ಹೊಳೆಹೊನ್ನೂರು; ನಾವು ಮಾಡಿದ ಉಪಕಾರ ಮತ್ತು ನಮಗೆ ಪರರು ಮಾಡಿದ ಅಪಕಾರಗಳನ್ನು ಮರೆತಾಗ ಮಾತ್ರ ನೆಮ್ಮದಿಯ ಜೀವನ ಸಾಧ್ಯ ಎಂದು ಬಾಳೆಹೊನ್ನೂರು ಶ್ರೀ ರಂಭಾಪುರಿ ಡಾ. ವೀರಸೋಮೇಶ್ವರ ಜಗದ್ಗುರುಗಳು ಹೇಳಿದರು.
ಹನುಮಂತಾಪುರದಲ್ಲಿ ಮಂಗಳವಾರ ಆಯೋಜಿಸಿದ್ದ ಇಷ್ಟಲಿಂಗ ಪೂಜೆ, ಶಿವದೀಕ್ಷೆ ಹಾಗೂ ಧಾರ್ಮಿಕ ಸಮಾರಂಭದಲ್ಲಿ ಆಶೀರ್ವಚನ ನೀಡಿದ ಅವರು, ಮರೆಯದ ಪರೋಪಕಾರಗಳು ಆಂತರಿಕ ಕಲಹಗಳಿಗೆ ದಾರಿಯಾಗುತ್ತವೆ. ಧರ್ಮದ ನೆಲೆ ಆಸರೆ ನೀಡುತ್ತದೆ. ದೇಶದಲ್ಲಿ ಧರ್ಮ, ಜಾತಿಗಳ ನಡುವೆ ಸಂಘರ್ಷಗಳು ತಾರಕಕ್ಕೇರುತ್ತಿವೆ ಎಂದರು.
ಕಾರಣವಿಲ್ಲದೆ ಸಮಾಜದಲ್ಲಿ ಯಾವುದೇ ಕಾರ್ಯಗಳು ಜರುಗುವುದಿಲ್ಲ. ಪ್ರತಿಯೊಬ್ಬರಲ್ಲೂ ಧರ್ಮನಿಷ್ಠೆ ಬೆಳೆಯಬೇಕು. ಸಂತೋಷ ಇಲ್ಲವೇ ದುಃಖ ಹೆಚ್ಚಾದಾಗ ಮನುಷ್ಯನಿಗೆ ಮಾತುಗಳು ವೌನವಾಗುತ್ತವೆ. ಧರ್ಮ ಪರಿಪಾಲನೆಯಲ್ಲಿ ಕಷ್ಟದ ದಿನಗಳನ್ನು ಗೆದ್ದಾಗ ಮಾತ್ರ ಸುಖ ಪ್ರಾಪ್ತವಾಗುತ್ತದೆ. ಆಡಂಬರವನ್ನು ಬಿಟ್ಟರೆ ಕಾರ್ಯಸಾಧನೆಗಳು ಮನೆಮಾತಾಗುತ್ತವೆ. ಆಡಿದಂತೆ ನಡೆಯುವುದನ್ನು ರೂಢಿಗೆ ತರಬೇಕು ಎಂದು ಹೇಳಿದರು.
ಮನುಷ್ಯನಾಗಿ ಹುಟ್ಟಿದ ಮೇಲೆ ಕೊನೆಯಲ್ಲಿ ಮರಣ ಕಟ್ಟಿಟ್ಟ ಬುತ್ತಿ. ದೇವರಿದ್ದಾನೆ ಎನ್ನುವುದು ಸಾರ್ವಕಾಲಿಕ ಸತ್ಯ. ಭೌತಿಕ ಸಂಪನ್ಮೂಲ ನೀಡಿದ ಭಗವಂತನ ಸ್ಮರಣೆ ಮಾಡಬೇಕು. ದಿನದಲ್ಲಿ ಒಂದೆರಡು ತಾಸು ಪೂಜೆ ಮಾಡಿದರೆ ಜೀವನ ಸಾರ್ಥಕವಾಗುತ್ತದೆ. ಸಾಮರಸ್ಯ ಭಾವ ರಾಷ್ಟ್ರೀಯತೆಗೆ ಶಕ್ತಿ ನೀಡುತ್ತದೆ. ಪ್ರತಿಯೊಂದು ಧರ್ಮಗಳ ಆಚರಣೆ ಬೇರೆಯಾಗಿದ್ದರೂ ಕೊನೆಯ ಗುರಿ ಮಾನವ ಕುಲದ ಉನ್ನತಿಯೇ ಆಗಿರುತ್ತದೆ. ಮನುಷ್ಯ ಭೌತಿಕವಾಗಿ ಉನ್ನತಿಯಾಗಿದ್ದರೂ ಮಾನಸಿಕ ನೆಮ್ಮದಿ ಮಾತ್ರ ಮರೀಚಿಕೆಯಾಗಿದೆ. ನಾಸ್ತಿಕ ಭಾವ ವೃದ್ಧಿಯಾಗಿ ಧರ್ಮಾಚರಣೆ ಮುಖ್ಯವಾಗಬೇಕು. ಉಪಕಾರ ಸ್ಮರಣೆಯನ್ನು ಮರೆಯಬಾರದು. ಧರ್ಮಾಚರಣೆೆಯಲ್ಲಿ ಅಗೋಚರ ಶಕ್ತಿ ಅಡಗಿದೆ ಎಂದು ತಿಳಿಸಿದರು.
ಚನ್ನಗಿರಿ ಕೇದಾರ ಶಾಖಾ ಹಿರೇಮಠದ ಶ್ರೀ ಕೇದಾರಲಿಂಗ ಶಿವಶಾಂತವೀರ ಸ್ವಾಮೀಜಿ, ಶಿವಮೊಗ್ಗ ಹಾರನಹಳ್ಳಿಯ ರಾಮಲಿಂಗೇಶ್ವರ ಮಠದ ಶ್ರೀ ಶಿವಯೋಗಿ ಶಿವಾಚಾರ್ಯರು, ಕಡೇನಂದಿಹಳ್ಳಿ ಶ್ರೀ ರೇವಣಸಿದ್ದೇಶ್ವರ ಶಿವಾಚಾರ್ಯರು, ರೈತ ಸಂಘದ ಕಾರ್ಯಾಧ್ಯಕ್ಷ ಎಚ್.ಆರ್.ಬಸವರಾಜಪ್ಪ, ಲತಾ ಸೋಮಶೇಖರಯ್ಯ, ಎಚ್.ಆರ್.ಕಾಂತರಾಜ್, ಹಿರಣ್ಣಯ್ಯ, ಎಂ.ಪಾಲಾಕ್ಷಪ್ಪ, ಕಿರಣ್ಕುಮಾರ್, ಹಾಲೇಶ್, ರುದ್ರಯ್ಯ, ಶಿವಕುಮಾರ್, ಬಸವರಾಜಪ್ಪ, ಮಹೇಶಪ್ಪ, ಹಾಲೇಶಪ್ಪ, ನಾಗರಾಜ್ ಗೌಡ ಇತರರಿದ್ದರು.
