ವಿಜಯವಾಣಿ ಸುದ್ದಿಜಾಲ ಮೈಸೂರು
ರೈತರ ಪರಿಸ್ಥಿತಿ ಸುಧಾರಿಸಲು ಸರ್ಕಾರ ಗಂಭೀರ ಚಿಂತನೆ ನಡೆಸಿದ್ದು, ರೈತ ಕೇಂದ್ರಿತ ಕಾರ್ಯಕ್ರಮಗಳನ್ನು ನೀಡಲಾಗುವುದು ಎಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಹೇಳುವ ಮೂಲಕ ಮುಂದಿನ ಬಜೆಟ್ನಲ್ಲಿ ರೈತರಿಗೆ ಬಂಪರ್ ಕೊಡುಗೆಯ ಸುಳಿವು ನೀಡಿದರು.
ಮಹಾರಾಜ ಕಾಲೇಜು ಮೈದಾನದಲ್ಲಿ ವಿಜಯವಾಣಿ ಹಾಗೂ ದಿಗ್ವಿಜಯ ಸುದ್ದಿವಾಹಿನಿ ಆಯೋಜಿಸಿರುವ ಮೂರು ದಿನಗಳ ಕೃಷಿ ಮೇಳವನ್ನು ಶುಕ್ರವಾರ ಉದ್ಘಾಟಿಸಿ ಮಾತನಾಡಿದ ಅವರು, ಸಮಗ್ರ ಗ್ರಾಮೀಣ ಸಾಲ ವ್ಯವಸ್ಥೆಯಲ್ಲಿ ಆಮೂಲಾಗ್ರ ಬದಲಾವಣೆ ತಂದು ರೈತರಿಗೆ ಸಾಲದ ಮಿತಿ ಹೆಚ್ಚಳವನ್ನು ಮುಂದಿನ ಬಜೆಟ್ನಲ್ಲಿ ಪ್ರಕಟಿಸಲಾಗುವುದು. ರೈತರು ಹೊಂದಿದ ಹಿಡುವಳಿ ಆಧಾರದಲ್ಲಿ ಸಾಲದ ಅನುಪಾತ ವೈಜ್ಞಾನಿಕವಾಗಿ ನಿಗದಿಯಾಗಿದೆ. ಆದರೆ ಬ್ಯಾಂಕ್ಗಳು ಸಾಲದ ಅನುಪಾತ ಪಾಲನೆ ಮಾಡದ ಕಾರಣ ದುಬಾರಿ ಬಡ್ಡಿ ದರದ ಖಾಸಗಿ ಸಾಲಕ್ಕೆ ಮೊರೆ ಹೋಗುತ್ತಿದ್ದಾರೆ ಎಂದರು.
ವೈಜ್ಞಾನಿಕ ವರದಿ ಸೂಚನೆ ಪ್ರಕಾರವೇ ರೈತರಿಗೆ ಸಾಲ ನೀಡುವ ವ್ಯವಸ್ಥೆಯಾಗಲಿದೆ. ಬೀಜ ಮತ್ತು ರಸಗೊಬ್ಬರ ಪೂರೈಕೆಯ ಅಡೆತಡೆ ನಿವಾರಣೆ, ಉತ್ಪಾದನಾ ವೆಚ್ಚ ತಗ್ಗಿಸಿ ಲಾಭ ಹೆಚ್ಚಿಸುವಂತಹ ನೀತಿ ಜಾರಿಗೆ ತರಲಾಗುವುದು ಎಂದು ಘೋಷಿಸಿದರು.
ವರದಿಗೆ ಸೂಚನೆ
ಹಲವು ದೇಶಗಳಲ್ಲಿ ಹವಾಮಾನ, ಮಣ್ಣಿನ ಗುಣ, ಮಳೆ ಮುನ್ಸೂಚನೆ, ಮಾರುಕಟ್ಟೆ ಏರಿಳಿತದ ಅಧ್ಯಯನದ ವರದಿ ಆಧರಿಸಿ ಆಯಾ ಬೆಳೆಯ ಬೆಲೆ ಮುನ್ನಂದಾಜು ಪ್ರಕಟಿಸಲಾಗುತ್ತದೆ. ಇದೇ ವ್ಯವಸ್ಥೆಯನ್ನು ರಾಜ್ಯದಲ್ಲಿ ಜಾರಿಗೆ ತರುವ ಉದ್ದೇಶದಿಂದ ಕಳೆದ 10 ವರ್ಷಗಳ ಮಾರುಕಟ್ಟೆಗಳಲ್ಲಿ ಬೆಲೆ ಏರಿಳಿತದ ಅಧ್ಯಯನ ಮಾಡಿ ಬೆಳೆ ಮುನ್ನಂದಾಜು ವರದಿ ಸಲ್ಲಿಸಲು ತಜ್ಞರಿಗೆ ಸೂಚಿಸಿರುವೆ ಎಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ತಿಳಿಸಿದರು.
