ಪ್ರೇಕ್ಷಕ-ಸಮಾಜದ ಪ್ರತಿಬಿಂಬ ಸಿನಿಮಾ:   ಟಿ.ಎನ್.ಸೀತಾರಾಮ್

ಮೈಸೂರು: ಸಿನಿಮಾ ಕೇವಲ ಕನ್ನಡಿಯಲ್ಲ. ಅದು ಪ್ರೇಕ್ಷಕ ಹಾಗೂ ಸಮಾಜದ ಪ್ರತಿಬಿಂಬ. ಸಾಮಾಜಿಕ ಕಾಳಜಿಯನ್ನು ಹೊಂದಿರುವ ಕಥೆ ಹೇಳುವುದು ಪ್ರೇಕ್ಷಕರನ್ನು ಪ್ರತಿಧ್ವನಿಸುವಂತೆ ಎಂದು ನಿರ್ದೇಶಕ, ನಟ ಟಿ. ಎನ್. ಸೀತಾರಾಮ್ ಅಭಿಪ್ರಾಯಪಟ್ಟರು.

ಅಮೃತ ವಿಶ್ವವಿದ್ಯಾಪೀಠಂ ಮೈಸೂರು ಕ್ಯಾಂಪಸ್‌ನಲ್ಲಿ ಗುರುವಾರ ಆಯೋಜಿಸಿದ್ದ ‘ಸಿನಿರಮಾ-2025’ 7ನೇ ರಾಷ್ಟ್ರಮಟ್ಟದ ಕಿರುಚಿತ್ರೋತ್ಸವವನ್ನು ಉದ್ಘಾಟಿಸಿ ಮಾತನಾಡಿದರು.

ಪ್ರಸ್ತುತ ಚಲನಚಿತ್ರೋದ್ಯಮ ಎದುರಿಸುತ್ತಿರುವ ಸವಾಲುಗಳನ್ನು ಕುರಿತು ಮಾತನಾಡಿದ ಅವರು, ಚಿತ್ರಮಂದಿರಗಳಿಗೆ ಹೋಗುವ ಚಲನಚಿತ್ರ ಪ್ರೇಕ್ಷಕರ ಸಂಖ್ಯೆ ಕಡಿಮೆಯಾಗುತ್ತಿದೆ. ಯುವ ನಿರ್ಮಾಪಕರು ತಮ್ಮ ಚಲನಚಿತ್ರಗಳನ್ನು ಪ್ರದರ್ಶಿಸಲು ನವೀನ ವೇದಿಕೆಗಳನ್ನು ಅನ್ವೇಷಿಸುವಂತೆ ಸಲಹೆ ನೀಡಿದರು.

ಸಾಂಪ್ರದಾಯಿಕ ಮಾರ್ಗಗಳಿಗಾಗಿ ಕಾಯುವ ಬದಲು, ಪ್ರೇಕ್ಷಕರನ್ನು ತಲುಪಲು ನಿಮ್ಮದೇ ಆದ ಪರ್ಯಾಯವನ್ನು ಕಂಡುಕೊಳ್ಳಬೇಕಿದೆ. ಹೃದಯವನ್ನು ಸ್ಪರ್ಶಿಸುವ ಕಥೆಯೇ ಅತ್ಯುತ್ತಮ ಚಲನಚಿತ್ರವನ್ನು ರೂಪಿಸುತ್ತದೆ ಎಂದು ಹೇಳಿದರು.

ಸೃಜನಶೀಲ ಉದ್ಯಮಗಳಲ್ಲಿ ಹೆಚ್ಚುತ್ತಿರುವ ಕೃತಕ ಬುದ್ಧಿಮತ್ತೆಯ ಬಳಕೆಯ ಕುರಿತು ಪ್ರಸ್ತಾಪಿಸಿದ ಅವರು, ಇಂದಿನ ಜಗತ್ತಿನಲ್ಲಿ ಇದರ ಪಾತ್ರವನ್ನು ಒಪ್ಪಿಕೊಂಡರೂ ತಂತ್ರಜ್ಞಾನದ ಮೇಲೆ ಅತಿಯಾದ ಅವಲಂಬನೆಯ ಕುರಿತು ಎಚ್ಚರಿಕೆ ನೀಡಿದರು.

ಕೃತಕ ಬುದ್ಧಿಮತ್ತೆ ಸಹಾಯ ಮಾಡಬಹುದು. ಆದರೆ ಸಿನಿಮಾ ಬೇಡುವ ಮಾನವ ಭಾವನೆಗಳ ಆಳವನ್ನು ಅದರಿಂದ ಬದಲಾಯಿಸಲು ಸಾಧ್ಯವಿಲ್ಲ ಎಂದು ತಿಳಿಸಿದರು.

ಕಿರುಚಿತ್ರೋತ್ಸವಕ್ಕೆ ದೇಶಾದ್ಯಂತ ವಿವಿಧ ಭಾಷೆಗಳ ಸುಮಾರು 70 ಕಿರುಚಿತ್ರಗಳು ಸಲ್ಲಿಕೆಯಾಗಿದ್ದವು. ಆಯ್ಕೆಯಾದ ಕಿರುಚಿತ್ರಗಳನ್ನು ಪ್ರದರ್ಶಿಸಲಾಯಿತು. ಮೈಸೂರು ಕ್ಯಾಂಪಸ್‌ನ ನಿರ್ದೇಶಕ ಬ್ರಹ್ಮಚಾರಿ ಅನಂತಾನಂದ ಚೈತನ್ಯ, ಸಂಚಾಲಕ ಮುಕ್ತಿದಾಮೃತ ಚೈತನ್ಯ, ಪ್ರಾಂಶುಪಾಲ ಡಾ. ಜಿ. ರವೀಂದ್ರನಾಥ್, ದೃಶ್ಯ ಸಂವಹನ ವಿಭಾಗದ ಮುಖ್ಯಸ್ಥ ಡಾ. ಮೌಲ್ಯಾ ಬಾಲಾಡಿ ಇತರರರು ಇದ್ದರು.