ಪ್ರಕೃತಿ ಉಳಿದರೆ ನಮ್ಮ ರಕ್ಷಣೆ ಸಾಧ್ಯ

ವಿರಾಜಪೇಟೆ: ಪ್ರತಿಯೊಬ್ಬರೂ ಪರಿಸರವನ್ನು ಪ್ರೀತಿಸಿದರೆ ಪ್ರಕೃತಿ ನಮ್ಮನ್ನು ರಕ್ಷಿಸುತ್ತದೆ ಎಂದು ವಿರಾಜಪೇಟೆ ತಾಲೂಕು ಪತ್ರಕರ್ತರ ಸಂಘದ ಅಧ್ಯಕ್ಷ ಮಧೋಶ್ ಪೂವಯ್ಯ ಅಭಿಪ್ರಾಯಪಟ್ಟರು.

ವಿಶ್ವ ಪರಿಸರ ದಿನಾಚರಣೆ ಪ್ರಯುಕ್ತ ವಿರಾಜಪೇಟೆಯ ಪ್ರಗತಿ ವಿದ್ಯಾ ಸಂಸ್ಥೆಯಲ್ಲಿ ಮಲೆತಿರಿಕೆ ಬೆಟ್ಟದ ಶ್ರೀಶನೀಶ್ವರ ದೇವಸ್ಥಾನದ ಪ್ರಧಾನ ಅರ್ಚಕ, ಸಂಸ್ಥಾಪಕರೂ ಆದ ಶ್ರೀ ವಿ.ಜಿ.ಕೃಷ್ಣಪ್ಪಸ್ವಾಮಿ ಜ್ಞಾಪಕಾರ್ಥವಾಗಿ ಶ್ರೀ ಶನೈಶ್ಚರ ಭಕ್ತ ಜನ ಮಂಡಳಿ ವತಿಯಿಂದ ನಡೆದ ಪರಿಸರ ದಿನಾಚರಣೆ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಮೊದಲೆಲ್ಲ್ಲ ದಟ್ಟವಾದ ಅರಣ್ಯ, ಬೆಟ್ಟಗುಡ್ಡಗಳು ಸದಾ ಹಸಿರಾಗಿದ್ದವು. ಅತಿ ಹೆಚ್ಚು ಮಳೆ ಇದ್ದರೂ ಪ್ರಕೃತಿ ನಡುವೆ ಮನುಷ್ಯನಿಗೆ ಉತ್ತಮ ಕಾಳಜಿ ಇತ್ತು. ಪ್ರಾಣಿ, ಪಕ್ಷಿಗಳು ಸಹ ಅರಣ್ಯದಲ್ಲಿ ಜೀವನ ಮಾಡುತ್ತಿದ್ದವು. ಕ್ರಮೇಣ ಅರಣ್ಯ ನಾಶಕ್ಕೆ ಮನುಷ್ಯನೇ ಕಾರಣನಾದ. ಪ್ರಾಣಿಗಳು ಕಾಡು ಬಿಟ್ಟು ನಾಡಿನತ್ತ ಬರುವಂತೆ ಆಯಿತು. ಹೀಗಾಗಿ ನಾವು ಪರಿಸರದ ಕಾಳಜಿ ವಹಿಸಿ ಪರಿಸರ ಸಂರಕ್ಷಣೆ ಮಾಡಬೇಕು ಎಂದರು.

ಸಮಾಜ ಸೇವಕ ಮೇರಿಯಂಡ ಸಂಕೇತ್ ಪೂವಯ್ಯ ಮಾತನಾಡಿ, ಹಲವಾರು ವರ್ಷಗಳಿಂದ ಶ್ರೀ ಶನೈಶ್ಚರ ಭಕ್ತ ಜನ ಮಂಡಳಿಯವರು ಪ್ರತಿ ವರ್ಷ ಜೂ.5 ರಂದು ವಿಶ್ವ ಪರಿಸರ ದಿನವನ್ನು ಆಚರಿಸುತ್ತಿದ್ದು, ವಿವಿಧ ಶಾಲಾ-ಕಾಲೇಜುಗಳಲ್ಲಿ ಸಸಿ ನೆಡುವ ಮೂಲಕ ಪರಿಸರದ ಜಾಗೃತಿ ಕಾರ್ಯಕ್ರಮ ಮಾಡುತ್ತಾ ಬಂದಿರುವುದ ಶ್ಲಾಘನೀಯ ಎಂದರು.

ಕರ್ನಾಟಕ ರಕ್ಷಣಾ ವೇದಿಕೆ ಶಿವರಾಮೇಗೌಡ ಬಣದ ತಾಲೂಕು ಅಧ್ಯಕ್ಷ ಟಿ.ವಿ.ಅನಿಲ್ ಕುಮಾರ್, ಚಿತ್ರಕಲಾ ಶಿಕ್ಷಕ ಬಿ.ಆರ್. ಸತೀಶ್, ವಿರಾಜಪೇಟೆ ಅಪ್ಪಯ್ಯಸ್ವಾಮಿ ರಸ್ತೆಯ ಮಹಾಗಣಪತಿ ಆಂಜನೇಯ ದೇವಾಲಯದ ಧರ್ಮದರ್ಶಿ ಬಾಬಾಶಂಕರ್ ಮಾತನಾಡಿದರು. ಪ್ರಗತಿ ವಿದ್ಯಾಸಂಸ್ಥೆ ಮುಖ್ಯಸ್ಥ ಮಾದಂಡ ತಿಮ್ಮಯ್ಯ, ಪ್ರಮುಖರಾದ ಎಂ. ಎಸ್. ಸೈನುದ್ದಿನ್, ಮಿಥುನ್, ರವಿ, ಶ್ರೀ ಶನೀಶ್ವರ ಭಕ್ತ ಜನ ಮಂಡಳಿ ಅಧ್ಯಕ್ಷ ಯುವರಾಜ್ ಕೃಷ್ಣ, ಪ್ರಗತಿ ವಿದ್ಯಾ ಸಂಸ್ಥೆ ಶಿಕ್ಷಕಿ ಪ್ರತಿಮಾ ಇತರರು ಇದ್ದರು.