ಬೆಳೆಗೆ ಬೆಲೆ ಮುನ್ನಂದಾಜು ನಿಗದಿಪಡಿಸಿದರೆ ಅದರ ಮಿತಿಯೊಳಗೆ ಖರ್ಚು ಮಾಡಲು ರೈತರಿಗೆ ಸಹಾಯವಾಗಲಿದ್ದು, ಅನಗತ್ಯ ವೆಚ್ಚ ಮಾಡಿ ನಷ್ಟ ಅನುಭವಿಸುವುದು ತಪ್ಪಲಿದೆ ಎಂದು ತಮ್ಮ ಆಲೋಚನಾ ಕ್ರಮವನ್ನು ಬಿಚ್ಚಿಟ್ಟರು.
ಸುಸ್ಥಿರ ಕೃಷಿಗೆ ಮಣ್ಣಿನ ಫಲವತ್ತತೆ ಸಂರಕ್ಷಣೆಯೂ ಅಷ್ಟೇ ಮುಖ್ಯವಾಗಿದೆ. ಸಾವಿರಾರು ವರ್ಷಗಳಿಂದ ಮಣ್ಣಿಗೆ ಬೆವರು ಸುರಿಸಿ ಅನ್ನ ಬೆಳೆದು ರೈತನಿಗೆ ಮಣ್ಣಿನ ಬಗ್ಗೆ ಚೆನ್ನಾಗಿ ಗೊತ್ತಿರುತ್ತದೆ. ರೈತನ ಅನುಭವದ ಮುಖೇನ ಮಣ್ಣಿನ ಸಂರಕ್ಷಣೆ, ಸಮೃದ್ಧ ಬದುಕಿಗೆ ಅವಕಾಶ ಕಲ್ಪಿಸುವ ಮಾರ್ಗೋಪಾಯ ಕಂಡುಕೊಳ್ಳಬೇಕಾಗಿದೆ ಎಂದು ಸಲಹೆ ನೀಡಿದರು.
ಶ್ಲಾಘನೆ
ಕೃಷಿ ಮೇಳದ ಮೂಲಕ ಹೊಸ ತಳಿ, ತಂತ್ರಜ್ಞಾನ, ಪದ್ಧತಿ ಪರಿಚಯಿಸುವ ಜತೆಗೆ, ಮಾರುಕಟ್ಟೆ ಬಗ್ಗೆ ತಿಳಿವಳಿಕೆ ನೀಡುವ ಪ್ರಯತ್ನ ಮಾಡಲಾಗುತ್ತಿದೆ. ಕಳೆದ ಬಾರಿ 2-3 ಲಕ್ಷ ರೈತರು ಭಾಗಿಯಾಗಿರುವ ಮಾಹಿತಿಯಿದ್ದು, ಈ ಸಲವೂ ರೈತರು ನಿರೀಕ್ಷೆಗೆ ಮೀರಿ ಸ್ಪಂದಿಸುವ ವಿಶ್ವಾಸವಿದೆ ಎಂದು ಸಿಎಂ ಬೊಮ್ಮಾಯಿ ಹೇಳಿದರು.
ಸುಸ್ಥಿರ ಅಭಿವೃದ್ಧಿಗೆ ಪೂರಕವಾದ ಈ ಮೇಳಕ್ಕೆ ಸಾರಥ್ಯ ನೀಡಿರುವ ವಿಆರ್ಎಲ್ ಸಮೂಹ ಸಂಸ್ಥೆಗಳ ಸಿಎಂಡಿ ಡಾ.ವಿಜಯ ಸಂಕೇಶ್ವರ, ಈ ಪರಿಕಲ್ಪನೆ ಕಟ್ಟಿಕೊಟ್ಟ ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕ ಡಾ.ಆನಂದ ಸಂಕೇಶ್ವರ ಜತೆಗೆ ಶಿವ ಸಂಕೇಶ್ವರ ಎಳೆಯ ವಯಸ್ಸಿನಲ್ಲಿ ದೊಡ್ಡ ಆಸಕ್ತಿ ತೋರಿಸಿರುವುದು ಅಚ್ಚರಿ ಜತೆಗೆ ಸಂತಸ ತಂದಿದೆ ಎಂದು ಶ್ಲಾಘಿಸಿದರು.
ಸಚಿವರಾದ ಆರ್.ಅಶೋಕ್, ಗೋವಿಂದ ಕಾರಜೋಳ, ಸಂಸದ ಪ್ರತಾಪ ಸಿಂಹ, ಶಾಸಕರಾದ ಎಸ್.ಎ.ರಾಮದಾಸ್, ಎಲ್.ನಾಗೇಂದ್ರ, ವಿಧಾನ ಪರಿಷತ್ ಸದಸ್ಯ ಸಿ.ಎನ್.ಮಂಜೇಗೌಡ, ಮೇಯರ್ ಶಿವಕುಮಾರ್, ಉಪ ಮೇಯರ್ ಡಾ.ರೂಪಾ, ಮೈಸೂರು ನಗರಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಯಶಸ್ವಿ ಸೋಮಶೇಖರ, ಫ್ರೀಡಂ ಆ್ಯಪ್ ಸಂಸ್ಥಾಪಕ ಸಿ.ಎಸ್.ಸುಧೀರ್, ಜಿಲ್ಲಾಧಿಕಾರಿ ಡಾ.ಕೆ.ವಿ.ರಾಜೇಂದ್ರ, ಪೊಲೀಸ್ ಆಯುಕ್ತ ಬಿ.ರಮೇಶ್ ಇನ್ನಿತರರು ಇದ್ದರು.
