀಲ್ದಾರ್ ಕಚೇರಿ ಮೂಲಕ ಆಹಾರ ಸಾಮಗ್ರಿ ಹಾಗೂ ಅಗತ್ಯ ವಸ್ತುಗಳ ಪೂರೈಕೆಗೆ ಕ್ರಮ ಕೈಗೊಳ್ಳುವಂತೆ ಸಚಿವ ಸಿ.ಟಿ. ರವಿ ಏ. 14ರಂದು ಆದೇಶಿಸಿದ್ದಾರೆ. ಕೆಲ ಬಡ ಕಲಾವಿದರು ಈ ಸೌಲಭ್ಯ ಪಡೆಯಲು ಅರ್ಜಿ ಸಲ್ಲಿಸುವುದಕ್ಕೆ ತಹಸೀಲ್ದಾರ್ ಕಚೇರಿಗಳಿಗೆ ತೆರಳಿದಾಗ ‘ನೀವು ಕಲಾವಿದರು ಎನ್ನುವುದಕ್ಕೆ ಅಗತ್ಯ ದಾಖಲೆ ಬೇಕು’ ಎಂದು ಕೇಳುತ್ತಿದ್ದಾರೆ. ಆದರೆ, ಬಹುತೇಕ ಯಕ್ಷಗಾನ ಕಲಾವಿದರ ಬಳಿ ಅಂತಹ ದಾಖಲೆಗಳು ಇಲ್ಲ.

ಡೇರೆ ಮೇಳ ಹಾಗೂ ಬಯಲಾಟ ಮೇಳಗಳಲ್ಲಿ ಹಲವು ಕಲಾವಿದರು, ಮೇಳಗಳ ಹೊರತಾಗಿ ಸ್ಥಳೀಯವಾಗಿ ಯಕ್ಷಗಾನದಿಂದಲೇ ಬದುಕು ಕಟ್ಟಿಕೊಂಡಿರುವ ಕಲಾವಿದರು, ಪ್ರಸಾಧನ ಕಲಾವಿದರಿಗೆಲ್ಲ ಈ ಸೌಲಭ್ಯದ ಅವಶ್ಯಕತೆಯಿದೆ. ಆದರೆ, ಅವರು ಕಲಾವಿದರು ಎನ್ನುವುದಕ್ಕೆ ಅವರು ಕಾರ್ಯನಿರ್ವಹಿಸುವ ಮೇಳದಿಂದಾಗಲಿ, ಯಕ್ಷಗಾನಕ್ಕೆ ಸಂಬಂಧಿಸಿದ ಸಂಘ-ಸಂಸ್ಥೆ, ಮಂಡಳಿಗಳಿಂದಾಗಲಿ ಯಾವುದೇ ಪ್ರಮಾಣಪತ್ರ ಅಥವಾ ಗುರುತಿನ ಪತ್ರಗಳಿಲ್ಲ.

ಕೈ ಹಿಡಿಯಬೇಕು ಅಕಾಡೆಮಿ: ಇಂತಹ ಸಂಕಷ್ಟದ ಸಂದರ್ಭದಲ್ಲಿ ಯಕ್ಷಗಾನ ಅಕಾಡೆಮಿ ಕಲಾವಿದರ ಕೈಹಿಡಿಯುವ ಅಗತ್ಯವಿದೆ. ಯಕ್ಷಗಾನದಿಂದಲೇ ಬದುಕು ಸಾಗಿಸುತ್ತಿರುವ ಕಲಾವಿದರಿಗೆ ಅಕಾಡೆಮಿಯಿಂದ ಪ್ರಮಾಣಪತ್ರವನ್ನೋ ಅಥವಾ ಗುರುತಿನ ಪತ್ರವನ್ನೋ ನೀಡಿದರೆ ಸೌಲಭ್ಯ ಪಡೆಯಲು ಅನುಕೂಲವಾಗಬಹುದು.

ಜಿಲ್ಲೆಯ ಕಲಾವಿದರು ಅತಂತ್ರ: ದಕ್ಷಿಣ ಕನ್ನಡ, ಉಡುಪಿ ಜಿಲ್ಲೆಗಳಲ್ಲಿ ಬಯಲಾಟ ಮೇಳಗಳ ಕಲಾವಿದರಿಗೆ ಆಯಾ ದೇವಸ್ಥಾನಗಳ ವತಿಯಿಂದ ಸಂಬಳ ನೀಡುವ ಕುರಿತು ಮುಜರಾಯಿ ಇಲಾಖೆ ಸೂಚನೆ ನೀಡಿದೆ. ಅಲ್ಲದೆ, ವಿವಿಧ ಸಂಘ-ಸಂಸ್ಥೆಗಳು ಕಲಾವಿದರ ನೆರವಿಗೆ ಧಾವಿಸುತ್ತಿವೆ. ಆದರೆ, ಉತ್ತರ ಕನ್ನಡದ ಕಲಾವಿದರು ಇದರಿಂದ ವಂಚಿತರಾಗುತ್ತಿದ್ದಾರೆ.